Hemleya 'Tecrîd, faşîzm û îşxalî rê bes o; wext wextê azadîye yo' 10ê êlula 2020î de hetê Konseya Rayberdişî ya KCKyî ra amebî îlankerdene û 12ê êlule de dest pêkerdbî. Hemle serrêke xo pey de verdaye. Na yew serre de şarê kurdî, gerîlayan û teberê welatî vera hêrişanê AKP-MHPyî têkoşîn kerd.

Hemserekîya Konseya Rayberdişî ya KCKyî 10ê êlule de pê eşkerayîyêke konjokturo sîyasî yo nikayêne pare kerd ke îqtîdarê AKP-MHP-Ergenekonî estbîyayîşê xo tasfîyeya têgêrayîşê azadîye û temamkerdişê qirkerdişê kurdan ser o ronayo. Coka semedê çinkerdişê nê îqtîdar hemleyêka hîra lazim a.

Konseya Rayberdişî semedê qedînayîşê tehlukeyî, semedê afernayîşê cuyêka azade û demokratîke 12ê êlule de hemleya demokratîka şorişgêre daye dest pêkerdene. Armancê hemle rijnayîşê îqtîdarê AKP-MHP-Ergenekonî bi. Dîya zanayene ke hemle her parçeyê Kurdîstanî de bi hawayêkê xoserî do bêra caardene.

Vakurê Kurdîstanî û Tirkîya de têkoşînê vera faşîzmê AKP-MHPyî bi merkezê hemle. Têkoşîn rayberîya HDK û KCDyî de ekonomî ra heta xoza, meclîsî ra heta kuçeyan bi beşdarîya her beşê komelî dewam keno. Çarçewa hemle de tepişteyan 27ê teşrîna peyêne de dest pê grevê vêşanîye kerd.

Başûrê Kurdîstanî de hemle pê şîarê 'Îşxalî rê bes o, wext wextê pawitişê Kurdîstanî yo' dîyaye destpêkerdene. Vera estbîyayîşê dewleta tirke hîsgerîya komelkî ameye afernayene, kampanya dîyaye destpêkerdene û hemkarîya bi îşxalkeran ameye teşhîrkerdene. 

Rojawanê Kurdîstanî zî pê şîarê 'Îşxalî rê bes o, wext wextê pawitişê şorişî yo' beşdarê hemle bi. Hemle reyde xîretê dewleta tirje yê hîrakerdişê îşxalî, vetişê şerê zereyî û fatisnayîşê ekonomî ameyî pûçkerdene. Stratejîya dewleta tirke 'tênaverdayîş' ser nêkewt.

Rojhelatê Kurdîstanî pê şîarê 'Dardekerdişî rê bes o, wext wextê demokrasî yo' tewrê hemle bi. PJAK, KODAR û hêzê leşkerî goreyê ruhê hemle xîretê rêxisitnbîyayîşî û pawitişî dewam kenê.

Ewropa de rayberîya cinî û ciwanan de hemle ameye caardene. Rixmê janê Korona zî hunermend, nuştox, şar, sîyasetmedar û bi mîlyonan merdimî tewrê hemle bîyî, çarçewa hemle de bi hezaran çalakîyî kerdî, karê dîplomasî ard ca. Dostê kurdî zî tewrê çalakîyî bîyî û ge ge înan bi xo kampanyayê taybetî ardî ca.

Bêguman gerîlayî hema zî hêzê bingeyî yê têkoşînê azadîye yê Kurdîstanî yê. Na hemle de zî gerîlayî her ca de derbe danê hêzanê faşîstan û pê rolê xo têgêrenê. Fermandarîya Qerargehê Merkezî yê Pawitişê Şarî dabi zanayene ke na hemle heman wextî de caardişê Şerê Şarî yê Şorişgêrî yo û vat: ''Nê dewrê girîngî yê têkoşînî de vera hêrişanê topyekûnan hêzê ma semedê xoverdayîşê topyekûnî beşdrê nê prosesê hemle benê û pê rolê rayberîye wurzenê ra.

Gerîlayî vera hêrişanê dewleta tirke ya îşxalkere yê serê Vakur û Başûrê Kurdîstanî xo ver danê û pê çalakîyanê bitesîran cewab danê. Gerîlayan verî Garê de artêşa tirke çin kerde. Artêşa tirke ya îşxalkere naye se ro şewa 23ê nîsane Avaşîn, Metîna û Zap de dest pê hêrişanê îşxalî kerd. Gerîlayan hesabê artêşa tirke ya îşxalkere çin kerdî û mojna ke Başûrê Kurdîstanî de zî ê hêzê pawitişî yê.