Wezîrê Edalet û Koçberîye yê Swêdî Morgan Johanssonî cewabêko ecêb da persê wekîla xosere Amînehe Kakabaveh. Amînehe Kakabavehe derheqê ciwanê kurdî Resûl Ozdemîrî de ke waştişê ci yê îltîca nêame qebulkerdene û teslîmê Tirkîya ame kerdene.

Johanssonî îdîa kerd ke ê nêeşkenê derheqê bire de qisey bikerê û vat: ''Swêd de mehemeyî xoser ê. Swêd de qedexe yo ke kesê ke binê rîskê îşkenceyî de yê sînorî ra bêrê teberkerdene. Dayîreyê Koçberan ê Swêdî nê esasî ser o derheqê muracatanê îltîca de bire dano.. '' Johanssonî dewamê qiseykerdişî de qerarê teslîmê Resûl Ozdemîrî pawit.

Kakabavehe îfade kerd ke ya hayîya wezîrî pê sînorkerdişî çin a yan zî wezîr xîret keno ke hemkarîya pê dewleta tirke mîyan bikero. Wekîlê Partîya Çepgire  Hakan Svenneligî zî vat ê qet teslîmkerdişê Ozdemîrî qebul nêkenê û rewşe teqîb kenê.

Avûkatê Ozdemîrî yê Swêdî Abdullah Devecîyî mufetîşî ye ra waşt ke teslîmkerdişê Ozdemîrî bêro cigêrayene. Devecîyî derheqê cewabê Johansonnî vat: '' Semedo ke cezaya Ozdemîrî ameye tesdîqkerdene û rîsk esto ke îşkence bivîno Ozdemîr Tirkîya rê ame teslîmkerdene. No qet nêno qebulkerdene.