Wallstrome: Ganî mucadeleyê Kurdan o pîl bêro dîyene

Wallstrome Stockholm de kombîyayîş de vat ke ê îdareyê xoserî yê Rojawanî dir têkilîye de yê û vat, “Verê her çîyî ganî ma qebûl bikerê ke Kurdan hemverê Dewleta Îslamî de mucadeleyêko çiqas pîl da.”

Wezîra Karanê Teberî yê Swêdî Margot Wallstrome xebatkaranê çapemenîya xerîbe yê ke Swêd de yê reyde ronişte û derheqê polîtîkayanê teberî yê Swêdî de û rojdemî de cewab da persanê rojnamekaran.

Ma zî derheqê sîyasetmedaro Kurd Selahattîn Dermîrtaşî, parlementeranê HDP’yî yê tepişteyan û qirkerdişê Ermenîyan ê serra 1915’î de Wallstrome ra persî kerdî. Wallstrome ard ziwan ke înan xeylî reyan waşto, ganî zextê sere muxalif, rojnamekar û organîzasyonanê cimatkîyan ê sivîlan biqedîyê û vat ê paştî danê muxalifanê tepişteyan, temsîlkarê xo şirawitê roniştişanê dewayanê înan. Wallstrome vat, “Xeylî muhîm o ke na babete rojdem de bêro verdayene.”

Nîyetê Hukmatî Çino ke Qirkerdişê 1915’î Qebûl Bikero

Ma persa; rixmo ke serekwezîr Stefan Lofvenî verê weçînitişanê serra 2014’î soz da ke gama hukmatî awan bikero do qirkerdişê Ermenî û Suryanîyan qebûl bikero, la hewna zî hukmatî qirkerdiş qebûl nêkerdo, Wallstrome cewabêko winayên da: “Heta nika hema vajê tu welatî no qebûl nêkerdo. Sebebê na yewe zî no yo ke derheqê qewimîyayîşanê wina tarîxîyan de qerardayîş zehmet o. A game do bêro waştene ke edalet bêro bicaardene.”

Mehkemeya Mîyanneteweyîye Eşkena Vakurê Sûrîye de Bêro Awankerdene

Radyoyê Dewlete yê Swêdî ra Bêşîr Kavakî persa ke derheqê awankerdişê mehkemeyêka mîyanneteweyîye Vakurê Sûrîye de seba muhakemekerdişê DAÎŞ’ijanê ke Sûrîye û Iraq de yê a çi fikrêna? Wallstrome vat Swêdî seba awankerdişê mehkemeyêka mîyanneteweyîye însîyatîf dayo serê milê xo, kewto mîyanê cehdan û vat, rixmo ke xeylî welatê Ewropayijî bi hawayêkê pozîtîfî nizd benê zî rîyê astengîyanê huqûqî û sîyasîyan ra awankerdişê mehkema beno ke goreyê wextêk dem bigêro.

Wallstrome ard ziwan seba ke Iraq de cezaya kiştişî esta ê hemverê nê de yê ke Iraq de mehkemeyêka mîyanneteweyîye bêro awankerdene û vat seba ca û hetkarîya fînansî ya seba mehkemeya mîyanneteweyîye pêvînayîşê înan ê welatanê binan reyde dewam kenê. Seba persa derheqê awankerdişê mehkemeya mîyanneteweyîye ya Vakurê Sûrîye Wallstrome vat, “Ganî ma nê biwekênê. Herêma ke Kurdî kontrol kenê tede mehkema eşkena bêro awankerdene. Ma heme îmkanan wekenenê.” Wallstrome vat ke ê îdareyê xoserî yê Rojawanî dir mîyanê têkilîye de yê û vat, “Verê her çîyî ganî ma qebûl bikerê ke Kurdan hemverê Dewleta Îslamî de çiqas mucadeleyêko pîl da.”