Paytextê Fransa Paris de 9ê çeleyê 2013î de ronayoxanê PKKyî ra Sakîne Cansiz (Sara), Temsîlkara KNKyî ya Parisî Fîdane Dogan (Rojbîne) û endama têgêrayîşê ciwanan Leyla Şaylemez (Ronahî) hetê MÎTê dewleta tirke ra ameybî qetilkerdene.

Bi wesîleya serrgêra 10. ya Qirkerdişê Parisî Têgêrayîşê Cinîyan ê Kurdan ê Fransa (TJK-F) û Konseya Kurdan a Demokratîke ya Fransa (CDK-F) kombîyayîşê çapemenîye kerd. Kombîyayîş de startê çalakî û merasîmanê serra 10. dîya û bire dîyaye ke 7ê çeleyî de Paris de rayraşîyayîşêk bêro kerdene. Çalakîyî bi şîarê 'Sirê dewlete werte ra wedarnê! Bêcezatîya 10 serran biqedînê' 4ê çeleyê 2023yî de do dest pêbikerê.

Kombîyayîşê çapemenîye de bi fransizkî, kurdkî û tirkî eşkerayîye ameye wendene. Eşkerayîye de ame vîrvistene ke hîrê cinîyê kurdî bi fermanê Erdoganê faşîstî ameyê qetilkerdene û no hêriş şexsê nê hîrê cinîyan de vera pêro şaran ameyo kerdene. Eşkerayîye de ame vatene ke dewleta tirke û dewletê NATOyî mesuldarê nê qirkerdişî yê.

Eşkerayîye wina dewam kena: ''Dewleta Fransa mesuldar a ke Qirkerdişê Parisî roşnî bikera û sûcdaran muhakeme bikera. Coka ma serra 10. de vanê; Sirê dewlete wedarnê, peynîya şerma 10 serran bîyarê!

Heta ke hesabê nê qirkerdişî bêro persayene ma sey kurdan û cinîyan ê kurdan mîyanê têkoşînî de bê. Ma 4ê çeleyî ra heta 9ê çeleyî çalakîyan do bikerê. Nê esasî ser o;

Roja çarşemeyî 4ê çeleyî de verê Buroyê Enformasyonî yê Kurdîstanî de ma do çalakîya edaletî bikerê.

7ê çeleyî roja şemeyî de ma do rayraşîyayîşê edaletî bikerê ke şarê ma pêro cayanê Ewropa ra do tewrê ci bibo.

9ê çeleyî roja dişemeyî de ma verê Buroyê Enformasyonî yê Kurdîstanî de hetê Şaredarîya Parisî ra merasîmêkê fermî bikerê.

Ma venga pêro şarê xo, cinîyan û dostanê xo û kesanê ke edalet û azadîye wazenê danê ke sey roja verêne bi hawayêkê xurtî û bi hêrsî tewrê nê çalakîyan bibê.''