Serrgêra 10. ya Qirkerdişê Parisî yê 9ê Çeleyê 2013î de roja şemeyî rayraşîyayîşêko merkezî paytextê Fransa Paris de do bêro kerdene. Serrgêra qirkerdişî de 23yê kanûne de reyna Paris de Endama Konseya Rayberdişî ya KCKyî Emîne Kara (Evîne Goyî), hunermend Mîr Perwer û welatperwer Abdurrahman Kizil ameyî qetilkerdene. Hemserekê Komelê Demokratîkî yê Kurdan ê Fransa (CDK-F) Abdullah Ulmezî derheqê rayraşîyayîşê merkezî yê 7ê çeleyî de ANFyî rê qisey kerd.

Ulmezî da zanayene ke înan bi waştişanê ''Sirê dewlete yê serê qirkerdişî wedarîyo, mehkemeyê Fransa wa agahîyanê destê xo pare bikerê, faîlê esasî bêrê eşkerakerdene û muhakemekerdene'' 3 mengan verî dest pê amadekarîya çalakîya 7ê çeleyî kerd. Ulmezî pare kerd ke Evîne Goyîya ke Qirkerdişê Parisî yê 23yê Kanûne de kişîyabi, plansazîya çalakîya 7ê çeleyî kerdbî.

Ulmezî îfade kerd ke Evîne Goyî bi xo xebata na çalakîye dabî destpêkerdene û vat: ''Nêzdîya serrgêra Qirkerdişê Parisî de embaze Evîne zî bi heman hewayî ameye qetilkerdene. Embaze Evîne wina plan kerdbî ke 4ê çeleyî de çalakîya zîncîrê edaletî, 7ê çeleyî de çalakîya protestoyî, 9ê çeleyî de zî merasîmê yadkerdişî wa bêrê kerdene. 12ê çeleyî de zî Parlamento de konferansêk do biameyêne kerdene. Ma na plansazîya embaze Evîne bîyarê ca. Ma do goreyê esasanê plansazîya aye têbigêrê. 7ê çeleyî de, saete 10.00 de ma pabeyê pêro kurdîstanijan ê ke tewrê rayraşîyayîşê Parisî bibê.

10 serran de Paris de vera kurdan di qirkerdişî ameyî kerdene. Pêro dinya zanena ke kurdî zulmêkê senînî vînenê û kurdî sey verî nîyê. Ganî ma bidê famkerdene ke gonîya kurdan erzan nîya, rijnayîşê gonîya kurdan asan nîya. Kurdî tewirê xo 7ê çeleyî de bi xurtî do bimojnê.''