Dima ke Wekîlê AKPyî Mustafa Açikgozî şaristanê Neussî yê Almanya de camîyêka faşîstan de kurdî û muxalîfî tehdît kerdbî, Wekîla Partîya Çepe ya Parlamentoyê Almanya Gokaye Akbulut bi vernîyazêkê persan babete kerde rojdem.

Nameyê hukmatê Almanya ser o Musteşarê Wezîrê Karanê Zereyî Mahmut Ozdemîrî cewab da vernîyazî û vat: ''Sîyasetmedarê xerîbî ganî bi destûrê hukmatî Almanya de kampanyaya weçînayîşî bikerê. Ganî beşdarîya bi çalakîyanê weçînayîşî çarçewa qanûnanê Almanya de biba û asayîşê zereyî yê Almanya tehdît nêkerê. Qiseyanê wekîlê tirkî Açikgozî ra dima, 13ê çeleyî de venga Sersefîrîya Tirkîya dîya û bi zelalî ci rê ame vatene ke destûr nêdîyeno ke eşkerayîyê sey Açikgozî reyna dibare bibê.''

Wekîla Partîya Çepe Gokaye Akbulut eşkerayîya Wezîrîya Karanê Zereyî qîm nêdîye û vist vîrî ke Wezîrê Zîretî yê Tirkîya Vahit Kirişciyî hewteyê vîyarteyî de Berlin de terefgîranê xo de pêvînayîş kerdo. Akbulute vat: ''Asena ke dewleta tirke goş nêkewena eşkerayîyanê hukmatê Almanya. Coka ganî Wezîrîya Karanê Zereyî sînoranê zelalan rona. Eke şima raşta zî asayîşê zereyî fikirîyenê ganî cade dîyaloganê bi Tirkîya vindarnê. Goreyê agahîyanê ke resayê destê ma, yewinê asayîşî derheqê komeleyanê kurdan de agahîyan arê danê û bi servîsê nimitkî şawenê Tirkîya.''

Wekîla Partîya Çepe Gokaye Akbulut da zanayene ke derheqê prosesê muhakemekerdişê tirkîyayîjanê ke Almanya de ciwîyenê de agahîyî dîyenê Tirkîya û ganî cade na hemkarîye biqeda.