Serekê Pêroyîi yê Komelê Îslamî yê Kurdîstanî (CÎK) Hafiz Turhalliyî derheqê hêrişanê artêşa tirke ya îşxalkere de ANFyî rê qisey kerd.

Turhalliyî vist vîrî ke artêşa tirke destpêkê tarîxê xo ra nata tim qirkerdişî kerdêne û vat: ''Artêşa tirke ya ke artêşa tewr pîle ya diyîn a NATOyî ya rixmê hende îmkananê xo zî pê xoverdayîşê gerîlayan nêeşkena coka dest eşt çekanê kîmyewîyan ê qedexekerdeyan. Dewleta tirke nê çekê qedexekerdeyî şuxilnayî û bi nê hawayî qelsîya xo zî eşkera kerde. Dinya verê nê hêrişanê dewleta tirke de bêveng a. Ganî dewleta tirke goreyê qanûnan têbigêra. Merdimê ke xo rê vanê 'ma însan ê, durist ê, dîndar û misilman ê' wa vera nê hêrişanê kîmyewîyan têbigêrê û nê sûcan teşhîr bikerê.''

Turhalliyî bale ante ser ke artêşa tirke cenazayanê leşkeranê xo vêşnena û dana bombayan ver. Turhalliyî vat: ''Ê domananê xo kişenê, cenazayanê înan kenê parçe, benzînî deverdenê ser vêşnenê. Ganî keyeyê leşkeranê tirkan nê kerdişan ser o qîyam virazê û domananê xo meşawê leşkerîye. Wa wina bifikirê ke serê gonîya domananê xo de ciwîyenê. Naye ra xirabêr çîyêk est o gelo? No dejenerebîyayîşê exlaqî yo. Ganî nê keyeyî vera nê dejenerebîyayîşî wurzê we.''