Parlamentoya Ewropa de bi nameyê ''Dengizê Sipî de îstîkrar, asayîş û rolê xirabî yê Tirkîya'' roniştişêkê heyetê pêroyî ame kerdene.

Roniştiş de Dengizê Sipî de û Lîbya de polîtîkayê îşxalî yê Tirkîya bi ziwanêkê tûjî ameyî rexnekerdene. Xeylêk wekîlan da zanayene ke Tirkîya ''rejîmêko otorîter o'' û waşt ke wa pêvînayîşê bi Anqara bêrê vindartene. Reyna wekîlan veng da ke hetkarîya fînanse ya Neteweyanê Yewbîyayeyan zî wa bêra birnayene.

Raportorê NYyî yê Tirkîya û wekîlê îspanyolî Nachos Sanchez-Amorî îfade kerd ke ganî Tirkîya hûrmet bimojna normanê Ewropa.

Serekê Koma Demokratan ê Xirîstîyanan, wekîlê almanî Manfred Weberî zî waşt ke wa peynîya pêvînayîşê seba endamîya Tirkîya bêra ardene.

Nameyê koma lîberale Renewî ser o zî wekîla fransize Nathalie Loiseau vat: ''Tirkîya goreyê erjanê Ewropa tênêgêrena û pê dişmenîye têgêrena.''

Nameyê koma komunîste (GUE) ser o zî wekîla almane Ozleme Demîrel vat: ''Şima heqdar ê ke Tirkîya rexne bikerê, wa çew çekan nêroşo Tirkîya.''

Endamê Koma Demokratan ê Sosyalan wekîlê Kibrisî Costat Mavridesî zî Almanya seba ke çekan roşena Tirkîya rexne kerde û vat: ''Tirkîya nê çekan vera erjanê Ewropa xebitnena.''