Yewîya Kurdîstanî planê çalakîyan ê 'Lozanî' eşkera kerd

Yewîya Kurdîstanî serrgêra viraştişê Peymana Lozanî de startê çalakîyanê serrgêra 100. ya peymane bi eşkerayîya çapemenîye da.

Yewîya Kurdîstanî bi beşdarîya 52 partî û dezgehan bernameyê çalakîyan ê serra 100. ya Peymana Lozanî şaristanê Lozanî yê Swîsre de meydanê Riponne de eşkera kerd ke pê Peymana Lozanî Kurdîstan amebi parçekerdene. Yewîya Kurdîstanî serrgêra viraştişê Peymana Lozanî de startê çalakîyanê serrgêra 100. ya peymane bi eşkerayîya çapemenîye da.

Eşkerayîya çapemenîye de verî Hemserekê KNKyî Ahmet Karamusî qisey kerd û da zanayene ke ê do peymana ke tede nameyê kurdan çin a, qebul nêkerê.

Endamê Komîteya Rayberdişî ya KCKyî Zubeyîr Aydarî zî pare kerd ke ganî neheqîya ke 100 serrî verî ameya kerdene biqeda û na peymane bêra dirnayene.

Soran Ahmad Alîyî zî bale ante ser ke kurdî hema zî pê çekanê kîmyewîyan yenê qirkerdene û vera ney ganî kurdî yew bibê.

Wekîla Partîya Sosyalîste Fehlmann Rielle zî waşt ke neheqîyê vera kurdan hînî wa biqedê.

Hemserekê KCDK-E Yuksel Koçî vat: ''Seba kurdan na peyman pûç a. Kurdî û dezgehê înan çar parçeyan ra ameyî tîya û mojna ke na peymane bêmana ya.''

Wekîlê Partîya Keskan Raphaël Mahaimî vat: ''Kurdî nika dîyenê bomnbayan ver û vera ney dinya bêveng a. No îxanet nêno qebulkerdene. Ma do paştî bidê kurdan û PKKyî.''

Qiseykerdişan ra dima eşkerayîye ameye wendene. Eşkerayîye de dîya zanayene ke seba serra 100. ya Peymana Lozanî komîteyêke ameye awankerdene û na komîte serrêke çalakî û aktîvîteyan bikera. Eşkerayîye de venga Neteweyanê Yewbîyayeyan û dezgehanê mîyanneteweyîyan dîya ke wa peymane newe ra biercnê û netîceyanê ci yê xiraban çare bikerê. Eşkerayîye ra dima bername ame eşkerakerdene.

Bernameyê serra 100. ya Peymana Lozanî;

1. 21ê adara 2023yî de Şaredarîya Lozanî û Kantonê Parlamentoyî pîya Resepsîyonê Newroze do bivirazê.

2. Panelî

-Panel, 14ê Nîsane: Peymana Lozanî ra hetê tarîxî ra ewnîyayîş

- Panel, 21ê Nîsane: Qirkerdişê Cinîyan ê Lozanî, Jineolojî

- Panel, 5ê Gulane: Lozan ewro senî yeno caardene?

-Panel, 26ê Gulane: Çareserîya seba ameyoxî û rayîrê çareserîye

3. Aktîvîteyê Kulturelî

Mabênê 24ê nîsane-21ê gulane de salona Şaredarîye de pêramotiş

Vîdeo

Resim

Fotografî

Peykerî

Kronolojîya Tarîxîye

Reyna heta temmuze aktîvîteyê kulturelî yê sey pêramotiş, tîyatro, konserî do bêrê kerdene

-14-15-16ê temmuze de festîvala kulturî do bêra kerdene.

4. Forum

Menga hezîrane de formatê tribunalî de forum do bêro serûberkerdene.

5. 22ê temmuze de rayraşîyayîşê Kurdîstanî do bêro kerdene.

6. 22-23ê temmuze de Koneransê Kurdîstanî do bêro kerdene.

7. 24ê temmze de verê bînaya viraştişê peymane de netîcenameyê konferans û forumî bêrê eşkerakerdene.

Xebatê Enformasyonî

- Rîpelê Webî ''Lozan2023''

- Borşurê Lozanî

- Hetê 10-15 akademîsyenanê îngilîzan ra amadekerdişê kitabê qijî

- Dokumantasyonê Lozanî

 [album=18032]