Rayberê Şarê Kurdî Abdullah Ocalanî vizêr birayê xo Mehmet Ocalan reyde pêvînayîş kerd. Omer Hayrî Konar û Veysî Aktaş zî keyeyanê xo reyde pêvînayîş kerd. Hamîlî Yildirim zî seba ke merdimê ci nêweş bi pêvînayîş nêkerd.

Birayê Abdullah Ocalanî Mehmet Ocalanî ke derheqê pêvînayîşî de Ajansê Mezopotamya reyde qisey kerd derheqê pêvînayîşî de nê zanayîşî dayî:

''Ma girawe de zî zîndan de zî bi hawayêkê bêhuqûqî ameyî cigêrayene. Dima Ez Serekî reyde ameya têhet. Persa ke ma senî ameyî. Mi tira va ke semedê şewatê Îmraliyî ma ameyî. Serekî vat hayîya ci pê esta û rewşa înan baş a. Dima vat: 'Ez to rê tay çîyan pers kena. Ti zî bi xulasî qala nînan bike.' Persa ke derheqê çaresarîya krîzanê Rojhelatê Mîyanênî de fikrê şarî çi yo, çareserîya meseleya kurdan senî bena û kam eşkeno na mesele çarser bikero.

Mi vat ke se ra 80-90ê şarî vano ke têna Serek eşkeno na mesele çareser bikero. Serekî vat: 'Ez zî naye zanena mesele meseleya ma ya. Seba ke krîzê Rojhelatê Mîyanênî çarser biba ganî ma bihêz bibê.'

Mi Serekî rê qala kongre kerd. Ey zî vat: 'Tirkîya de masaya dilinge esta. Şima ganî bihêz bibê û bikerê ke bibê lingê hîrêyînî yê na masa. Eke masa hîrêlîng biba nêkewena. Kurdî lingo hîreyên ê. Estbîyayîşê nê lîngê hîrêyîn bi pîlkerdişî beno.  Ganî dezgehê seba şarî xizmet bikerê, seba xo ney. Medya bihêz bikerê. Paştî bidê ci. Ez xebatkaranê medyaya ma rê zî selam kena. Hem televîzyonan hem zî kovaran wa bihêz bikerê.

Partî (HDP) mîyanê dezgehanê ma de dezgehêko tewr bihêz o. Partîye bi kede bena pîlêr. Seba nê şarî bedelê pîlî ameyî dayene. Wa her kes seba nê şarî têkoşîn bikero. Ez tîya de kena ke rayîrê çareserîye bivîna. Eke şima bibê yew şima eşkenê meseleyan çareser bikerê. Şima çareserîya bingeyîne yê.

Seba Rojawan çareserîye na ya: ganî hêzê Rojawanî mîyanê yewîya Sûrîye de hîna bihêz bibê. No seba yewparetîya Sûrîye hewce yo. Eke Rojawan de kurdî, erebî, armenîyî û xirîstîyanî hêzêk nêbê yewîya Sûrîye nêna caardene. Stratejîya Rojawanî Sûrîye de raşt a. Ez pêro kedkaran, xebatkaranê Rojawanî rê selam kena.

Eke şima bihêz bibê şima eşkenê her çi çareser bikerê. Şima neçare yê ke dezgehê xo bihêz bikerê. Eke şima weş bixebitê şima eşkenê netîce bigêrê. Yanî ganî şima seba şexsan ney seba şarî bixebitê. Her çi bi têkoşînî beno. Eke hêz çinbo kesêk nêeşkeno meseleya kurdî çareser bikero. Ganî şima bibê lingê hîreyînî yê masaya Tirkîya. No zî bi hêzî beno. No bi kede beno.  Ez her kesî rê ke Rojawan de, Başûr de, Rojhelat de û Ewropa de vera tecrîdî têkoşîn kenê selam kena. Rewşa weşîye ya mi baş a.'

Wexto ke pêvînayîş qedîya ez Serekî ra persaya ke 'Reyna pêvînayîş do bibo?' Serekî zî vat: 'Her çi pabesteyê têkoşînê şima yo. Eke şima aver şorê her çi çareser beno. La eke şima aver nêşorê pêro meseleyî dewam kenê. Hem tecrîd dewam keno hem zî gonîye rişîyena. Her kes ganî goreyê naye çi destê ci ra bêro wa bikero.' ''