Artêşa Iraqî 20ê gulane ra nata kena ke dormeyê Kampa Multecîyan a Şehîd Rûstem Cûdîyî pê têlan û kuleyan bigêra. Vera ablûqa şarê Mexmûrî xoverdayîş de yo.

TEV-ÇAND û Kevana Zêrîn a Ewropa derheqê ablûqaya vera Mexmûrî de eşkerayîyêke daye. Eşkerayîye de ame parekerdene ke artêşa Iraqî waştişê PDK û dewleta tirke ser o Mexmûrî gêna binê ablûqa. Eşkerayîye de xoverdayîşê şarê Mexmûrî ame selamkerdene û ame vatene ke kampa Mexmûrî tim raştê hêriş û tedayan yena.

TEV-ÇAND û Kevana Zêrîn a Ewropa peynîya eşkerayîye de venga pêro şarê kurdî, hunermend û roşnvîranê kurdan da ke xoverdayîşê Mexmûrî hîra bikerê û wayîrê xoverdayîşê Mexmûrî vejîyê.