23ê nîsana 2021î de artêşa tirke ya îşxalkere hêrişê Zap, Metîna û Avaşînî kerd û şero tewr pîl ê Kurdîstanî vera gerîlayan da destpêkerdene. Artêşa îşxalkere verê çimanê pêro dinya de gaz û çeka kîmyewîye şuxilnayêne la raşta xoverdayîşê gerîlayan ameyêne. Gerîlayî xoverdayîş û ablûqayanê bi rojan ra dima hêrişanê kîmyewîyan de şehîd bîyî la înan peyê xo de mîrasêko pîl verda.

Goreyê bîlançoyanê ke Merkezê Îrtîbatî û Çapemenîye yê HPGyî weşanayê, hêrişanê kîmyewîyan ê artêşa tirke de 40 gerîlayê HPG û YJA-Starî şehîd bîyî. Nînan ra 6 gerîlayî menga sibate de Garê de, 34ê ci Zap, Avaşîn û Metîna de hêrişanê kîmyewîyan de ameyî qetilkerdene.

Artêşa tirke sere de pê çekanê kîmyewîyan û gazanê jehrînan ê tewr teknolojîkan pê pêro hacetanê şerî yê modernan şer kerdêne. La gerîlayanê azadîye Zap, Metîna û Avaşîn de îşxalê artêşa îşxalkere rê rayîr nêda û nameyê xo xoverdayîşê 2021î ser ra nuştî. Ma hîkayeyanê têkoşînî yê nê gerîlayan ra tay beşê girîngî pêser kerdî...

7 gerîlayan binê gazê jehrînî de 10 rojan xo ver da

Hêrişanê dewleta tirke 23ê nîsane de warê Mamreşoyî yê Avaşînî de dest pêkerd. Rayberîya fermandarê Girê Şehîd Munzurî Serhat Giravî (Kamûran Alpsar / Colemêrg) de Rûkene Zagros (Sehere Bîngol / Colemêrg), Sarya Diyar (Bişenge Hezer / Şirnex), Canfeda Hesekê (Şehbaze Îzzettîn Seydo / Hesekê), Xebat Aso (Ûbeyt Mevlûdî / Kirmanşan), Zafer Tolhildan (Mûhammed Abdulkadîr Huseyîn / Qamişlo) û Kamûran Amed (Mûstafa Şîmşek / Amed) 10 rojan bi hawayêkê destanwarî xo ver da.

Nê hewt gerîlayî parçeyanê cîyayan ê Kurdîstanî ra ameybî û têkoşînê azadîya kurdan de resayî pê. Rûkene Zagros Geverî ra, Sarya Dîyar Hezexî ra, Canfeda Hesekê Şehbaze ra, Xebat Aso Kirmanşanî ra, Zafer Tolhildan Qamişloyî ra, Kamûran Amedî ra û Serhat Giravî zî Colemêrgî ra bîyî. 10 rojan nê 7 gerîlayan hêrişî ra heta sabotajî û sûîkastî pê metodanê gerîlayan Zagrosan de derbê giranî da îşxalkeran ro. Artêşa tirke zî bi rojan nê gerîlayî dayî bombayan ver.

Tay dîmenê xoverdayîşê Mamreşoyî polîtîkayanê şerê taybetî ta gemarinan ê dewleta tirke eşkera kenê. Leşkerê tirdkî dûrî ra vanê 'teslîm bibê' la gerîlayî pê fîşek û guleyan cewabê înan danê. Gerîlayî vera teslîmîyetî weriştî payan ser û înan herinda teslîmîyetî de xoverdayîş weçîna. Artêşa îşxalkere pê xoverdayîşê gerîlayan nêeşkaye û pê gazê jehrînî hêrişê gerîlayan kerd. 10 rojan ra dima nê 7 gerîlayê çêrî 3ê gulana 2021î de şehîd bîyî.

Xoverdayîşê Zendûra de 5 gerîlayî pê çeka kîmyewîye şehîd bîyî

Cepheyê Metîna de zî gerîlayan şewa 23ê nîsane ra dima xoverdayîşêko xorin mojna. Fermandaranê Hemleya Şorişgêre ya Cengê Xabûrî ra Rêbar Zana (Îlhan Tokdemîr) û komêka gerîlayanê YJA-Starî û HPGyî noqtaya stratejîke ya Girê Zendûra de 11ê hezîrane ra heta 13ê hezîrane vera leşkeranê tirkan şer kerd. Nê xoverdayîşî de 6 gerîlayî şehîd bîyî. Ame tesbîtkerdene ke nînan ra 5 gerîlayî pê çeka kîmyewîye qetil bîyê.

Aris Faris de 5 gerîlayî pê çeka kîmyewîye şehîd bîyî

6-8ê gulana 2021î de warê Aris Farisî yê Avaşînî de vera hêrişanê kîmyewîyan xoverdayîş ame kerdene. Nê xoverdayîşê gerîlayan de artêşa îşxalkere vînîbîyayîşê pîlî dayî. Gerîlayan Dîyana Marîa (Dîcle Omer Ahmet), Jîne Yılmaz (Bahare Nas), Rûbar Marufî (Şervan Ozkan) û Sarya Çiya (Sarya Mahmut) binê fermandarîya Amara Cûdî (Cîhan Kapar) de bire daye ke tunel û mewzîyanê şerî de bimanê. Nê 5 gerîlayan heta peynî şer kerd. Artêşa tirke naye ser o muracayê çeka kîmyewîye kerd. 5 gerîlayî bi tesîrê çeka kîmyewîye 8ê gulane de mewzîyanê xo de şehîd bîyî.

Girê Sorî de 7 gerîlayî pê gazî şehîd bîyî

7ê temmuze de Girê Sorî de gerîlayê HPGyî Baz Gever (Firat Şahîn)o ke vernîya mewzîyanê xoverdayîşî de şer kerdêne pê çek û gazê kîmyewî şehîd bi. 3ê êlule de Girê Sorî de artêşa tirka ke pê xoverdayîşê gerîlayan nêeşkaye reyna dest eşt çeka kîmyewîye.

Nê hêrişê kîmyewî de gerîlayî Botan Ozgur (Celal Ozcan), Zinarîn Welat (Rama Şemdîn) û Delale Qamişlo (Hîva Mamo) ameyî qetilkerdene. HPGyî pê nê îfadeyan qala xoverdayîşê nê gerîlayan kerde: ''Embazanê ma Botane, Zînarîne û Delale warê xoverdayîşî yê Girê Sorî de pê xoverdayîşê xo yê destanwarî tarîxê azadîye yê şarê ma de rîpelêko newe akerd. Rayraşîyayîşê serkewtişî de sey çimeyanê tewr pîlan ê hêz û moralî yê Gerîlayanê Azadîye yê Kurdîstanî ê do bêrê vîrardene û bibê sebebê ma yê têkoşînî.''

Noqtaya stratejîke ya cepheyê Avaşînî Girê Sorî de gerîlayan bi mengan xo ver da. Artêşa îşxalkere 15ê êlula 2021î de nê warî de bi hawayêkê giranî çeka kîmyewîye şuxilnaye. Netîceya ê gazanê jehrînan de hîrê gerîlayê azadîye Argeş Botan (Hasan Emcur), Ozgure Bagok (Fatma Balica) û Serhildan Mordem (Serdar Dînç) ameyî qetilkerdene.

Werxelê de 10 gerîlayî bîyî hedefê çekanê qedexekerdeyan

Gerîlayan çarçewa Hemleya Şorişgêre ya Bazanê Zagrosî de xoverdayîşê destanan nuştî. Bi taybetî hamnan de waranê Girê Sor û Werxelê de gerîlayan vera artêşa ke wayîra teknolojîya tewr moderne ya, xoverdayîşêko bêeman kerd. Artêşa tirke pê tîmanê hareketînan, mewzîyan û tunelanê şerî yê gerîlayan nêeşkaye û pê teyata û helîkopteran çar mengan hêrişê bêmabênî kerdî.

Artêşa îşxalkere hêrişanê hewayî ra zî netîce nêgirewte û nareye pê helîkopteran bi tonan teqaberê TNTyî û ê bînî ardî war û mewzîyanê gerîlayan de teqnayî. La rixmê nê metodî zî artêşa îşxalkere nêeşkaye gerîlayan mewzîyan ra dûrî bifînê. Naye ser o artêşa îşxalkere muracatê çekanê kîmyewîyan ê qedexekerdeyan kerd. Dima ke gerîlayan nê hêrişê kîmyewî zî pûç kerdî menga êlule ra pey artêşa tirke bombardumanêko kîmyewî yo newe ceribna.

Goreyê çimeyanê HPGyî netîceya nê bombardumananê kîmyewîyan de ke wexto ke teqayêne texrîbato pîl kerdêne û gandarî binî ra îmha kerdêne 5ê teşrîna verêne ya 2021î de 5 gerîlayî cepheyê Werxelê de şehîd bîyî. Nameyê nê gerîlayan wina yê: Cumalî Çorum (Zeynel Erocagi), Çavrê Kamuran (Suheyla Kirmizitaş), Dilvîne Dalaho (Rêzane Deraferîn), Amara Cûdî (Rojîne Ramazan) û Mahîr Kop (Çetîn Çelîk).

Artêşa îşxalkere 10ê teşrîna verêne de zî bi hawayêkê giranî pê çekanê kîmyewîyan warê Werxelê da bombayan ver. Ê xoverdayîşê bi serkêşîya fermandarê Hemleya Şorişgêre ya Bazanê Zagrosî Cumalî Çorumî de nê gerîlayî pê çekanê kîmyewîyan ameyî qetilkerdene; Hêvîdare Tirbespiyê (Ala Xidir Xelef), Yerîvan Kato (Makbule Kiliç), Binevşe Çiya (Sema Sumbul), Adil Gabar (Yakup Kizilaslan) û Têkoşer Zagros (Erhan Şahîn).

Siba: Dinya qîrayîşê 'Hêrişanê kîmyewîyan vindarnê' yê kurdan nêeşnawit...