Semedê protestokerdişê tecrîdê serê Ocalanî û paştdayîşê grevê vêşanîye bajarê Zurîhî yê Swîsre de ciwan, Rennesê Fransa de zî cinîyî kuçeyan de bî. Vîyana de zî grevê vêşanîye yena domnayene.
Çalakîyê seba protestokerdişê tecrîdê girankerdeyî yê serê Rayberê Şarê Kurdî Abdullah Ocalanî dewam kenê. Bajarê Zurîhî yê Swîsre de ciwanî û bajarê Rennesî yê Fransa de zî cinîyî wareyan de bîyî. Vîyana de zî çalakîya grevê vêşanîye dewam kena.
Zurîh: Bajarê Zurîhî yê Swîsre de seba protestokerdişê tecrîdê girankerdeyî yê serê Rayberê Şarê Kurdî Abdullah Ocalanî bi vengdayîşê Platfromê Ciwananê Zurîhî ciwanî ameyî têhet û merkezê bajarî de rayraşîyayîşêk viraşt. Ciwan ê ke xoverdayoxanê grevê vêşanîye û çalakîyanê fedaîyan ra wayîrê vejîyayê bi ziwananê Almankî, Fraskî, Kurdkî û Tirkî sloganî eştî.
Rennes: Bajarê Rennesî yê Fransa de Komela Cinîyan a Zîne û Meslîsê Cinîyan ê Sara-Sêvê bi waştişê wedaritişê tecrîdê serê Ocalanî û wayîrvejîyayîşê xoverdayoxanê grevê vêşanîye yê bi rayberîya hemsereka KCD’yî Leyla Guvene ameyê destpêkerdene çalakîyî viraştî û bale ante sere çalakîyanê fedaîyan. Cinîyî Saînte Anne de ameyî têhet û resimê xoverdayoxanê grevê vêşanîye akerdî û vilawekî kerdî vila.
Vîyana: Paytextê Awusturya Vîyana de zî çalakîya grevê vêşanîye roja dîyine de dewam kerde. Çalakwanî her roje mabênê saetanê 11.16 de vernîya Parlamentoya Awusturya de xeyme nanê ro û derheqê tecrîd û grevê vêşanîye de zanayîş danê. Reyna dosyayan kenê hadre kenê pêvînayîşan virazenê.
