Merdimê ke bi averşîyayîşê teknîkî û rîyê xirsê xo ra xo xoza ra qerifna û bêhîskerdiş, zuwa ciwîya hayî ci vînîkerdişanê ci ra çînêbî. Binê nameyê bajarîbîyayîşî de dewî ameyî vengkerdene û bajarî çend bîyî de hende tênatîye bîye zêde. Teknîko ke semedê xizmetê merdimîye esto merdimîye vistê binê xizmetê xo û sere de azadîye pêdê pêdê heme erjê merdimîye destê ci ra girewtî. Merdimî bîyî tunedî, parsêk û dest wişk. Parekerdiş û dostîye vîra şîyî.  Çende îmkanê merdiman girdî bîyî cuya înan hende tenge bîye. Merdimî çend bîyî mird hende  bîyî çimvêşan û kerd pêser. Pêserkerdişî ra cuyayîşî rê wext nêmend, cuye û xîyalê xo peyser eştî. La nêzanayêne cuye hele de ya û hele na hel a. Merdimê ke pê tuşanê klavyê wîyenê û bermenê  rindîya cuye ra kewtî dûrî û xo vînî kerd.

İnkey nê rojanê Korona de seba ke ma mecburê ke hucreyanê xo de bimanê cuyeya ma verê çimanê ma ra sey sehneyêkê fîlmî ravêrêna. Teber de wisar o. Vilikûvûm akerdo. Vilêkanê çîlsûran, çeqer, mor û heme ranganê bînan xoza xemilnaya. Şilîyî varena, herre ra boya bêhempa bena berz. Hewayê wisarî a boye heta keyeyanê ma ano. Xoza xo kena newe, dar û birrî newe ra benê ganî. Darî pind kenê a der û dor benê zergûn. Têrûtûr wilwilnenê, owkê dereyan xuşenê û azmîn beriqyeno. Çew hesret hewes keno ke biewno teberî ra.

Merdimê ke qetilkarê cuya xo yê  çirey hende destpanayîş nêkewtbi vîrê înan. Mesafeyo sosyal xora rewna ra ma de estbi la ma ferq nêkerdêne. Inkey seba ke ma ra yeno vatene ke ma gereka heskerdeyanê xo ra dûrî vinderê ganê ma dejeno. Coka ma inkey pê ax û wax  vanê werîkna û xo ra wîna persenê; tewr peynî de  ez key binê şîlîye de pa waştîya/ê xo bikeyf bîya hîye. Key ma mendê çimanê yewbînan ra û bêqalkerdiş heskerdişê xo ard ziwan. Key ma destê yewbînan pît tepiştî û girayê dereyî goştarî kerdî. Key  ma sereyê xo nayî zanîyanê yewbînan ser o û pîya şîîrî wendî. Tewr peynî de  key ez pîya bi embazanê xo binê virisnîya darêke de qeldîyaya ra û menda azmînî ra. Key ez virar şîya dadî û babîyê xo ra û mi înan rê vat ez şima ra zaf hes kena, hol aya ke şima estê. Key mi pîrikanê xo ra hîkayeyê înan goştarî kerdî û cirananê xo dir çay şimit. Key mi hetkarîye kerd û kesêk/ kerd/e şay. Key mi qijan dir kay kerd û heywanî hes kerdî. Key ez koyan ra vaz daya, vaşî ser o kewta, nişta yeneyan ra, bikeyf qîraya, zerîya xo ra bermaya. Key mi heskerdiş û çî-mî yê  xo ê bînan dir pare kerd key?

Korona ke pêroyîya merdimîye girewto binê tesîrê xo qet zengîn û neçar zî nêpersena. Înanê ke semedê karê xo xoza çîn kerdêne înan zî dîye ke ê se kenê wa bikerê bêhêz ê. Vera janî bêçare yê nêeşenê xo bipawê. Seba ke tayînan hewceyê xo ra zafêr waşt dinya bîye leymin û nêweşîye winayenê vejîyayî. Ma pê Korona reyna dîye ke ma hewce yê Xoza, heskerdiş û parekerdişî yê. Merdimîye ke zaf şerî, nêweşîye û felaketî dîye do Korona zî xo ya dima biverdo la nêweşîya jane ya  tewr gird bêhîsîye ya. Ganî  sere de pê heskerdiş û parekerdiş no jan bêro wedartene ke komel bireso cuyeya weşîye û herinda xemgînîye şayîye bîgero.