Serê 26-27ê Teşrîna peyêne 1978 ra, ke a roje qezaya Licê ya Amedî de dewa Fîsî de hetê 22 ciwanan ra Partîya Karkerên Kurdistan (PKK) amî ronayene, 40 serrî vîyartî. PKKyî nê çewres serran de her game xo kerd newe û bêguman nê newekerdişî de para Rayberê Şarê Kurdî Abdullah Ocalanî pîle bî. ANFyî perspektîfê Ocalanî yê derheqê 27ê Teşrîna peyêne arê dayî. Ê tespîtî nê yê: 

27Ê TEŞRÎNA PEYÊNE 1978 NÊQEBÛLKERDIŞÊ HALÊ KURDISTANÎ

(…) Ma bi xo nê tarîxî sey tarîxê nêqebûlkerdişê Kurdistanêk ke sînorê ci hetê qewimîyayîşanê sîyasîyan ra ameyê xêzkerdene vînenê. Statuya ewroyêne ya Kurdistanî ke emperyalîst, kolonyalîst û feodalan ge bi şer ge zî bi pêkerdişî xêz kerda hetê ma ra nêna qebûlkerdene. Na statu de partî û şar nêeşkenê bi azadî biciwîyê. Na statu hetê sazîyanê kolonyalîstan ra yena pawitene û domnayene, mumkun nêyo ke ma na statu qebûl bikerê. Eke ma qebûl bikerê ma nêeşkenê şarê ke nê welatî de yê, nê erdî de yê rê cuyêka azade û avere wahd bikerê.(…)   

27Ê TEŞRÎNA PEYÊNE 1986 VATÊNE MENGÊK DI MENGÎ EMRÊ ÎNAN ESTO

(…) Seke yeno şima hemeyan vîrî ke înan seba ma vatêne ‘emrê înan yew menge, di mengî yan zî hîrê mengî yo, nê ra vêşêr nêeşkenê biciwîyê.’ La nika îspat bi ke nê zûr vejîyayî. Dişmenê ma çende wehşî bo û bi hêzêkê pîlî ma ser de bêro zî xoverdayîşê ma îdîaya înan veng vete. Heta vizêr çewî ma ne sey şar ne zî sey netewe qebûl kerdêne. Nika hemeyê dinya ma şinaseno. No senî virazîya? Ganî nê ser o bêro fikiryayene. No xo bi xo nêvirazîya. Bi fikir û bi cehd virazîya.(…)

27Ê TEŞRÎNA PEYÊNE 1987 WEXTÊ ŞUXULNAYÎŞÊ POTANSÎYELÊ PÎLÎ YO

(…) Seke ez tima şima ra vana şima potansîyelê pîlî nêfînenê dewre. No potansîyel sîyasîbîyayîş o, organîzebîyayîş o û no zî do eskerîbîyayîşî bihêzêr bikero. Heme yewîyî ganî bibê wayîrê însîyatîfî. Xo bi ercanî pay ra meverdê, bi hêzê xo yê cewherîyî arazî bigîrê binê kontrolê xo, tê bigêrê û xo bipawê. (…)

27Ê TEŞRÎNA PEYÊNE 1990 ERDÊ XO CA MEVERDÊ

(…) Ez vana erdê kal û pîranê xo ra meremê. Şima bêkar-bêhêz ê, şarî rê mebê bende. Wetenî de çîyan virazê. Çiqa pey de bo zî yew tarîxê ma esto, çiqa perçe-perçe bo zî yew nasnameyê ma esto. (…) Domanê şima vêşan-perîşan ê! Şima serreyê xo dayo ra her cayê dinya de bîyê vila. No şîyayîş raşt nêyo. Erdê ma bêrê wêrankerdene, tarîxê ma bêro nimitene û ma n3eeşkê bi ziwanê xo biciwîyê zî kultur û nasnameyêk ma esto. Ma nînan ser o bifikrîyê. (…)    

27Ê TEŞRÎNA PEYÊNE 1991 SEBA KONFEDERASYONÊ ROJAKEWTENA MÎYANÊNE VENGDAYÎŞ

(…) Ma wazenê ke serê bingeyanê xoser û azadan de şaranê Ereb û Îranî dir rayîr ra şirê. PKK hêzêko şorişgêr ê Rojakewtena mîyanêne yo. Ma hemverê zordarîyanê emperyalîzmî yê serê Rojakewtena mîyanêne de seba viraştişê konfederasyonê şaran ê Rojakewtena mîyanêne veng danê. No vengdayîşê ma nika ra bale anceno, wazenê ke ma dir bikewê îtîfaqî mîyan. Ma tim vat ma nê rê akerde yê. Gama hemrayê ma yo enternasyonalîst Kemal Pîrî vatêne : “Ma Rojakewtena mîyanêne de hetgêrê konfederasyonê şaran ê” na raştîye ardêne ziwan. (…)

27Ê TEŞRÎNA PEYÊNE 1992 PKK BENO UNÎVERSAL

(…) Hendî heme faktorî ramojnenê ke PKK bi fehmê xelaskarîya neteweyîya ke mîyanê sînoranê neteweyîyan de menda nêeşkena nê karî ra vejîyo. Sey lazimîyêke rolê xo çende şino beno herêmkî û unîversal. Na yewe ra gama ma raştîya PKKyî gênê xo dest ma nêeşkenê bi şerê xelaskarîya neteweyîye û şerê taybetîyî eleqedar bibê. Seba ke ma nêkewê na kemasîye ganî ma biewnêrê muhtewaya serkêşîya PKKyî ra. Yanî na muhtewaya ke ewro ehend bîya zengîn bi sînoranê neteweyîyan de aye mehkumkerdiş do serfirazî nêro bi dest fînayene. (…)

27Ê TEŞRÎNA PEYÊNE 1993 ŞARÎ RÊ RAŞT NIZDBÎYAYÎŞ Û ARTÊŞBÎYAYÎŞÊ ŞARÎ

(…) Bê artêşbîyayîş û organîzebîyayîşê şarî tenya bi şerê gerîla û bi serkêşîya partî ma nêeşkenê nê şerî de bi ser bikewê. Xora şarê ma zî nê şerî û xeta ci ya sîyasîye rê zî bawerî arda. Dişmen zî tewr zaf emser bi qirkerdişanê eşkerayan, bi kiştişanê meçhulan, bi hezaran tepiştişan û îşkenceyan wazeno ke artêşbîyayîşê şarî, şerkerdişê şarî vindarno. Her çî seba şarî yo, her çî seba şarêk ke ehend kewto newe ra bêro xo ser û bixelesîyo yeno kerdene. (…)

27Ê TEŞRÎNA PEYÊNE 1994 RESAYÎŞÊ BI ŞEXSÎYETÊ SERKEWTIŞÎ

(…) Ganî nêro xovîrrakerdene ke kadroya bingeyêne ya PKKyî bi temamî sosyalîst a. Bêguman PKK têgêrayîşêkê şarî yo demokratîk o, la serkêşî ya sosyalîzmî ya. Mîyanê ci de tewir-tewir sinifî, heta rayberîyê înan estê. Nê hetî ra rayberîya têgêrayîşêko taktîkî ya. (…)

27Ê TERŞÎNA PEYÊNE 1996 PARTÎBÎYAYÎŞ DE ISRAR

(…) Nê wextanê peyênan de ez her game şinawena ke vanê ‘peymeyê partî ameyî vîyartene, gerîla ame vîyartene, teberê welatî de Ewropa de cuye amî vîyartene!’ Nê vatişî seba kadroyêkê PKKyî zaf bidej û bitehluke yê. (…) Ez bi vîrardişê heme şehîdan eşkena vajî ke tu cehdêk qasê partîbîyayîşî erjaye nêyo! Çîyo erjaye peymeyanê partî de israrkerdiş o. (…)

Ganî şima agêrayîşêkê raştî ver bi tarîxê PKKyî bikerê û manayêka raşte bidê ci. Ez bi wesîleya serragêrayîşî eşkera vana. Seba mi têgêrayîşê goreyê terzê partî her çî yo! (…)   

27Ê TEŞRÎNA PEYÊNE 1997 KILAMA MA…

(…) Kilamêka her kesî esta, kilama ma zî na ya. Deyîrêka her kesî esta. Goşê xo danê ci û aye dir vanê, ciwîyenê şinê. Kilama ma zî wina ya û çende şina ben amende, xorî, goşdarî kena, dana goşdarîkerdene û dewam kena. Kilamêka cuye ya ke çende trajîk a hende komîk a, çende bidej a hende bizewq a û çende dana ciwîyayene hende mirênena. (…)

Hetê sîyasî û eskerî yê PKKyî hetê şeklî yê. Çîyo muhîm cewherê ci yo. Famkerdişê cewherê ci ca verdê, şima na xete ser o ciwîyenê yan mirenê eşkera nêyo. Ma sere ra waşt ke qerarêk bidê; eke cuye bibo ganî goreyê rûmetê merdimîye bibo, azade bibo yan zî qe mebo. PKK de qerar wina yo. (…)  

27Ê TEŞRÎNA PEYÊNE 1998;

“(…) Xusûsen mayê zerrîvêşayeyî, keynayê ma yê ciwanî înanê ke hîsdarîya xo ramote ez yew bi yew wazena ke hurmet û heskerdişanê xo înan rê bieşrawî. Her kes emrêk ci esto, ez wazena vajî ke ez ê rind bikar ana û wayîrê sozê xo ya. Şexsî muhîm nêyê, la ganî rolê x okay bikerê. Sazîyî hîna muhîm ê, hîna emrderg ê. PKK zî sazîyêko rind o. Seba ma Ronesans o. Ez bawer kena ke her demî ra hîna vêşî rayraşîyayîşê PKKyî rayraşîyayîşê ver bi serkewtişî yo, rayraşîyayîşê sosyalîzmî û biratî yo. (…)”