Kurdîstanijanê Berlinî ANFyî rê qisey kerd û vera tecrîdê Îmraliyî nêrazîbîyayîşê xo mojna. 

Musa Korkuto ke êlihij o îfade kerd ke tecrîdê serê Rayberê Şarê Kurdî Abdullah Ocalanî 25 serrî yo dewam keno û vat: ''Seba ke Rayberîye şarî ra bêro cîyakerdene tecrîd yeno caardene. 3 serrî yo ke Rayberê ma ra xeberêke çin a. Ganî ma sey şarî vera tecrîdî cewabê xo bidê. Ma bi rayîr û metodanê winayênan cewabê dişmenî bidê û tecrîdî qebul nêkerê. Hînî wextê qiseykerdişî qedîyayo. Wext wextê çalakîyan o.''

Engîn Uluganayo ke wanij o, ard ziwan ke dewleta tirke nêeşkena pê tecrîdî Abdullah Ocalanî zerrîya kurdan ra biqerifna. Uluganayî vat: ''Ewro paradîgmaya Rayberê ma pêro dinya ra vila bena. Ma wazenê hînî Rayberê ma azad bibo. Ganî vera tecrîdî çalakîyê bêmabênî û sîstematîkî bêrê kerdene. Teyna pê xoverdayîşî tecrîd do bêro şiknayene. Ganî ma hîna zaf waran de bibê û çalakîyanê cîya-cîyayan bikerê.''

Zafero ke Xarpêtî ra yo dîyar kerd ke dewleta tirke paradîgmaya Rayberê Şarê Kurdî ra tersena û vat: ''Paradîgmaya Rayber Apoyî eşkena pêro meseleyanê Rojhelatê Mîyanênî çareser bikera. Dewleta tirke seba ke ney ra tersena Rayberê ma tecrîd kena. Vera tecrîdî çalakîyê ma yê nikayênî qîm nêkenê. Bi taybetî ciwanê kurdî ganî kurdîstanijî çalakîyanê hîna bitesîran bikerê. Ganî ma hemleyêke bidê destpêkerdene ke tira netîce bigêrê.''