Strasbourg de vernîya Parlamentoya Ewropa (PE) de vizêr grevê vêşanîye yê 5 rojan ame destpêkerdene. Zîndanê Amedî ra xoverdayoxêk bi rayîrê telefonî tewrê çalakîye bi û semedê xurtkerdişê mucadeleyî veng da.
Çarçeweya çalakîyanê vera tecrîdî de vizêr vernîya Parlamentoya Ewropa (PE) de bi tewrbîyayîşê temsîlkaranê xeylî partî û dezgehanê Kurd û Tirkîyeyijan grevê vêşanîye yê 5 rojan ame destpêkerdene.
Çalakî do her roje mabênê saetanê 11-17 de vernîya PE de bêro viraştene. Çalakwanî welatanê Ewropa ra wazenê ke vera tecrîdê serê Rayberê Şarê Kurdî Abdullah Ocalanî, faşîzmê AKP-MHP’yî rê bêveng memanê. Roja verêne ya çalakîye de hemserekê Kongra Gel’î Remzî Kartal zî tede temsîlkaranê xeylî dezgehan qisey kerd. Qiseykerdişan de ardîya vîrî ke her roje zîndanan ra xebera mergî yena û ame vatene ke welatê Ewropa bi bêvêngîya xo nê sucî rê hempar ê. Qiseykerdişan ra dima balonê ke sero ‘Ocalanî rê azadîye‘ nuştebî ameyî firnayene.
Zîndanê Amedî ra mesajê girdkerdişê xoverdayîşî
Bado zî Zîndanê Amedî ra xoverdayoxêk bi rayîrê telefonî tewrê çalakîye bi û semedê girdkerdişê xoverdayîşî veng da. Çalakwanê Zîndanê Amedî wina va: ‘‘Şarê Kurdî ganî xoverdayîş gird biko û qetî desturê faşîzmê AKP-MHP’yî medo. Kurdê ke paşt bidê nê partîyan xayîn ê. Ganî şarê ma biewnîyo çalakîyanê fedaîyan ê zîndanan ra û her mehla biaçarno cayê xoverdayîşî.‘‘
