Hemserekê Konseya Rayberdişî ya KCKyî Cemîl Bayikî derheqê Hemleya 'Tecrîd, Faşîzm, Îşxalî rê Bes o, Wext Wextê Azadîye yo' ya KCKyî de ANFyî reyde qisey kerd.

Qiseykerdişê Bayikî wina yo:

''Çarçewa na hemle de hedefê ma yo tewr pîl caardişê azadîya Rayber Apoyî yo. Heta ke Rayber Apo azad nêbo qet yew têkoşîn ser nêkeweno. Êyê ke wayîrê Rayberîya xo vejîyenê do ser bikewê.

Rayber Apoyî a hele ra nata ke fikrê azadkerdişê kurdan kewto zerrîya ci, tim fikirîya ke gelo têkoşîn senî do ser bikewo. Ey hêverî xîret kerd ke meseleya kurdan fam bikero û rayîranê çareserîye bivîno. Rayber Apoyî tim bi hawayêkê cîdîyî û bi berpirsîyarî nêzdîyê meseleyan bi. Pêro bingeyê serkewtişanê Rayberîye de na raştîye esta. Wayîrvejîyayîşê Rayberîye hem berpirsîyarîya sîyasî û komelkîye hem zî mecbûrîyeto exlaqî û wijdanî yo.

Kurdî seteret de bîyî

Kurdan seserra 20. de dejê tewr pîlêrî dîyî. Serranê 1970an de her parçeyê Kurdîstanî de bi polîtîkaya înkarî qirkerdişê pîlî ameyêne kerdene. Nê serran de kurdî seteret de bîyî û Rayber Apo zî nê serran de vejîya sehneyê tarîxî. Rayber Apoyî wisarê 1973î de embazanê xo rê vatbi ke Kurdîstan kolonî ya û ganî Kurdîstan û kurdî destê kolonyalîstan ra bêrê xelisnayene.

Hêzo tewr pîlêr ê kurdan

Têkoşînê Rayber Apoyî Kurdîstan newe ra aferna. Têkoşînê gerîlayan û serewedaritişan şorişo demokratîk ard ca. Kurdî bîyî şaro şorişgêr ê Rojhelatê Mîyanênî. Şorişê Azadîya Kurdîstanî yo ke xeta azadîya cinîyan de aver şîyo, ewro pêro dinya de şinasîyeno. Ma seba naye deyndarê Rayber Apoyî yê. Raştîya kurdan a ke Rayber Apoyî afernaye, nika hêzo tewr pîlêr ê kurdan o. Ewro îtîbarê kurdan her wextî ra zêdêr o.

Deynê azadkerdişê Rayberîye

Eke ma xo sey demokrat, azadîperwer, wayîrê wijdanî qebul kenê ganî ma Rayber Apo azad bikerê. No Rayberîye rê deynê ma yo. Ganî ma azadîya Rayberîye hedef bikerê. Nêbo vatişê ma tesîrê xo vînî kenê. Eke tesîrê ma vînî bo ma do qels bibê.

Azadbîyayîşê Rayber Apoyî azadbîyayîşê kurdan o, demokratîkbîyayîşê Tirkîya û Rojhelatê Mîyanênî yo. Têkoşînê seba azadîya Rayberîye bikero ke ma çarçewa hemle de biresê hedefanê xo. Îradeyê şaran tim hetê rayberêk/e yan zî têgêrayîşêkî ra yenê temsîlkerdene. Eke Rayberîye bêra qebulkerdene hînî waştiş û estbîyayîşê ê şaran zî yenê qebulkerdene. Eke vera Rayberîya şarêkî dişmenîye yena kerdene o çax aslê xo de vera ê şarî dişmenîye yena kerdene.

Dewleta tirke vera Rayberîye dişmenîya winasêne kena ke dinya de qet yew dewlete yan zî welat çîyo winasên nêkerd. Çunke Rayber Apoyî planê înan ê qirkerdişê kurdan pûç kerdî. Rayber Apoyî kurdî rêxistin kerdî û berdî mîyanê têkoşînî. Coka vera Rayber Apoyî tecrîd, îşkence û teda kenê. Ê wazenê ke qesasê averşîyayîşê kurdan bigêrê.

Heta ke Ocalan azad nêbo kurdî zî azad nêbenê

Heta ke Rayber Apo azad nêbo ne kurdî azad benê ne zî Tirkîya bena demokratîk. Heta ke Rayber Apo azad nêbo meseleya kurdan zî çareser nêbena. Êyê ke eqsê naye îdîa kenê mîyanê xeflet û şaşîyêka pîle de yê. Îsbatê vurîyayîşê hîşmendîya meseleya kurdan bi azadîya Rayber Apoyî beno. Azadîya Ocalanî mefteyê çareserî yo. Coka ganî têkoşînê seba Rayber Apoyî û têkoşînê azadîya kurdan pîya bêrê kerdene.

Rayber Apo zaneno ke nê wirdî pabesteyê yewbînan ê. Coka ard ziwan ke azadîya ey zî pabesteyê têkoşînê teberî ya. Dewleta tirke qestî ra nê wird raştî yewbînan ra kena cîya. Têkoşîno ke azadîya Rayber Apoyî hedef nêkeno, hînî nêbeno parçeyê Têgêrayîşê Azadîye yê Kurdîstanî. Ma hem azadîya Rayber Apoyî sey hedefê pîlî vînenê hem zî kenê ke têkoşînê azadîye yê kurdan xeta raşte ser o bêro kerdene.

Waştişê wedaritişê tecrîdî qîm nêkeno

Netîceya têkoşînê ma de ge ge tecrîdê vera Rayberîye ame sistkerdene la hîşmendîya meseleya kurdan qet nêvurîyaye. Xora nê sistkerdişî zî hetê dewlete ra çarçewa şerê taybetî de ameyî kerdene ke komel zaf bilîyê ci nêbo.

Eke ma wazenê faşîzm birijnê, demokrasî awan bikerê û meseleya kurdan çareser bikerê ganî ma bizanê ke hînî wedaritişê tecrîdî qîm nêkeno. Xora ma vera tecrîdî xeylêk têkoşîn kerd. Xoverdayoxanê zîndanan, Mayanê laçiksipîyan, kurdan û hêzanê demokrasî eşkera kerd ke sîstemê Îmraliyî meşrû nîyo.CPTyî sîstemê Îmraliyî sey sîstemê îşkence û tecrîdî pênase kerd. Sîstemê Îmraliyî rijîya. Coka hînî waştişê wedaritişê tecrîdî metodêkê têkoşînî nîyo. Hînî ganî ma seba azadîya Rayber Apoyî têkoşîn bikerê. No têkoşîn do Tirkîya, Kurdîstan û Rojhelatê Mîyanênî bivisno kelecanî û beşanê komelî tewrê têkoşînî bikero.

Rayber Apoyî zî waştêne ke wina bo. Rayber Apoyî wexto ke vatêne 'Seba mi nê seba xo têkoşîn bikerê' qestê ci no bi. Çunke azadîya Rayber Apoyî azadîya kurdan a. Ganî na torre bêra dîyene û bi nê hawayî têkoşîn bêro berzkerdene.

Serê dinya de yew mîsalê sey wayîrvejîyayîşê Rayber Apoyî çin o. Wextê Komployê 9ê Teşrîna Verêne de û 15ê Sibate de kurdî bi hawayêkê bêhempayî wayîrê Rayber Apoyî vejîyayî. Şehîdanê ma dormeyê Rayberîye de barîkato adirin viraşt. Ez nê şehîdanê ke bi şîarê 'Şima nêeşkenê tîja ma tarî bikerê' xo ver da, bi hûrmet û minetî yad kena û gazîyan rê zî selam kena.

Cinî, ciwan, dadîyê ma bi perwerîya pîle 22 serran wayîrê Rayber Apoyî vejîyayî. Dostê kurdan û hêzê demokrasî zî bi nê hawayî wayîrê ey vejîyayî. Roşnvîr, nuştox, entelektuel û zanistan seba azadîya Rayber Apoyî xîret kerd. Sendîkayanê Îngilîstanî seba azadîya Rayber Apoyî kampanyayî kerdî. Hînî meseleya azadîya Rayber Apoyî têna meseleya kurdan nê meseleya pêro dinya ya.

Şertê azadîye virazîyayî

Ganî safhaya newîye ya wayîrvejîyayîşê Rayberîye caardişê azadîya ey bo. Seba naye şertê meqbulî virazîyayî. Têkoşînê 22 serran îmkanî zêdînayî. Fikr û tewirê Rayber Apoyî zî hêz danê ma. Qet yew zîndan nêeşkeno vera nê hêzî vindero. Felsefe, îdeolojî û paradîgmaya Rayber Apoyî hêzo tewr pîl ê merdimîye aferna. Têkoşînê seba azadîya Rayberîye vayê nê hêzî reyde teqez do ser bikewo.

Hînî kurdî esaretê Rayberîye rê tehamul nêkenê. Kurdî zanenê ke heta ke Rayber Apo zîndan de bimano ê zî tim do hedefê qirkerdiş û zîndanan de bimanê. Nê 22 serran de kurdan hol fam kerd ke azadîya înan pabesteyê azadîya Rayber Apoyî ya. Coka pêro kurdî, dostê kurdî û hêzê demokrasî pîya tewrê Hemleya ma benê û bi nê hawayî têkoşînê seba azadîya Rayber Apoyî yeno pîlkerdene.

Wext Wextê Azadkerdişî yo

Nika wext wextê azadkerdişê Rayber Apoyî yo. Ez wazena bi hawayêkê pîtî vaja ke heta ke ma azadîya Rayber Apoyî û azadîya kurdan bîyarê ca têkoşînê xo do dewam bikerê. Sere de cinî û ciwanan ez venga pêro kurdan, dostan û hêzanê demokrasî dana ke seba azadîya xo nê têkoşînî her ca de berz bikerê.''