Rayberê Şarê Kurdî Abdullah Ocalan Pawitişê Atîna de eşkera û zelal qala her çîyî kerdêne. Ocalanî vatêne qerarê vejîyayîşê Ewropa de bitaybetî tesîrê Wezîrê Resî yê Yunanîstanî yo verên PASOK û parlementer Kostas Baduvasî est û wina dewam kerdêne: ''6ê Teşrîna Verên a1998î de pêvînayîşo ke Ayfere Kaya zî şahîdîya ci kerde Baduvasî vist vîrî ke Parlamentoya Yunanîstanî, 109  parlamenterî mi dawetê Yunanistanî kenê, hukmatê înan zî paştî dano şîyayîşê mi û  soz da ke o zî bi xo do agêro welatê xo û mi meydanê teyarayan de verwazî bikero.

Na çarçew ede 9ê Teşrîna Verên a 1998î de  ma Meydanê Teyarayan ê Şami ra bi teyaraya raybanan a Sûrîye ver bi Atîna kewtî rayîr. Gama ke teyara Atîna de ameye war Baduvaso ke soz dabi binate de çînêbi, qet nêesa. Herinda ey de Savvas Kalenteridis û selahîyetdarê îstîxbaratî  yo payeberz Stavrakakis vejîyayî verê ma. Hela ka meydanê teyarayan de ma ameyêne pawitene. Ayfere Kaya ya ke cayê mi de bî bi desan rey Bauvasî rê telefon kerd. Baduvas,vatêne 'Çîyo ke ez bikerî çîn o. Ez ha serekwezîrîye dir pêvînayîş de ya' û nêameyêne…

Dima ra ame fehmkerdene ke vejîyayîşê mi yê Sûrîye kaşkerdişê dama Yunanîstanî de şexsê Baduvasî de rolê Ingiltere bîyo. Dawetê Baduvasî yo ke hetê Ingiltere ra ameyo weyekerdene, sey gama verêne ya komployê Amerîka- Ingiltere- Simitisî kewtebî dewre. Na hele ra tepîya ez şirê ça do teqîp û kontrolê NATO û Amerîka dewam bikerdêne.

Eynî roje bi qesawet û tehdîtê pîlî mi rê ame vatene ke ez ganî heta saete 5 ûja ra vejî. Ma  5-6 saetî ûca ameyî pawitene. Temsîlkarê ma yê Rûsya Mahîr Welat (Numan Uçar) bi rayîrê faksî dawename şawit.  Lezabez bi teyaraya taybete ke hetê Wezîrîya Karanê Teberî ya Yunanî ra ameye amadekerdene eynî roje ez ameya berdene bi Moskova.''

Rayberê Şarê Kurdî Abdullah Ocalan gama ke Moskova de ame war înanê ke o verwazî kerdî ra yew zî hetkarê serekê  Dûma ke baskê cêrîn ê Parlamentoyê Rûsya yê o demî Vladimir Jirinovski bi. Abdullah Ocalano ke şewa verêne keyeyê Jirinovskîyî de bi meyman, ûja ra ame berdene keyeyê koyî.  Nê mabên de bextwaştişê sîyasîyî ameye kerdene. La sey Yunanîstanî tîya zî  Heqê bextwaştişê sîyasî yê Abdullah Ocalanî yo ke goreyê huqûqê mîyanneteweyî heqê ci yo bingeyên o do nêameyêne caardene.

Xeta Moskova-Anqara de bazarîyê leyminî

Roja dîyine ya ke Abdullah Ocalan şi Rûsya Serekwezîrê Anqara Mesut Yilmazî  persê rojanmegeran ê ''Apo şîyo ça?'' wina cewab kerdêne: ''Îxtîmalo ke şîyo Rûsya, Ermenîstan û Lubnan.  La bawerîya mi çîn a ke Rûsya qebul bikero.'' Eslê xo de 11ê teşrîna verêne ra derheqê  rayîro ke  Ocalan ti ra ravêreno de zanayîşê îstîxbaratî dîyayene Tirkîya la seba ke hema pê beranê qefilnayene de bazarîye leyminî nêqedîyayî bî, Tirkîya nêwşatene ke bale binaco Rûsya ser.

Selahîyetdaranê dewleta tirke 19ê teşrîna verêne de da pêhesnayene ke Abdullah Ocalan Rûsya de yo. Ê rojan de hetkarê Musteşarî yê Wezîrîya Karanê Teberî yê Tirkî Mehmet Alî Îrtemçelîk şi Moskova. Irtemçelkî mekbubê Mesut Yilmazî da Serekê Rûsya Yevgenî Primakovî. Mektub de vera îadekerdişê Ocalanî bazarîye ekonomî estbî. Wexto ke nê bazarîyan dewam kerdêne Ocalanî  Dûma ke baskê cêrîn ê Parlamentoyê Rûsya yo rê muracatê bextwaştişê sîyasîyî kerd.

Badê cewabdayişê mektubî yê Rûsya Yilmazî vatêne ma ''Ma cewbêko Rûsya ra pawitene girewt.''Eynî roje Serekê  Fermandarîya Pêroyî yê Tirkî Orgeneral Huseyîn Kivrikoglu kayê leyminî ke ameyî kaykerdene pê nê vatişan îtîraf kerdêne: ''Eke Moskova aqil a paştî nêdana Ocalanî. Ma ûca karê 10 mîyaran kenê. Ewropa rîyê krîzê ekonîmî ra ûca ra Rûsya ra remena la ma karî rê dewam kenê. Ma wazenê ke wa nê karî aver şirê.''

Amerîka ra eşkerayîya 'Qet welatêk'î

4ê kanûn a 1998î de vera 1î bi reyanê 298î  muracatê bextwaştişê sîyasîyî yê Abdullah Ocalanî ame qebulkerdene. La narey vera Moskova hêzê bînî yê mîyanneteweyî kewtî dewre. 5ê kanûn a 1998î de Vervatoxê Wezîrîya Karanê Teberî yê Amerîka persê rojnamegeran wina cewab kerdêne. ''Wezîrê Karanê Teberî Madeleine Albrightî PKK sey rêxistina terorî îlan kerdo. Ma Rûsya ra waşt ke wa Ocalanî ya cade îade bikerî ya zî tebersînor bikerê. Ganî qet welatêk zî bextwaştişê sîyasîyî nêdo terorîstêk. Ez reyna vana qet welatêk.''

Rengê karî bewlî bibî. Hinî îdareyê Washingtonî dewre de bi. Xora Ocalanî 1ê teşrîna verên a 1998î de qiseykerdişê xo yê MED TVyî de bi nê vatişan vat bi ke 9ê Teşrîna Verêne tesaduf nîyo: ''Çîyêko eceb o bînî esto;  belka semedê amerîkayîjan muhîm o. 9ê Teşrîna Verêne roja mirênayîşê Che Guevara ya. Vîjnayîşê eynî roje baldar o. Ez texmîn kena wazenê ma biney bi vîrê ê şorişgêre pîlî bibestê pê.''

Înanê ke Sovyetî rote ra hurmet nêpawitêne

Maceraya Rûsya do 33 rojî dewam bikerdêne. Rayberê Şarê Kurdî  dima ra Pawitişê Atîna de Rûsya o senî tebersînor kerd û rîyî ser verda verda pê nê vatişan qala ci kerdêne: ''Primakovî qerarê Dûma qebul nêkerd. Naye de beno ke rolê krizê ekonomî yê Rûsya bibo. Serekwezîr Primakov û Serek Yeltsîn xayînanê muhîman ê sosyalîzmê realî ra bî. Înanê ke sîstemê Soveytî rote ra hurmetê erjanê azadîye pawitiş xo xapînayîş bi. Înan waştêne ke mi Tirkîya ser ra bişawê Qibris. No operasyonê îmha bi mi qebul nêkerd.''