Ewropa de çalakîyê şermezarkerdişê Komployê 9ê Teşrîna Verêne dewam kenê. Vizêr reyna xeylêk bajaran de bi aktîvîte û çalakîyanê cîya cîyayan azadîya Rayberê Şarê Kurdî Abdullah Ocalanî ameye waştene.

Bajarê Bordeauxî yê Fransa de semedê şermezarkerdişê Komployê 9ê Teşrîna Verêne rayraşîyayîş û mîtîng ameyî kerdene.

Bajarê Giessenî yê Almanya de çarçewaya Hemleya Azadîye de bi tewrbîyayîşê sîyasetmedare Dîleke Ocalan panel ame kerdene.

Bremenê Almanya de Meclîsê Cinîyan ê Sêvê çarçewaya aktîvîteyanê Tirêjên Rojê de derheqê Komployê Mîyanneteweyîyî û heqê hêvî de panel organîze kerd.

Hildesheimê Almanya de Merkezê Komelê Demokratîkî yê Kurdan de kibatê Abdullah Ocalanî yê kurdkî û almankî ameyî wendene û erjnayîşî ameyî kerdene.

Rennesê Fransa de bi vengdayîşê Têgêrayîşê Cinîyan ê Kurdan ê Ewropa (TJK-E) bi seyan kesê ke ameyî têhet, bi rayraşîyayîş û eşkerayîya çapemenîye  komplo û tecrîd şermezar kerdî.