Perey şaristanê Darmstadtî yê Almanya de serê sibayî polîsan eştbi Merkezê Komelê Kurdan ê Demokratîkî (NCDK) û xeylêk adresan ser û îdarekarê FCDK-Kawayî û hemserekê verênî yê NCDKyî yê Mannheimî destbend kerdî.

Federasyonê Kawayî, NCDKyê Darmstadtî de hêrişê dewleta Almanya û destbendbîyayîşê sîyasetmedaranê kurdan bi eşkerayîyêka çapemenîye teşhîr kerd û şermezar kerd. Xeylêk kesî tewrê eşkerayîye bîyî.

Hemserekê Federasyonê KAWAyî Mehmet Çobanî çalakîye de da zanayene ke polîsan sereştişan de merkezî serûbin kerdê û vat: ''Dewleta Almanya 30 serrî yo xîret kena ke ma krîmînalîze bikera. Ma sey kurdan vera ney bi înadî xo ver danê. Ma komeleyanê xo de xebatê weçînayîşî kerdêne. Zaf balkêş o ke nê hêrişî nêzdîyê weçînayîşan de qewimîyayê. Polîtîkayê krîmînalîzekerdişî do netîce nêdê. Almanya wa heqanê ma rê hûrmet bikera.''

Hemsereka verêne ya NCDKyê Mannheimî Songule Çelîka ke polîsan eştbi keyeyê ci ser zî ard ziwan ke hişmendîya dewleta tirke û yê Almanya heman a. Çelîke vat: ''Ma sey kurdan kenê ke bi kultur, erjanê xo têkoşînê demokrasî bikerê. Manîdar o ke dewlete wina erzena keyeyanê ma ser.''

Temsîlkarê Die Linke Uli Frankeyî venga dewleta Almanya da ke wa vera kurdan polîtîkayanê krîmînalîzasyonî ra fek vera bida.