Rayberê Şarê Kurdî Abdullah Ocalan sîstemê Îmraliyî zî sey perçeyêkê Komploya Mîyanneteweyîye vîneno. Ocalanî kitabê xo yê bi nameyê ‘PAWITIŞÊ MHMEYÎ – DEWLETA SUMERE YA RAHIBAN RA VER BI KOMARA ŞARÎ’ de prosesê komploye û rastîya Îmraliyî bi eşkerayî ano verê çiman. Ma qismê newinî pare kenê.

BALAFIRGEYÊ ATÎNA DE DEST PÊKERD

No proses 9ê Teşrîna verêne 1998an de bi şîyayîşê min ê Balafirgeyê Atîna dest pêkerd. Parlamentero dost û wezîro verên Badûvasî ez dawet kerdebîya, la herinda ê de serekê îstîxbaratî Stavrakakîs o bi nameyê kodî Baby û Kalenderîdîs o bi nameyê kodî Agît ke xo dost ramotêne herinda Badûvasî de ameyî vernîya mi. Rixmo ke mi înan ra vat, ‘ez wazena ke muracatê multecîtîye bikerî û no heqêk min o’, înan vat ke ê do zor bixebitnê û naye ser mi verê xo da Moskova.

Moskova de parlamenter Jîrnovskî ame vernîya mi. Temsîlkarê ma yê partîye Nûman Ûçar bi. Dima ra înan bi mi da famkerdene ke serekwezîr Prîmakovî vato tewr zaf ez eşkena 9 rojan bimanî û eke nêşirî do mi bi zor bieşrawê. Ê wextan ez keyeyê parlamenter Mîtrofanovî de menda. Wextê min ê Moskova ke 33 rojan dewam kerd, Dûmayî hemverê vengêkê redî de bi 298 vengan heqê min ê multecîtîya sîyasîye qebûl kerde, la hukmatî na yewe bica nêarde. Naye ra mi verê xo da Îtalya.

SEBA KE MI BIREMNÊ ÎNAN HER RAYÎR Û METODÎ CERIBNAYÎ

Ez paweyê dostîye bîya, la ameya tepiştene. Mehkema dima ra qerarê tepiştişî wedart. Labelê ez mîyanê dorgirewtişêkê çetin û giranî de amîya verdayene û seba remnayîşê mi her rayîr û metod ame ceribnayene. Dimayê şeştî û şeş rojan neçar menda ke vejî. Nê prosesî de avûkat û açarnayoxê min ê Îtalyayijî estbî. Eşkenê nê halî qal bikerê. Avûkatê min o parlamenter Pîapîsa û açarnayox Ahmet şahidê heme qewimîyayîşan ê.

PROJEYÊ HERIKÎYAYÎŞÊ KEWEYÎ Û PEYMANA KREDÎYA ÎMFYÎ

Gama ke ez Moskova ra agêraya, rixmo ke înan soz dabi, reyna bi tewirêkê çetinî nizdê mi bî. Êyê ke bi nameyê DYA û Îsraîlî ameyî, Madleîne Albrîght û Arîel Şaron bî. Serê kredîyanê ÎMFyî de munaqeşeyî ameyêne kerdêne. Projeyê Herikîyayîşo Kewe zî rojdem de bi. Ez bawer kena ke bedelê teslîmkerdişê mi de înan kredîyanê ÎMFyî de û Projeyê Herikîyayîşê Keweyî de bi selahîyetdaranê Moskova dir pêkerd.  

EZ VISTA DAME, BI ZOR BERDA

Dingo peyên de, dimayo ke generalo teqawud Nagzakîs û açarnayoxe Ayfer Kaya teyareyêko taybet ard, ez Petrograd ra şîya Atîna. VÎP ra ravêrta û şewêk pawitoxê Nagzakîsî dir menda. Dimayê rojêk seba ke wezîrê karê teberî Pangalosî bivînî şîya cayêk, la ûca reyna serekê îstîxbaratî Stavrakakîs ame vernîya mi. Ez kewtebîya dame. Înan ez bi zor berda cayêk. Dimayo ke rojêk bi teyare ez hewa ra gêrnaya, mi Girawa Kurfû de ronayî. Çapemenîya Ewropa vatêne, “Emşo heme balafirgeyê Ewropa Apoyî rê girewte yê.”      

YEWÎNEYA BI METODÊ GLADÎO YA TEBERÊ QANÛNÎ YA NATOYÎ

Serekwezîrê Rûsya zî bi nameyê Cimatê Dewletanê Yewbîyayeyan qedexe kerdibi. Eşkere bi ke sewîyeyêka xeylî berze de qerar amebi dayene. Dima ra fam bi ke no qerar bi hawayêkê nimiteyî Swîsre de ameyo girewtene. Hêzo ke qerar dabi yewîyêka teberê qanûnî ya bi metodê Gladîoya NATOyî ya binê kontrolê DYA de bî. Dima ra eşkera bi ke heman yewîye remnayîşê min ê ver bi Kenya plan kerdo. Çapemenîye de zî îspat bi ke nê de rolêko pîl ê îstîxbaratê Îngilîzan esto.

Hukmatê Yunanî xo seperna dostîya sexteye û bi rolê taşeronîye têgêra. Kalenderîdîsî mi ra vat ke do mîyanê 15 rojan de pasaportê Komara Başûrê Afrîkayî mi rê bidîyo, seba naye zî ganî ez Konsolosxaneyê Berzî yê Yunanî yê Kenya de bimanî ke ûca hîna biasayîş o. Seba ke mi Kalenderîso ke bi nameyê hukmatî mi dir qisey kerdêne rê bawer kerd, înan ez remnaya Kenya. Hukmatê Yunanî û Sefîro Berz Kostûlas rixmo ke hayîya înan remnayîşê mi ra estbi zî eşkera nêkerd. Roja peyêne asayîşê Kenya dir pêkerd, bi nameyê Pangalosî garantî daye û vat, “Ma şinê Hollanda.” Ez bawer kena ke înan ma bi maddeyêkê heşberdoxî remnayî balafirgeyî û teslîmê yewîyêka asayîşî ya taybete ya Tirkan kerdî ke înan 2ê Sibate ra hadreyîyê ci kerdêne. Xora temsîlkaro taybet ê serekê DYA Clîntonî Blîndkenî çapemenîye rê eşkera kerd ke operasyon bi fermanê taybetî yê Clîntonî ameyo kerdene. Nê hayîdarîyê kilmî yê ke mi dayî zî ramojnenê ke hukmê Peymana Heqanê Merdiman a Ewropa (PHME) ameyê binpaykerdene û rixmo ke muracatê min ê seba multecîtîye yê Îtalya û Konsolosxaneyo Berz ê Yunanistanî ameyî qebûlkerdene, ez bi hawayêkê nehuqûqîyî amîya remnayene. Konsolosxaneyo Berz ê Yunanistanî yê Kenya de ke ez bi zor ameyêne tepiştene, sefîro berz Kostûlasî bi xo mi ra vat ke muracatê mi yê seba multecîtîye ameyo qebûlkerdene û yena bicaardene. Bi rayîrê avûkatêk ke Yunanistan ra amebi mi kerdêne ke nê karî Atîna de bica biyarî. Kenya de zî bi hawayêkê fermîyî ez çarçiwaya PHME de bîya. Na yewe ra mi qebûl nêkerd ke mi bi zor vejê teber û mi xover da.   

Bi kilmî 9ê Teşrîna verêne ra heta 15ê Sibate ganî hukmê PHME mi rê zî biameyêne bicaardene. Rûsya zî mîyan de heqê tu hukmatî çino ke heqê ke peymane de yenê eşkerakerdene binpay bikerê. Ez tewrê muracato ke avûkatanê mi derheqê nê dewletan de Mehkemeya Heqanê Merdiman a Ewropa (MHME) de kerdo, bena. Ez eşkera kena ke ez gerre kena û ganî verê dewaya Îmraliyî muracatê ke derheqê nê welatan de yanî derheqê Yunanistan, Îtalya û Rûsya de ameyê kerdene bêrê wekenitene. Bi nê hawayî do rîyo rast ê remnayîşê mi roşin bibo û dima ra zî eşkera bibo ke teslîmkerdişê mi hemverê PHME de yo.   

WA MEHKEMA TEWIRÊKÊ MANÎDARÎ RAMOJNO

Gama ke ez teslîmê tîmanê Tirkan amîya kerdene, tu peyme nêame bicaardene, na babete de tu dokuman çino, heman wextî de seba ke qewimîyayîş mîyanê sînoranê Ewropa de virazîya, hukmê PHME ameyê binpaykerdene. Nê bingeyî de, seba ke bingeyêko huqûqî yê roniştişanê Îmraliyî çino, do bica bibo ke roniştişê Îmraliyî bi qerarê ‘dewa çina’ yan zî ‘nêbîya’ bi netîce bibo. Eke eksê nê de qerarêk bêro dayene do hemverê PHME de bo. Bi nê hawayî do huqûq zî tewrê prosesê komploye bêro kerdene û MHME sey helqayêk ya na rêzile bêro pabestene. Ez bawer kena ke Mehkemeya Berze do na yewe qebûl nêkero. Umîddar a ke do Mehkemeya Berze hemverê nê kayê remnayîşî yo ke aye zî eleqedar keno de tewirêkê manîdarî ramojno û qerarêkê tarîxîyî yo ke goreyê tarîxê ci yo bido.

Do dewam bikero…