Ver bi 25ê Teşrîna Peyêne Roja Paştdayîş û Têkoşînê Vera Şîdetê Serê Cinîyan a Mîyanneteweyîye kuçeyê Kurdîstanî ke sey waranê xoverdayîşî yê de  rixmê heme hêrişê dewlete, vengê cinî, cuye azadîye berz beno ke do dîktatorîye birijno.

Sey heme dîktatoran hukmatê dîktatorîye yê Rafael Leonidas Trujilloyî zî şarî rê zext, zulm kerdêne û mirênayêne. Kam/e ke vera ci bivejîyayêne mirênayêne ya da eştêne zîndanan. Hîrê wayan ê bi nameyê Patria Mercedes, Minerva Argentina û Maria Terasa û mêrdayanê înan vera dîktatorîye rêxistinêka mîyane naye ro. Nê cinîyê ke vera dîktatorîye biyî sembolê demokrasî û têkoşînî, xeylêk rey ameyî tepiştene û dest nîya mulkê înan ser. 25ê Teşrîna Peyên a 1960î de wayê Mirabelî hetê leşkeran ra raştê tecawuzî ameyî û ameyî qetilkerdene. No qetlîam sey qezaya trafîkî ame ramotene la hêrsê şarî vera Cumhurîyetê Domînîkî zêdîya û qetilkerdişê wayanê Mirabelî ra dima serrêke cuwa pey hukmatê dîktatorîye yê Refeal Trujilloyî zî rijîya.

Serra 1981 de Amerîkaya Latîne de cinîyan 25ê Teşrîna Peyêne sey Roja Paştdayîş û Têkoşînê Vera Şîdetê Serê Cinîyan a Mîyanneteweyîye îlan kerd û Serra 1999î de hetê Yewîya Mîletan ra zî ame qebûlkerdene. Têkoşînê wayanê Mirabelan heme cinîyan ê dinya rê bi ûmid.

Her serre seraserê dinya de cinîyî na roje de semedê cuya azade vejîyenê meydanan. Têkoşînê cinîyan xora bi na roje sînordar nîyo. Bi seserrran o ke cinîyî seba ke heqanê xo yê tewr bingeyênan bifînî dest xover danê. Nê serranê peyênan de vera zext û qirkerdişê camêrd-dewlete têkoşînê cinîyan pîlêr bi ke têgêrayîşê cinîyan ê kurdan serkêşîye ci keno. Cinîyî bi çalakîyanê cîya cîyayan xo pawenê û game bi game heqanê xo fînenê dest. Sey qirkerdiş û hêrişanê vera cinîyan têkoşînê cinîyan zî pêde pêde pîlêr beno.

Kurdîstan de  hema hema her roje cinîyî yenê destbendkerdene û tepiştene. Bi zext û zîndanan yeno waştene ke cinîyî bitersê û rolê koletîye ke sîtemê ci rê fasilnayo bîyarê ca la cinîyî ters nêsarisnenê û vera sîstemê nêrî de milê xo çewt nêkenê. Nê rojanê ke Kurdîstan û Tirkîya de çew/e nêeftano twîttêk bierzo, kuçeyê bajaranê Kurdîstanî bi qîrayîşê cinî, cuye azadîye zimenî. Hetêkî ra cinîyî ver bi 25ê Teşrîna Peyêne çalakîyanê vera şîdetî  û operasyonanê qirkerdişê sîyasîyî kenê hetê bînî ra dayîkê haştîye yê zervêşayeyî zî seba ke verê şêrê mîyanê kurdan bîgerê bi çalakîyan laçikanê xo yê sipîyan ê ke Kurdîstan de sembolê haştîye erzenê war û semedê yewîya neteweyîye qîrenê.

Kilaya adirê serewedaritişî ke cinîyan ê xoverdayoxan fînaya ta, çend şino berz bena û roşnayî vila kena. Ewro heme waranê xoverdayîşî de cinîyê ke pîskeneyê kilaya azadîye kirişenê, tîlîlîyan ancenê  û vanê cinî, cuye azadîye. No vatiş hinda bîyo sey ruhê xoverdayîşî û mîjdanê azadîye. Na slogana ke çîqê kilaya ci her hetî ra vila benê hînî unîversal a. Her hetê dinya de çalakîyanê cinîyan de slogana cinî cuye azadîye yena eştene. Kurdkî û bi ziwananê ciya cîyayan cinîyî qîrenê û vanê sey dîktarorîya Trujilloyî do heme dîktatorîye bêrê rijnayene.