Tarîx, ravêreyîya tekoşîna maberê heqe û neheqe,zalim û mezlûman reyna serdest û bindestan o. Di na ravêreyîya derg û dûrîye de,kesanêy ke bi goreyê şert û mercanê wextî, rewşe fehm kerda û bi çalakîyanê xo mudaxeleyê rewşe kerdo, bîyê kesayet û qehremanê tarîxî. Belkî di heme wextan de bi ser nêkewtê la bi kesayet û çalakîyanê xo, nifşê dimameyînan rê bîyê mîlad û mîrate. Nêy kesayetan di tarîxê merdimayîye de tim zêy abîdeyanê merdimayî û estareyanê roşnayîye ca girewto. Tay zê destanan,tay zê estanikan, tay zî di helbest û deyran de, hetê heme merdimayîye ra tim bi rêzdarî û hurmet, ameyê bivîrardene.

Heman rewşe seba kesayetanêy ke sûcê verva merdimayîye pêk ardê zî, derbasdar a. Înan zî zêy lekeyêkê sîyayî di heman tarîx de ca girewto.Qeydyê dîyalektîkê xoza ke “her çî bi ziddê xo est o” îtîya de zî derbasdar o.

Tarîxê Şarê Kurdî zî destpêke ra heta ewro,esasanê nêy qeydeyî sero pêk ameyo . Estare û abîdeyê roşnayîye zî, lekeyê sîyay êy tarîxî zî di heman destan, estanik û deyran de ameyê mûndene.

Hemseroka KCD û Parlamentera HDP ya Colemêrge Leyla Guvene, di peyamanê xo êy peyênan ra yewî de, wina vana.“Tarixê Şarê Kurdî, tarîxêko adirî ra yo. Gere ma ra tay di nêy adiri de biveşîyê”  No vatiş bixo, heşmendîya Birêz Leyla Guvene ya destpêkerdişê na çalakîye,nîşan dano. Reyna no vatiş nîşan dano ke, Guvene bi feraset û heşmendîyêka rêze ra nê, bi wendiş, fehmkerdiş û mudaxelekerdişê dem û tarîxî, dest bi na çalakîya xo kerdo. Di peyama Guvene ya mîtîngê Amede de zî heman heşmendî û feraset xo nîşan danê. Guvene vana “Ez di zaneyîya a raştîye de ya ke, ez di wetêko ke di  oxirê cuyeyî de bi keyfweşî cane xo bida ra, derbas bena”.

Na peyame, di wexto ke Rochelato Mîyanên de reyna estbîyiş û ameyîya Şarê Kurdî sero bazarê qilêrinîy yenê kerdişî, Vakûrê Kurdistanî de konseptê qirkerdişê topyekûnî yê faşîzmê Dewleta Tirke meriyete de yo û Rayverê Şarê Kurdî Abdûllah Ocalanî sero tecrîdêko giran yeno domnayişî de, ameya dayişî. Na rewşe,seba Şarê Kurdî rewşêka tarîxî û krîtîke ya. Çalakî û hewldayişê Leyla Guvene, mudaxeleyê na rewşa tarîxîye  yê. Seba naye yo ke, Hemserokê Konseya Rayirbere yê KCK’yî Birêz Cemîl Bayik vano; “Heqê tu kesî çînyo ke mudexeleyê na qerardarîya Birêz Leyla Guvene bikero”. Bi vatişê Fermandarê Xoverdêrîya Xoserîye Çîyagerî ”Peynî senî bena wa bibo do muhteşeme bo”.

Birêz Leyla Guvene,di wextêko muhîm de mudaxeleyêko tarîxî kerdo. Bi ney mudaxeleyê xo nika ra zê kesayetanê xo ra ver, di tarîxê tekoşîna Şarê Kurdî, wijdanê merdimayîya birûmete û ripelanê pakan êy tarîxî de, cayê xo girewto. Peynî senî bena wa bibo,na çalakîya Guvene ra dime do tu çîyêke zê na ra verî nêbo.

Vizêrî 20’Çeleye,serragêrayîya 1’ine ya Êrîşê verva Efrînî bî.Dewleta Tirke ya Faşiste bi hemkarîya çeteyanê hovan,rejîmanê neyarê Şarê Kurdîy êy hereme û destûr û bêvengîya hêzanê Mîyanetewîyan, êrîşê Efrînî kerd.58 rocanê verva ney şerrê îşgalkerîye de zî tekoşînêka bêhempa û tarîxî hetê cînî û ciwananêy ke rayhevalê  Leyla Guvene bîy ra, amî nîşandayene.Çalakîya Leyla  Guvene di heman wextî de verdewamê na Xoverdêrîya S eserre ya cînî û camêrdanê Efrînîya zî.

Bi na wesîla, ez di şexsê şehîdanê Efrînî de verva heme şehîdanê Şoreşa Kurdistanî û di şexsê Leyla Guvene de zî verva heme çalakvananê grevê veyşanîye, dorêka bîne beşna xo tewênena.

Çime: Yenî Ozgur Polîtîka