Çarçewa Hemlaya ''Wextê azadîye yo de'' xeylêk welatanê Ewropa de pê çalakîya nobete tecrîd yeno şermezarkerdene û azadîya Rayberê Şarê Kurdî Abdullah Ocalanî yena waştene.

Bajaranê Dusseldorf, Stuttgart, Frankfurt û Nurnbergî yê Almanya de de kurdîstanijî û dostê înan ewro zî kuçeyan de bî.

Dusseldorf

Dusseldorf de çalakîya roniştişî roja hîrêne de dewam kerde. Kurdîstanijê ke Essen, Duisburg, Koln û Dusseldorf ra ameyî ewro tewrê çalakîye bîyî.

Çalakîye de Wekîlê HDPyî yo verên Lezgîn Botanî qisey kerd û bale ante muhîmîya rolê Ocalanî ser.

Temsîlkarê Têgêrayîşê GORANî Goran Babalî ard ziwan ke Abdullah Ocalanî şorişê kurdî da destpêkerdene û şarêko biîrade vete meydan.

Hunermendo başûrij  Nebaz Abdullahî zî vat: ''Paradîgmaya Serek Apoyî ser kewt. Garê de no ame ispatkerdene. Zap no ispat kerd. Rojawan no ispat kerd. Ma sey şarî wazenê pîya bi Raybarê xo bibê azad.''

Temsîlkarê Cîvaka Îslamîya Kurdîstanî Mele Salh zî vat: ''Ma veng danê hêzanê mîyanneteweyî înkar û qirkerdişê vera kurdan çare nîyê. Ganî azadîya Kurdîstanî bêro naskerdene.''

Hunermendanê TEV ÇANDî  Bengî Agîrî, Navdar û Serhat Gimgim zî çalakîye de deyîrê azadîye û mucadeleyî vatî.

Stuttgart

Çalakîya nobete ya ke perêy Suttgart de dest pêkerde hetê Meclîsanê Şarê Kurdî yê Demokratîkî yê Stuttgart û dormeyê ci ra yena rayraberdene. Her roje yew meclîs çalakîye geno xo ser.  Çalakîya ke kitabê Abdullah Ocalanî zî yenê vilakerdene de xoverdayîşê Garê ame selamkerdene.

Frankfurt

Çalakîya nobete ya Frankfurtî  ke vizêr dest pêkerde ewro hetê meclîsanê Frankfurt, Giessen, Mannheim, Mainz û Saarbruckenî ra ameye dewrgirewtene. Çalakîye de ame vatene ke wext ê azadîya Ocalanî ame verêno zî.

Nurnberg

Bajarê Nurnbergî de zî bi waştişê azadîya Ocalanî ewro çalakîya seba 3 rojan dîyaye destpêkerdene. Jakobplatz xeyme ameye ronayene . Çarçewa çalakîye de îmzayê ke do Sekreterîya Pêroyî ya Yewîyanê Netewîyan rê bêrê şawitene,  ameyî arêdayene. Reyna têgêrayîşê cinîyan zî çarçewa  Kampanyaya '100 Sebebê Seba Hukmkerdişê Dîktatorî' de îmzayî arê dayî. Çalakîyê do 25ê sibate de  saete 15.00 Hallplatz de û 26ê sibate saete 15.00Hans Sach Platz de bêro kerdene.