Seba têkoşînê azadîye her Newroze manadar a. Labelê Newroza 2006î zaf cîya bîye. Serra 2006î de şar bi şîarê 'Wa sîstemê Îmraliyî bêro rijnayene' seba şermezarkerdişê 15ê Sibate vejîya meydanan. Rixmo ke xeylêk şaristanan de ameybî qedexekerdene bi mîlyonana merdiman şayîyan de persê 'Şima Abdullah Ocalan sey îradeyê xo yê sîyasîyî qebul kenê?' rê sey 'heya' cewab da.

Endamê Konseya Rayberdişî ya KCKyî Xebat Andokî karakterê Newroza 2006î û tewirê şarî ANFyî rê nuşt.

Nuşteyê Andokî wina yo:

''Dima ke Sovyetî rijîyayî hêzanê hegemonîkan serkêşîya Amerîka de seba newe ra dîzaynê Rojhelatê Mîyanênî dest pê xîretan kerd. Na çarçewe de Rayber Apo bi Komployêkê Mîyanneteweyî teslîmê Tirkîya ame kerdene. Hêrişê 11ê Êlule, operasyonê vera Afganîstan û Iraqî bêguman çarçewa projeyê newe ra dîzaynkerdişî de bîyî. Nînan tesîrê Têgêrayîşê Azadîye û dewleta tirke zî kerd.

Rayber Apoyî seba ûçkerdişê komployî û çareserîya meseleya kurdan xîret kerdêne. Nê xîretan wextêk îmha û tasfîyeya Têgêrayîşê Azadîye vindarnayî. Partîya Erdoganî AKPyî dima ke 2002 de bi îqtîdar nê xîretê Rayber Apoyî bêcewab verdayî. AKPyî bi paştdayîşê hêzanê hegemonîkan û PDKyî tasfîyeya têgêrayîşê azadîye xo rê kerd esas. Hemleya 1ê Hezîrana 2004î nê bingeyî ser o dîyaye destpêkerdene. AKPyî vera têgêrayîşê ma şero gemarin giranêr kerd. Xora Heyetê Asayîşê Milîyî (MGK) 23ê tebaxa 2005î de şero gemarin vist rojdemê xo û konseptê şerê topyekûnî da dest pêkerdene.

Tesîrê çalakîya Vîyane Soran

Vera nê konseptî têgêrayîşê ma bi 'metod û taktîkê şerê nêmgiranî' têgêra, hetê sîyasî ra zî giranîye daye kampanyaya îmzayan a 'Rayber Apo îradeyê min o sîyasî yo' ser.

AKPyî çarçewa biranê MGKyî de şero gemarin kerd giran, Şemzînan de bomba eşte Kitabxaneyê Umutî û vera komelî teda zêdînaye. Menga sibata ke menga Komployê Mîyanneteweyî ya, de vera nê şerî tewiro tewr xurt ame mojnayene. 2ê sibata 2006î de Endama Komîteya Merkezî ya PKKyî embaze Vîyane Soran seba wayîrvejîyayîşê Rayberîye bedenê xo da adirî ver. Na çarçewe de çalakîyê şermezarkerdişê Komployê 15ê Sibate bi xurtî derbaz bîyî. Hetê bînî ra kampanyaya îmzayan a 'Rayber Apo îradeyê min o sîyasî yo' bîye pîlêr. Çalakîyanê 8ê Adare ra dima prosesê Newroze dest pêkerd.

Newroza 'Rayber Apo îradeyê min o sîyasî yo'

Newroza 2006î nê bingeyî ser o hîna bi heybet û cîyayî ameye fîrazkerdene. Cîyatîya na Newroze no bi ke bi mîlyonêk merdimî Warê Newroze yê Amedî de yew fekî ra vat 'Rayber Apo îradeyê min o sîyasî yo.' Şarî bi metodê referandumê zelalî sereraşt kerd ke Rayber Apo îradeyo sîyasî yê kurdan o. Bi nê hawayî Komployo Mîyanneteweyî hetê şarî ra ame bêtesîrkerdene û şarî verê çimanê dinya de Rayber Apo sey 'Rayberê Şarê Kurdî' îlan kerd. Coka Newroza 2006î Newrozêka tarîxî ya ke Komployê Mîyanneteweyî pûç kerdo.

Heman hewte dima ke cenazayê gerîlayan resayî Amedî bi hêzê Newroze sere de şarê Amedî xeylêk şaristanan de şarî dest pê çalakîyanê pîlan kerd. Çend rojan de şarî xeylêk kuçeyî bi temamî girewtî binê kontrolî û firsend nêda ke dewlete dezgehan ra vejîya teber. Rewşêka newîye ameye afernayene ke Rayber Apo sey 'cabîyayîşê sîstemî' pênase kerrdêne û çalakîyanê verênan ra cîya bîye. Amed bi taybetî vurîya şaristanê serewedaritişî. Înanê ke waştêne tewirê sîyasî yê şarê kurdî fam bikerê hînî verê xo dayêne Newroza Amedî.

Newroza 'Rayber Apoyî rê Azadîye'

Newroza 2006î Newroza Rayber Apo îradeyê min o sîyasî yo.' Newroza 2022î zî 'Rayber Apoyî rê Azadîye' ya. Şarê kurdî Newroza 2006î de Komployo Mîyanneteweyî pûç kerd û Newroza 2022î de zî do Komployê Mîyanneteweyî bi temamî pûç bikero.

Nê esasî ser o ma venga şarê xo, dostanê xo danê ke sere de Amed de her cayê Kurdîstanî de bi xurtî azadîya Rayber Apoyî biwazê, roşanê azadî û xoverdayîşî Newroze nê esasî ser o fîraz bikerê.''