Serra 2018 bîye. Mi û çend embazan ma xebata arşîvî kerdênê. Armancê ma, arêdayîşê belgeyanê tarîxê PKKyî bi. Tarîxê 40 serran. Tarîxo sey derya. Tarîxê pirrê qehremanîye. Bêşik xayînê xo kî estbî la derdê ma qehraman bî. Beno ke goreyê dîyalektîkî na şaş bo la tarîxê kurdan de tim qala xayînan beno. Kurdî tim qala belangaziya xo, bindestiya xo kenê. Aye ra kî derdê ma qehreman bî.

Pênîye de ma kewtîme raye. Verê ma de çi esto çi çîn o ma nêzanenîme. Çimê ma yo sereke embazê. Bi taybet embazê kanî. Tenê yew deftera ma û yew cihazê ma yê qeydî esto. Ma do binusnê û vengê embazan qeyd bikerê û goreyê naye raya xo kifş bikerê.

Ma kamî/e de qiseykerd O musna ma. Ma kamî/e ra pers kerd O nişan da. Êdî ma rê bî sey merexêde girs. Ma gereke O bidîyênê.

Mi verê O nas kerdbî. Ey dersa tarîxê kurdistanî daybî ma. Dersdayîşê ey zaf bala mi antbî. Tawo ke derse dayênê to vatênê qey şîyo uca, uca ra veng dano. Tenê bi qiseykerdîşî nê bi pêroyê laşa xo ders dayênê. Verê çimanê mordemî de tarîx gandar kerdênê. Ti biwazê mewazê goş dana ci û fam kena. Hende gandar, hende dînamîk bî. To vatênê qey civa yo pêşberê to de herekîyeno.

Payîz o. Payîzê koyan. Şima bêrê bivînê, se rindek o. Se rindek o. Reng bi reng o. Hende nerm o. Pemeyî ra nermêr o. Keskûsure ra bi reng o. Xemgînîya xo hende weş a. Zerrîya mordemî vilênena.

Hela şima bêrê cayê înan bivînê. Serê gilê koyêk de mîyanê birrî de ca daybî xo înan. Uca mîyanê ey birrî de xo seveknênê. Ma ke nêzdîyê seatek anciyayme cor reştîme cayê înan. Hama corê cayê înan de vayêk estbîye. A vaye ra awe şîyînê hega û baxçê dewijan. Hama kîşta cayê înan de hênîyêde awe serdin zelal zelal herekîyayênê. Dormeyê hênî de dirrikêre. Mi emrê xo de dirrikê henênî ne dîbî ne kî werdbî.

Ez serê hênî de bîya. Mi awa serdine şimite û dest bi werdîşê dirrikan kerd. Ez bi vengê embazêda cinîye amaya bi xo. Aye va, embaz pawayê şima yo. Mi bi lezkanî destê xo şutî kulmêda awe, hênî ra şimite û ez şîya. Embazê binî verê mi şîbî.

Ez bi germayîya hevalîne pêşwazî kerda. Û va de ma destpêbikerîme çunke zaf waxtê mi çîn o. Kar û gurê mi zaf o. Ma dest pê kerd. Ma şodir 7:30 an de dest pê kerd heta şand seatê 6:00. Tebêrê werê perojî ma mabên nêda. Ey va ma nusna. Performansê ey ma matmayî verdayîme. Vîra ey ma hayranê xo verdayîme. Vîrêk encax hendê şîkîna gandar bo. O bibi tarîx amebi verê ma de nîşt bi ro qiseykerdênê. Ey can dayênê tarîxî. Tarîx newe de zaynênê. Roştîya ey çîyê ke tarî de mendbî kerdênê roşn. O roşnvîr, şorişgêrê şarê xo bî. Welatperwero raştkên ê welatê xo bi. O Kasim Engîn bi.

Bejna ey dara vîyale bîye

Royê ey tenik

Aqlê ey barî

Hevalanê xo rê zerrî can

Dişmenê harî rê bilusk bî.