Gama ke cinawir û çeqelanê çimvêşanan eşt Başûrê Kurdîstanî ser û her kes kewtbi derdê ganê xo gerîlayanê azadîyê koyan ra bi konvoyanê wesayîtan  verê xo dabi Mexmûr, Kerkuk û Hewlerî. Şarî bi slogan û tîlîlîyan qehremanê xo silam kerdêne û şayî ra erd û azmîn zimayêne. Na hela bêhempa mezgê şarê kurdî de ya ke do çirey tira mevejîyo. Kurdê ke teberî ra ewnîyayênê nê dîmanan ra kêfî ra hesire kerdêne war. Têna kurdan nê heme dinya vînayêne ke kurdî bêwahar nîyê. Pê paştê înan de  têgêrayîşê azadîye yê Kurdîstanî esto. Gerîlayanê ke verê çetayan girewt, têna şar û erdê Kurdîstanî nê anor û şerefê partîyanê kurdan zî xelisna.

Xora verê hêrişê çeteyan têgêrayîşê azadîye ke no tehluke dî, partîyanê kurdan ê Başûrî  rê vatbi  ê wazenê semedê pawitişî gerîlayan bişawê Şingal, Kerkuk û Mexmûr la no waştişê înan nêame qebûlkerdene. Eke verê hêrişan gerîlayan xo tîya ca bikerdêne, qirkerdişê Şingalî nêqewimîyayêne. Hukmatê Başûrî  ke vatêne ''ma tîya yê, gerîlayan rê hewce çîn o'' hela tenge de tanêameyî biremî. Şarê kurdî no remayîş zî xo vîra nêkerd.

Înanê ke hela tenge de gerîlayan ra hetkarî waşt û badê serkewtişê vera DAÎŞî gerîlayan rê spas kerd, ewro qîrenê vanê ''wa gerîlayî erdê ma rê vejî'' Xora ê mûsaye yê. Xo dîyo nêdîyo binê nameyê welatperîwerîye de keyeperîye kenê. Goreyê înan erdê Başûrî ê şarê kurdî  nê mulkê xusîsî yê keyeyê înan o. Hetêkî ra herra bimbareke ya Kurdîstanî fînenê xizmetê dişmenê kurdan û hetê bînî ra gerîlayê azadîyê ke çar leteyanê welatî ra ameyî têhet û semedê pawitişê erdê xo ganê xo danê, înan sey ''îşxalker'' hesibnenê.

Êyê ke hema vizêr vatêne ''heta ke ez weşbî, ez do destûrê şerê mabênê kurdan nêdê‘'' ewro pê tanqan topan erzeno qicanê kurdan ser. Waranê gerîlayan de cakerdişê hêzê leşkerî amadekarîya şerî ya. Verî  Zînê Wêrte de dest pêkerd û game bi game heta dorgirewtişê Garê ame. Gerîlayî bi des serran o ke nê waran de yê. Ê koyî pê xoverdayîşê gerîlayan yenê naskerdene. Heftanîn de vera îşxalkeran tarîx yeno nuştene. Herra Başûrî ke pê gonîya gerîlayan ameya awedayene açarnaya qerargahê leşkerî yê tirkan. Başûr ho pê destê hemkarîye hêdî hêdî yeno îşxalkerdene. Inkey zî qesra ra xora wirişt vano wa qijê koyan erdê xo ra vejî. Şima kamî erdê kamî ra vejenê! Her vinceyê a herre de gonîya şehîdan, areqê çareyê gerîlayan esto.

Têgêrayîşê azadîye seba ke şer mevejîyo veng da û vat: ''Ma vera dişmenî tim şer kenê û şerî ra nêtersenê la şerê mabênê kurdan nêwezanê. Ma wazenê ke meseleyanê xo bi dîyalogo çareser bikerê.'' Bi nê vengdayîşê werêameyîşî, şarbêkê awe bîye adirê zerrîya kurdan ro la vera naye cewabo sey despêkerdişê şerî  ame dayene û adir reyna ame girkerdene. Xora eke mîyinê ma keyeyê ma ra sist nêbîyêne hende bedelê pîlî zî nêameyêne dayene. Eke kurdî pîya têbigêrayêne, rewna eşkayêne ser bikewê. Yewîya neteweyîye  xeyalê kurdan o la rîyê mîyinê sistî ra nîno caardene. Eke raşta senî ke vano, şerê mabênê kurdan herem kerdo, ewro eşkera gune keno. No guneyo gird ne hûma ne zî şarê kurdî do ef bikero.