Her di çalakwanî hetê doktorî ra bi nîzamî yenê kontrolkerdene. Ekîbê weşîye yo ke hetê Merkezê Komelê Demokratîkî ra ameyo ronayene çalakwanan kontrol keno û ekîb do derheqê rewşa weşîye ya çalakwanan de, rojanê verê ma de beyanatê xo eşkera bikero.

Çalakwanan de bêhewnîye, dejê sereyî, veng ra acizbîyayîş, kewtişê tansîyonî yeno dîyayene. Çalakwanan mabênê 40 rojan de 7 kîloyî kerdê vîndî la hetê moral û motîvasyonî ra sey roja verêne baş ê.

Yîgîte û Agaogluyî sere de Leyla Guvene, pêroyê xoverdayoxanê grevê vêşanîye rê silamî erşawitî û waşt ke Kurdî û dostê ci hîna zêde xo ver bidê û grevanê vêşanîye rê wayîrtîye bikerê. Çalakwanan waşt ke her kes beşdarê rayîrşîyayîşo ke 16’ê Adare de do Vîyana de bêro kerdene bibo.

Çalakwanan wina va: ”Wexto ke şehadetî bîyî nê, her kes, ganî hîna ke kes nêmerdo rawirzo payan ser û veng bido vengê xoverdayoxan. Hepîsxaneyanê Tirkîya de, grevê vêşanîye yê ke bi serkêşîya Leyla Guvene ameyê destpêkerdene, restê asta mergî. La hem AKP-MHP’yê faşîstî, hem zî dewletê Ewropayî yê hemkarê înan bêveng ê. Ganî ma seba ke merdimanê xo yê welatperweran, şoreşgêran û demokratan medê kiştene hîna zêde wayîrtîye bikê û beşdarê çalakîyan bibê. Xoverdayîş dano ciwîyayene, bêvengîye zî dana kiştene.”