1ê gulana 2003î de Çewlîg de saete 03:27î de erdlerzêk qewimîya. Netîceya erdlerzî de tewr tay 126 kesî merdî, 520 kesî zî birîndar bîyî xeylêk keyeyî zî rijîyayî.

Nê erdlerzê pîlî de peygoşîya dewlete vejîyaye werte. Goreyê raporanê erdlerzê Çewlîgî şarê Çewlîgî rê ke bi rojan teber de mendî xeymê qîmkerde nêameyî vilakerdene û zafê hetkarîyî terefgîranê îqtîdarî rê bi hawayêkê nimitkeyî ameyî dayene.

Hetkarîyê ke teberî ra erşawîyayî sey erdlerzê Xarpêtî yê emserî de dekewtişê Çewlîgî de hetê hêzanê dewlete ra ameyî astengkerdene. Wextê erdlerzî de seba ke wesayîtanê bi plakaya 21î rê destûr nêame dayene ke debikewê şaristanî hetkarîya Şaredarîya Amedî rayîrê Xarpêtî ra 9 saetan ra dima resaye Çewlîg.

Reyna roja diyîne ya erdlerzî de (2ê gulana 2013î) şarê Çewlîgî seba ke hetkarîya qîme ya xeymeyan nêameyêne kerdene vera walîtîye nêrazîbîyayîşê xo mojna û tîmê taybetî yê polîsan hêrişê şarî kerd, çekî xebitnayî, ver bi şarî wesayîtî berdî. Dima zî seba ke mudaxeleyê şarî bikerê polîsan cayê serebûtî teslîmê leşkeran kerd. Netîceya hêrişî de 10 kesî birîndar bîyî û polîsan keyeyê hukmatî de kesêkî rê îşkence kerd. Nê kesî dima pê raporê weşîye gerrayê nê polîsan zî kerd. La nê polîsan keyeyê nê kesî de qisey kerd û ci rê gef wend ke gerrayê xo tepîya bigêro.

Erdlerz de keyeyanê polîsan, wekîlanê AKPyî û terefgîranê îqtîdarî rê bi nimitkî xeymeyî ameyî dayene û şarê Çewlîgî yê mexdûrê erdlerzî vera na cîyakerîye nêrazîbîyayîşê xo mojna.

Seba ke Şaredarê Çewlîgî yê ê çaxî DEHAPî ra bi dewlete erdlerzê Çewlîgî de peygoşî, cîyakerîyêka pîle kerde. Wextê erdlerzî de dezgehanê dewleta tirke Şaredarê Çewlîgî reyde têkilîye nênaye ro û Serwezîrê ê çaxî Erdogan wexto ke ame Çewlîg tede pêvînayîşêk nêkerd.

Balkêş o ke tîmê taybetî yê polîsan ê ke seba şerî yenê perwerdekerdene erdlerzê Çewlîgî de ameyî wezîfedarkerdene. Reyna selahîydaranê dewlete derheqê erdlerzê Çewlîgî de zanayîşêk nêda ke na zî cîyakerîya dewleta tirke ya vera şarê kurdî mojnena.

Ê çaxî semedê şerê Iraqî ra Sîlopî de dewlete bi des hezaran xeymeyî depoyan de ca kerdî ke mabênê Sîlopî û Çewlîg de 8-9 saetî estî. La dewleta tirke nê xeymeyî şarî ra vila nêkerdî û şarê Çewlîgî mengêke teber de mend.

Masaya Krîzî ya Dewlete ya seba erdlerzê Çewlîgî zî xerîban ra ameyêne meydan û Şaredarîya Çewlîgî ya DEHAPî bi zanayîşî teberê na masa de vera dîyaye.