Komîteya Merkezî ya PKKyî bi sernameye ''Semedê Serkewtişê Serra Pancasine ya Têgêrayîşê Apoyî'' Vilaweka Serra Pancasine weşanaye.

Vilaweke wina ya:

''Ma sey Têgêrayîşê Azadîye yê Kurdîstanî û şarê kurdî Newroza newîye ciwîyenê. Newoze roşanê yewîye, xoverdayîş û azadîye yê ma yo. Newroze roşananê azadîye yê tarîxê merdimîye ra yew o. Pîya bi vejîyayîşê Rayberîye û PKKyî Newrozî dahîna rinde, bimana, o goreyê eslê xo ciwîyenî.  Senî ke wisar xoza zil dana, ma zî her Newroze de xo newe kenê; bi ruh û hişmendîya yewîye, xoverdayîş û azadîye pir benê. Ma sey têgêrayîş, şar û dostanê xo Newroza 2022î ma pê wina yew hîs û fîkî ciwîyenê. Çar leteyanê Kurdîstanî û her hetê dinya de şayîyê Newroze bi coşî yenê kerdene. Ça de yew kurdo welatperwer esto uca Newroze yena fîrazkerdene. Ma pê bawer ê ke no tim wina dewam bikero û her roje bibo sey Newroze û têkoşînê azadîye û demokrasîyî bêro pîlkerdene.

Na çarçewe de ma Newroze sere de Rayber Apo heme hemrayan, şarê xo yê welatperwerî û dostanê xo yê şorişgêr-demokratan rê fîraz kenê û serkewtiş wazenê. Ma têkoşînê pîlî yê azadîye yo ke serkeşîya Îmralîyî de aver şi û ko, bajar û zîndanan de xeta qehramanaîye de bi waştişê azadîya fîzîkîye ya Rayber Apoyî yeno domnayene, selam kenê. Ma şexsê şehîdanê xo yê pîlan Mazlûm Dogan û Zekîye Alkan de heme şehîdanê xo yê qehremaman bi hurmet, heskerdiş û minnetî yad kenê.  Hewteyê Qehremanîye yê şarê xo fîraz kenê û şexsê qehremananê neteweyan Mazlûm Dogan û Mahsûm Korkmazî de heme şehîdanê xo reyna yad kenê. Veng danê şar û dostanê xo ke wa her roja serre bikerê sey Newroze!

Seke yeno zanayene Newroza 2022î  dekewtişê serra pancasine ya Vejîyayîşê Rayberîye  û ronayîşê PKKyî yo.Vejîyayîşê Rayberîye Newroza 1973yî de bi. Grûba ke bingeyê PKKyî nayo ro prosesê Newroza 1973yî  mintiqaya Awbendê Çubukî yê Anqara de ameye ronayene. Bi ronayîşê na grûbe vera tarîtîye û zextê derbeya leşker-faşîstî  ya 12ê Adara 1971î  raştîya xoverdayîş û roşnayîye ya Têgêrayîşê Azadîye yê Apoyî vejîyaye werte. Nika no rayraşîyayîşê heqîqetê Apoyî kewno serra pancasine.  Zaf zelal o ke raştîya Rayber Apoyî  rayberîya Newroze ya.  PKK sey  partîya Newroze ame ronayene  û pîl bi. Serkêşîya Rayber Apo û PKKyî de şarê kurdî 49 serrî pê têkoşînê xo yê azadîye xo kerd şarê Newroze. Tarîxê Kurdîstanî de reya verêna ke Rayberîya Azadîye û têgêrayîşê partîye wina bêmabên têkoşînî kerd û averberdişê muhîmî peyser kerdî. Na çarçewe de ma Vejîyayîşê Rayberîye Apoyî û bîyayîşê Têgêrayîşê PKKyî selam kenê û şarê kurdî ke têkoşînê xo wina bêmabên domna fîraz kenê.  Şexsê şehîdanê qehremanan ê nê rayîrê bimbarekî Hakî Karer, Mazlûm Dogan, Xeyrî Durmuş, Kemal Pîr, Sakîne Cansiz, Mehmet Karasungur, Egîd, Bêrîtane û Zîlane de heme şehîdanê xo bi hurmet û heskerdişî yad kenê û sozê serkewtişî danê.

Bêşik nê rayraşîyayîşê azadîye yo bimbarekî yê nêm seserre de tewr zaf keda Rayber Apoyî esta. Rayber Apoyî hem no têkoşîno pîl da destpêkerdene hem zî her wextî de barê tewr giranî girewtî xo ser û wezîfeyê xo bi serkewtişî ardî ca.  Ma sey mîlîtan, partî û şarî qirkerdişî ra xelisnayî û xeta cuya azade de newe ra afernayî.  No rayîrê azadîye yo bimbarek hem kerd bêagêrayîş hem zî tim kerd roşn û verê serkewtişî akerd. Coka ma Rayber Apoyî rê çend mînetdar bi zî tay o.  Ganî heqîqetê Rayberîye hole bêro famkerdene û caardene. Ma do serra pancasine de goreyê naye têbigêrê. Reyna  ma hêzê xo şehîdanê xo ra genê ke ma înan rê zaf çî deyndar ê. Bêşik şarê ma hêzê xo gerîlayan ra girewt û rayraşîyayîşê qehremanîye aferna. Bi na wesîle her keso ke nê rayîrê azadîye yê bimbarekî de keda ci esta, ma bi heskerdiş û hurmetî selam kenê.

1.Bîyayîş senî ame caardene?

Bêşik Kurdîstan de  Vejîyayîşê Rayberîye yo Apoyî wina nişka û rehet nêama caardene. Sey têgêryîşêkê azadîye PKK rehet aver nêşi. Aksê ci de her çî bi zor û bêîmkanîya pîle bi.  Her hetî ra şertî zehmet bî.  Şarê kurdî tam gerîyabi prosesê çînbîyayîşê neteweyî. Sîstemê qikerî her hetî ra şîyênî kurdan ser.  Bi vatişê Rayber Apoyî kurdêko xo rê îxanet nêkerdbi nêmendbi.  Wexto winayên  de mîyanê heme zordarîyan û fatisyayîşî de Vejîyayîşo Rayberîye û PKK vejîyayî werte.  Şarê kurdî ke tengayî antêne zî Rayberêk û Têgêrayîşekê Azadîye yo xurt aferna. 

Seke yeno zanayene Kurdîstan cayê komelbîyayîşî yo. Şarê Kurdî şaranê tewr qadîman ê tarîxî ra yo. Şorişê neolotîkî yo ke serkêşîya cinîyan de bi, şorişê citkarî-dewe tewr zaf na cografya de bi û peyserkerdişê nê şorişan tew zaf hetê şarê kurdî ra vejîya meydan.  Sîstemê îqtîdar dewlete zî nê peyserkerdişî ra xo weye kerd û bîyî serdest.  Naye ra tim vera cografyaya Kurdîstanî hêrişê îşxalî kerdî.  Kurdê ke afernayoxê komelbîyayîşî yê înan zî tim vera hêrişan têkoşîn kerd. Tarîxê  Kurdîstanî  de vera hêriş û îşxalî tim xoverdayîş esto. Xora tîya ma nêeşken hîra qala nê tarîxî bikerê. La ganî gamê esasî yê averşîyayîşî komelî yê tarîxkî bêrê zanayene ke dost û dişmen raşt bêro famkerdene. Dewrê verênî de zî qismê dewrê mîyanênî de zî rixmê heme hêrişan cematê ke bi nameyê kurdan yenê zanayene zaf hetan ra hêzdar ê.  Kurdîstan de problemî eslê xo de dewrê diyînî ye dewrê mîyanênî de vejîyayî. Her çiqas Împaratorîya Osmanîyan de tay îmkanê ci bibî zî mabênê seserra 17. de rewşe vurîyaye û zehmetîye zêdîyayî.

Kurdîstan de cîyabîyayîşo mende 1639 de  pê Pêkerdişê Kasr-i Şîrînî yê mabênê Osmanîyan û Îparatorîya Îranî dest pê kerd.  Mîyanê împaratorîye de mîrîya kurdan aver şiro zî  ê zî yew nêbîyî û bîyî hemkarî.  Kurdîstan de tam suluncêr warşîyayîş  seserra 19. de gama ke modernîteya kapîtalîste ya Ewropa verê xo da Rojhilatê Mîyanênî dest pêkerd. Îdareyê Osmanîyan ke vera modernîteya Ewropa de zehîf kewt semedê zafêr leşker û bacî şi Kurdîstanî ser. Pêkewtişanê bi mîranê kurdan de Kurdîstan newe ra îşxal kerd. Mîrê kurdan ê bindest zî dewrê Abdulhamîtî de bi polîtîkayanê cîya cîyayan ancîyayî mîyanê sîstemê dewlete û ameyî qedînayene.

 Şerê Dinya yo verên yo ke binê îdareyê Cemîyetê Îttîhat Terakkî de ciwîya  de sey komelanê bînan komelê kurdan zî ecîqya. Hişmendî û sîyasetê tirk-îslamî vera şaranê ermenî, rum û suryanî û kurdan de prosesê qirkerdişî da destpêkerdene. Badê şerî hetê Îngîlîstan û Fransa ra sîstemê netewe-dewlete ke Rojhilatê Mîyanênî de ame raameyene, Kurdîstan kerd çar parçe û he parçeyê ci teslîmê dewletêke kerd.  Kurdî çînbîyaye ameyî hesibnayene û vera kurdan prosesê qirkerdişî wina ame xorîkerdene. Seserra 20. de  vera kurdan nê qikerdişî dewam kerd. Sere de Tirkîya, Îran, Irak û Sûrîye vera estbîyayîşê kurdan planê qirkerdişî fîna dewre. Vera hêrişanê qirkerdişî heme têkoşînê kurdan ameyî binfînayene. Tewr peynî de çarçeweya Pêkerdişê Cezayîrî ya 1975î ya mabênê Îran  û Irakî de  têkoşînê PDKyî zî bin kewt û ver xoverdayîşanê kurdan gerîya.

Rayberîya Apoyî gama ke vejîyaye bi tesbîtê  'Kurdîstan kolonî yo'  kewt rayîr.  Demê kilmî de ame ferqkerdene ke mesela dahîna giran a. Dima ra vateyê qikerdişî sero ame  vindertene la ame vînayene ke qirkerdişê vera Kurdîstanî zî sey qikerdişanê bînan nîyo. Mesela şarê ermenî, suryanî û ruman zî raştê qirkerdiş û surgunan ameyêne  la nasnameyê înan o netewe nêameyêne redkerdne.  Qirkerdişê vera kurdan de  nasnameyê kurdan yeno înkarkerdene û asîmîlasyono giran yeno kerdene.Yanî qirkerdişo kulturkî bi ke no qikerdişo tewr gran o.  Çîyo winayên cayêko bînî de çînêbi. Têna çimeyê ekonomîkî nînê destfînayene, ercê  netewe û kulturkî yê kurdan yenê çînkerdene û herinda nînan de ercê neteweyî yê bînî ameyêne cakerdene. Kurdî plankerde yenê tirkkerdene. Kurdan rê wina yew koletîye yena ferzkerdene. Rayberîya  Apoyî gama ke vejîyaye rewşe tam da wina ya. Kurdî hêdî hêdî tarîxî ra yenê esternayene.  Bi qala kilme semedê  estbîyayîş û azadîya kurdan rewşa xirab a.  Rayberîye pîya bi  zanayîş, rexistinîye  û çalakîya kadro û şarî dest pê xebate kerd û aver berd.

Kesayetê Rayber Abdullah Ocalanî qijtîya ci ra şikdar û cigêrayoxî bi.  Keye û komel de çimdarîya prboleman keno û çareser keno. Amara û Nizîp de çarçeweya dînî de keno la gama ke Anqara de wenano fîkranê çepgîran nas keno û beno sosyalîst. Na çarçewe de Amed e komelbîyayîşê kurdan dahîna nizdî ra nas keno û Îstanbul de raştîya Tirkîya û têgêrayîşê şorişgêr-demokratîkî nêzdî ra nas keno. Semedê Raybar Apoyî înzîvîya raşte nîsana 1972yî nata Zîndanê Mamakî yê Anqara yo ke 7 mengî tede mend de rolê xo kay kena.  Dima ra zimistanê 1972-73yî de gama ke pîya bi Hakî Karer û Kemal Pîrî pîya yew keye de mendêne fikrê xo aver berdî û resa tesbîtê 'Kurdîstan kolonî yo.' Hela ke nê îfade keno xora şino.  Hakî Karer û Kemal Pîr kesê verênî ke nê vateyî verî eşnawenê û raştîya Rayberîye vînenî.

Dima ra bingeyê nê tesbîtî de Kombîyayîşê Awbendê Çubukî ame kerdene.  Kombîyayîş de embaz Fuat zî tede panc ciwanê kurdî tewrê ci bîyî de no fîrk yeno îfadekerdene û Grûba Apoyîye yena ronayene. Seke yeno vînayene vejîyayîşo Rayberîye bi temamî sey newe ra bîyayîşî yo.  Bingeyê ci de perwerdekerdiş, himendîya newî, sîstemî ra qerfîyayîş û bîyayîşê kesê azadî esto.   Rayber Apo gama ke reseno hîşmendîya ke qala ci yena kerdene  îqtîdarê panc hezar serran û sîstemê dewlete ra qerfîyeno bingeyê azadîya kurdan de dest pê sîstemêkê neweyî yê cuya azade keno.  Semedê Têgêrayîşê Apoyî nîzamo ke est o ra qerfîyayîş esas o.  No zî yeno manaya şorişê kesayetî.

Vera qirkerdişê kulturkî yê vera kurdan Têgêrayîşê Apoyî çarçewa şorişê kesayetî de prosesê azadîye da destpêkerdene. Bîyayîşo verên bêşik bi zehmetîyanê pîlan bi. Rayber Apoyî tewirê xebata xo sey 'pê derzîne qoyî kendiş' pênas kerdo. Kemal Pîr vato înan seba ke kesêkî tewrê grûbe bikerê eke hewce bikerdêne hîrê ya hîrsê saetî qisey kerdêne.  Tirkîya de tayînanê ke qure kerdêne pê Grûba Apoyîye bêqûnî kerdêne.  Kurdanê reformîstan ê neteweperweran zî na grûbe sey ajanîye girewtêne dest û teşhîr kerdêne. Bayê Rayber Apo zî vano 'Mi eşnawit ti kurdîtîye kenê, no gureyo bitehluke yo, sey verî ti çepgîrî bikerî hîna hol o.'  Grûba Apoyîye vera nê qirkerdişê kulturkî têkoşîn kerd û zorîyeyî  bin fînayî.

2-49 serrî senî ravêrtî?

Şertê bîyayîşî, tarîxê 49 serran ramojneno ke Rayraşîyayîşê Rayberîye senî vera zorîye û astengîyan têkoşîn kerd û aver şi. Hema hela verêne ra hîşmendîya qirkerdoxe  pê heme hezê xo semedê fatisnayîşê  bîyayîşê  azadîwaştoxî hêriş kerd. Bêşik nê hêrişî  zî hetê îdeolojî ra ameyî kerdene ke nê zî dihet bî. Yew hêrişê hişmendîya qikerdoxe ya  tirkan bi û o bînî zî  hêrişê kurdanê reformîst-teslîmkaran bi.  Nê hetanê ke xo sey wayîrê kurdan û Kurdîstanî vînayêne vera îdeolojîya Apoyîye ya ke newe ganî bîyêne her hetî ra hêriş kerd. Nê hêrişî ameyî yew hal ke ge ge pêrodayîş û pêkewtişî qewimîyayî.  Peynî ra tewr peynî de Grûbe Apoyîye ya heqdar ser kewt.

Dewleta tirke dima ke serekwtişê grûbe dîye wisarê 1977î de hêriş kirişt merheleya îstîxbaratî.  Na çaçewe de Dîlok û Anqara de  18ê gulana 1977î de hêrişî yenê kerdene û Dîlok de kadroyanê serkêşan ê grûbe ra Hakî Karer yeno qetilkerdene.  La  Grûba Apoyîye nîna îmhakerdene.  Hetêkî ra hêzo faşîst ê MHPyî hetê bînî ra Kurdîstan pê ajanîye vera grûbe hêrişî yenê kerdene.  Çarçeweya  Xoverdayîşanê Curnê Reş, Girê Sorî de vera awanî, dezgeh û kesayetanê ajanan têkoşîno şorişgêrî ame kerdene û zafê nê awanî ame rijnayene  û têkoşîn resa şarî. Nê bigeyî de serkêşîya PKKyî de têkoşînêko newe yê kurdan vejîya werte. Vera nê averşîyayîşî  sîstem pê darebeya 12ê Êlula 1980yî cewab da.  Pê destê Kenan Evrenî ame waştene ke PKK bêro eciqnayene. Zîndanê Amedî pê ferzkerdişê îxanetî şiknayîşê îradeyê Apoyî ame hedefkerdene.  Planê qirkerdişî pê Xoverdayîşê Pîlî yê Zîndanê Amedî yê 1982yî û Hemleya Gerîlayan a Şorişgêre ya 15ê Tebexa 1984î ame betalkerdene.

Naye ser o 1985î ra nata NATO vera PKKyî kewt dewre. Na çarçewe de  temmuza 1987î  de 'Rewşa îstîsnayî' ameye îlankerdene, şerê Îran-Irakî  ame qedînayene û Ewropa de‘ dewaya Dusseldorfî ameye rêxistinkerdene û newe ra bêrê îxanetî ameyî kaerdene.  Prosesê 1987-88î de  vera PKKyî hêrişê plankerdeyî yê mîyanneteweyî ameyî kerdene. Na çarçewe de ame waştene ke gerîla bêro eciqnayene û Rayber Apo bibo bêtesîr. PKKyo ke Amed nêeşka bêro mehkumkerdene ame waştene ke Almanya de bêru muhakemekerdene û mehkumkerdene. La no plan zî pê xoverdayîşî ame betalkerdene.

Planê  diyînî yê hêrişê vera PKKyî yê NATOyî   şerê Başûrî yê 1992yî yo . Bingeyê  'Operasyonê Çekîç Guçî' de  Îdareyê Başûrê Kurdîstanî ame ronayene û tewrê dewleta tirke îtîfaq kerd. Pê hêrişê artêşa tirke, peşmergeyanê PDK û YNKyî şer ame rayraberdene. Pê şerî ame waştene ke dewkewtişê PKKyî yê Başûrê Kurdîstanî bêro astengkerdene. Derbeyê bidîyê PKKyî ro zî  waştişê eciqnayîşê gerîlayan û tesfîyekerdişê PKKyî ser nêkewt.

Plano peyên ê NATOyî zî Komployê Mîyanneteweyî yo ke 9ê Teşrîna Verêne de ame destpêkerdene û hema dewam keno. 24 serrî yo serkêşîya Rayber Apoyî de têkoşînê azadî û demokrasîyî yê partî, şar û dostanê yo ke yeno raya berdene komplo betal kerd. Peynî de Xeta Azadîya Apoyîye ya ke Amed û Dusseldorf de ame waştene ke bêro mehkumkerdene na rey ame waşten eke bingeyê komployî de Îmrali de bibo mehkum. La têkoşînê topyekunî destûrê ci nêda.

Tay averberdişê ke 49 serran de ameyî afernayene ma eşkenê wina rêz bikerê: Bêşik averdişo tewr pîl Bîyayîşo Rayberîye yo ke wexto tewr zor ê tarîxî de ame caardene o yo. Heme averberdişê bînî rêçê ci de bîyî. Hîrê serranê verênan de Anqara de xeta azadîye û grûba şorişger ameye afernayene. Serra çarine û pancine de Kurdîstan de Têgêrayîşê Ciwanîyê yê Şorişgêr vejîya werte. Serra şeşîne de 26-27 Teşrîna Peyên a 1978î de dewa Fîsî ya Licê de kongreya ronayîşî  Partîya Karkeran a Kurdsîtanî ameye kerdene û bi nameyê PKKyî biye partîye. PKK mîyanê têkoşînê tarîxî yê Curnê Reşî de ame ronayene û pê xoverdayîşê Girê Sorî nameyê xo da eşnawitene. Têgêrayîşê Apoyî serra heştine de vera derbeya 12ê Êlule de xo mecbur mend ke xo newe bikero. Serra desine de zî Xoverdayîşê Zîndanî aver berd û patşî daye têkoşînê Fîlîstînî. Serra diwêsine de Hemleya Şorişgêre ya 15ê Tebaxe ameye kerdene. Serra hewtêsine de Şorişê Ganîbîyayîşê Neteweyî  vejîya werte. Şorişê Ganîbîyayîşê  Neteweyî yo ke 90yan de dest pê kerd semedê tarîxê Kurdîstanî û şarê kurdî serbûto zaf muhîm û vîrajo tarîxkî yo.

Rayber Apo û PKKyî verê Newroza 1993yî adirbirnayîşo yewhet îlan kerd û prosesê çareserkerdişê demokratîkî yê meseleya kurdî da destpêkerdene.  La tay çeteyanê sabote kerd û newe ra şerêkê giranî dest pêkerd. Serra vîst şeşine de Rayber Apo û PKK raştê hêrişê komployê mîyanneteweyî ameyî.  Xoverdayîşê tarîxî verê îdamî girewt û polîtîkaya helisnayîşî ya Îmraliyî bin fînaye û heme kayê leymînî pûç vetî. Rayber Apo bi paradîgmaya xo  bi rayberê şaranê bindestan.  19ê Temmuza 2012yî de  pê Şorişê Azadîye yê Rojawanî paradîgmaya ci ameye caardene.  Serkêşîya Rayber Apo û PKKyî de heşt serrî yo vera çeteyanê DAÎŞÎ têkoşîn yeno kerdene ke no heme merdimîye paweno. Hewt serrî yo vera‘ Planê çokdayîşî xoverdayîş yeno kerdene. Înanê ke hesabê çokdayîşê kurdan kerdêne ewro înan bi xo vera Heqîqetê Apoyî de çok dayo. Dewleta tirke vera têkoşînê ma yê gerîlayan ê qehremanan ê Garê, Metîna, Zap û Avaşînî de ameye nuqtaya çokdayîşî. 49 serran de nizdê vîst hukmatî bedilîyayî. Peynîya hukmatê AKP-MHPyî zî do sey înan bo. Beno ke sey  dîktatoranê faşîstan ê waranê bînan peynîya ci dahîna bidej bo.

3-Destkewteyê nê 49 serran

Heta nika ma xîret kerd ke bîyayîşê Rayberîye û têkoşînê bêemanî yê 49 serran xulasa bikerê. Ma hêrişanê kolonyalîst û qirkeran reyde serebûtê ke qewimîyayê zî bi kilmî ardî ziwan. Bêşik xêrê nê 49 serran ra şarê kurdî, komel û merdimîye zaf çîyî vistî destî. Her çî ra verî nê 49 serran de Kurdîstan, Tirkîya û pêro dinya de meseleyanê nîqaşan ê tewr girîngan ra yew zî raştîya Rayberîye û PKKyî bîye. Eşkera yo ke 50 serranê verê ma de nê meseleyî hîna zaf do bêrê nîqaşkerdene û hîna manadar bibê. Çunke nêweşîyê modernîteya kapîtalîste vera zêdîyenê, sîstemo dewletperest-îqtîdarperest prosesê rijîyayîşî de yo. Herinda ney de sey alternatîfo ke Rayber Apoyî Kurdîstan de formule kerdo, alternatîfêko bîn ê çareserîye çin o. Coka pêro balî serê Rayber Apoyî û Şorişê Azadîya Kurdîstanî de xorin benê. No xorinbîyayîş prosesê verê ma de do zêdêr bibo.

Bêşik ma nêeşkenê qala pêro destkewteyanê 49 serran tîya de bikerê. La xora girîng o ke ma destkewteyan û serebûtanê girîngan ê 49 serran ser o vinderê. Bêşik Kurdîstan de bîyayîşê Rayberîye bi xo şorişêk o, merdimo azad şorişgêr o û no binge zî mojneno ke mîyanê şarê kurdî de proseso şorişgêr dest pêkerdo. Coka 49 serran de Kurdîstan de şorişê azadîye qewimîyeno. Ma ney rê vanê Şorişê Azadîye yo Apoyî. Rayber Apoyî no sey 'Şorişê Raştîye' pênase kerd û îfade kerd ke Şorişê Raştîye zî şorişêkê hişmendîye û terzê ciwîyayîşî yo. Yanî Kurdîstan de 49 serrî yo vurîyayîşê terzê ciwîyayîş û hişmendîye qewimîyeno. Hişmendî û terzê ciwîyayîşî yo kahan ê kolonyalîstan û hemkaranê înan rijîyenê, herinda ci de hişmendî û terzê ciwîyayîşî yo Apoyî awan benê. Coka girîng o ke ma verî nînan ser de vinderê û nînan biercnê.

Eşkera yo ke na çarçewe de 49 serran de şarê kurdî de vurîyayîş û qewimîyayîşê girîngî estê. Wextê nameyî de cuye kenê beno ke no zêde nêro dîyene, ancax vurnayîş û averberdişêko qetî yenê ciwîyayene. Hişmendî, nêzdîbîyayîşê exlaqî, fikr, krîteranê qebul û redkerdişî, çêrî û fedakarîya kome û merdiman de vurîyayîşê zaf girîng û manadarî ameyê ciwîyayene. Beno ke asta ney goreyê waştişê ma nêbo, reyna zî xeylêk taybetmendîyê ke ma pê şaş manenê ke estê; anca nê pêro zî nêeşkenê şorişê raştîya pîle yê Kurdîstanî yeno ciwîyayene, girîngîya ci kêm biba.

Bêşik wextê vurnayîşanê ke Rayber Apo û PKKyî komel û şarê kurdî de afernayê, çimdarîye kenê, destpêk de lazim o ke vurnayîşê ruhî, hîsî, nêzdîbîyayîşê fikrî, têkilîyê komelkî, erjê ci yê esasî ra biewnê. Çunke Kurdîstan de asta paradîgma de vurnayîşêko şorişgêr qewimîyeno. Sey nimûne mîyanê nê 49 serran de tesîranê qirkerdişê kulturelî reyde vurîyayîşêko pîl qewimîya. Herinda ê kurdanê keyeperest, bêhêbî, nezanan, kahanperest, bêîrade, bêrêxistin, şermok û tirsanokan reyde kurdê wayîrê erjanê komelkî, kurdê fedakar, wayîrê kulturî, wayîrê exlaq, îrade, hiş û ruhê azadîye vejîyayî werte.Komelbîyayîş û netewebîyayîşêk aver şîyê ke wayîrê hişmendîya azadîgîr û demokratîk ê. Krîterê ma yê welatperwerî aver şîyê, aste û hişmendîyêka newîye ya welatperwerîye vejîyayê werte.

Bêşik waro tewr eşkera û dîyaro ke merdim eşkeno çimdarîya vurîyayîşê komelî bikero, cinî yê. Çunke mîyanê komelî de cinîyî rayberîya komelî kenê. Merdim wexto ke biewno nê esasî ra vîneno ke cinîya kurde û coka komelê kurdî Rayber Apoyî û PKKyî reyde asta kesayet û neteweyîye de vurîyayîş û averşîyayîşêko senîn veto werte. Mabênê cinîya kurde ya ewroyîne û 49 serrî verî de qasê koyan ferqî est ê. Cinîya kurda ke 49 serranê verênan de nêeşkayêne keyeyê xo ra vejîya teberî ewro şorişêkê azadîye yê tewr xorin û manadarî yê tarîxê cinîyan kena. Astêka core de bi hhişmendî û rêxistinkerde ya. Asta rayberîye de tewra cuya komelkî û sîyasîye bena. Pawitişê xo yê cewherî û rêxistinbîyayîşê xo yê xoserî aver bena. Nêzdîbîyayîş û fikrê cinîyan komelî ser de vurîyayîşê pîlî viraştî. Verî komel û camêrdê kurdî vatêne 'Cayê cinîye keyeyê ci yo' la ewro ma ewro xo resna raştîya camêrd û komelêkî ke binê îdare û fermandarîya cinîyan de ciwîyenê û şer kenê. Zanebîyayîş, rêxistinbîyayîş, bawerî, çêrî û fedakarîya cinîyan krîteranê komelê neweyî eşkera kenê. Nê esasî ser de krîteran reyde raştîya cuyêka azade virazîyena û kesayetêko azad o newe û komelêko demokratîk awan beno. Cinîya azade û camêrdo azad şikl gênê.

Babetanê tewr girîngan ra yew zî no yo ke kesayet û komelê kurdan de dîyeno ke averşîyayîşê rexnekerdiş û rexnedayîşî yo. Kesayeto rik û hişk şi, herinda ci de kesayetêko rexnegîr û rexnedayox ame. Cuye û têkoşîn de merdimêko nerm û zanaye ke eşkeno kêmasî û şaşîyanê cuye bikero bivîno, qebul bikero, bi rexneedayîşê hêzê vurnayîşê înan mojneno vejîya werte. Rayber Apo wexto ke wextê vîyarteyî rexne kerdêne qala raştîya 'merdimo ke bêteredut seba kergêke cîranê xo kiştêne, ancax seba welat û azadîye qasê serê derzîne çîyêk nêkerdêne' kerde. Nika raştîya merdimî ke vejîyaya werte cîranê xo de beno yew, meselaynê welatî û azadîye nîqaş keno, rêxistin beno. Bi nê hawayî exlaqê cuye û xebata merdimê kurdî vurnayîşê cidîyî kerdî. Kesayet de zanayebîyayîşê komelkî û hîsê mesuldarîye zêdêr aver şîyê. Lazim o ke nê pêroyînan sey merdimo/a newe/newîye, komelo newe bêrê pênasekerdene.

Bêşik çarenusê nê vurîyayîşan armanc û krîterê nê komelî raştîya Rayber Apoyî eşkera kenê. Coka ganî merdim sey averşîyayîşê tewr girîngî yê 49 serran raştîya Rayber Apoyî bivîno ke hetê komelê kurdan ra astêka core de qebul dîya û ewro pêro şaran û bindestan ra vila bîya. Eşkera yo le PKK têgêrayîşêkê Rayberîye yo, dormeyê Rayber Apoyî de awan bîyo, aver şîyo û xo resnayo ewro. Ciwanîye-roşnvîrîya kurdan şexsê Rayber Apoyî de krîterêkê azadîye aferna, bi nê hawayî averberdişo tewr girîng ê tarxî vejîya werte. Na çarçewe de Bîyayîşê Rayberîye zî esas sey destpêkî beno rayberîyêka wayîrê karakterê neteweyî. Xora tîya ra netîceyêka bîne nêvejîyaye.

Rayber Apoyî seba wayîrvejîyayîşê rayberanê şorişgêran ê Tirkîya Mahîr Çayan, Denîz Gezmîş û Îbrahîm Kaypakkaya, seba dekerdişê vengîya erkanê rayberîye Newroza 1973î de vejîyayîşê xo kerd. Dima şîyayîşê Kurdîstanî bi, ey PKK aver berd. Destpêkê temmuza 1979î de wextê vejîyayîşê warê Rojhelatê Mîyanênî ra nata zî xebatanê xo yê warê Lubnan-Filîstînî reyde, vera rejîmê faşîstî-leşkerî yê 12ê Êlule PKK kerd partîyêka gerîlayan. Esas de bîyayîşê Rayberîye yo yewin beno afernayîşê zanebîyayîşê teorîk û xeta qerardarî-polîtîke, Bîyayîşê Rayberîye yo Diyîn sey esas hêzê xo xeta leşkerîya gerîlayan ra girewt. Nê wird prosesî zî esas çarçewa neteweyîye de yê. La hetê Kurdîstanî û merdimîye ra mana û girîngîya înan tarîxî ya.

Bêşik Bîyayîşê Rayberîye yo tewr xorin prosesê Îmraliyî de bi vurnayîşê paradîgma aver şîyo, no beno Bîyayîşo Hîrêyîn. Eşkera yo ke averşîyayîşêkê winasênî de rolo tewr girîng binkewtişê sosyalîzmî û hêrişê Komployê Mîyanneteweyî yê. Destpêkê 1970î de vera meseleyanê kurdan o kewt mîyanê rexnedayîşî, narey vera meseleyanê pêro merdimîyan rexnedayîş qewimîya. Coka netîceya ney pêro merdimîye eleqedar kerd, çareserîya meseleyanê azadî û felatê pêro bindestan xo de ardî, bi nê hawayî Bîyayîşê Rayberîye yo Hîrêyîn bîyo global. Kanwazîya mîyanneteweyîye wexto ke bi komployî waşt Rayber Apoyî bêtesîr bikero, narey raybertîyêke reyde têrî mende ke rayîrê azadî û felatê bindestan nîşan kerd.

Eşkera yo ke mefhûmo dîyarker ê Bîyayîşê Rayberîye yê Yewinî bîyo 'kolonyalîzm' û mefhûmo esas ê Bîyayîşê Rayberîye yê Diyînî bîyo 'gerîla', mefhûmo bingeyî yê Bîyayîşê Rayberîye yê Hîrêyînî bîyo 'demokratîkbîyayîş.' Averşîyayo ke bi tesbîtê 'Kurdîstan kolonyal o' vejîyayo werte, bi tesbîrê 'xoverdayîşê gerîlayan' xo resna xeta stratejîke, bi tesbîtê 'çareserîya demokratîke' zî vera Komployê Mîyanneteweyî hem teorî û taktîkê têkoşînî hem zî metodo newe yê çareserîya meseleya kurdan vete werte. Şertanê modernîteya kapîtalîste de seba çareserîya meseleya kurdan no metod sere de meseleya cinîyan de pêro meseleyanê komelî de modelê çareserîye vet werte.

Rayber Apoyî bingeyê tesbîtê nikayênî de komel û averberdişê komelê tarîxî newe ra ercnayî. Ey bê îqtîdar û dewlete sey îdareyê cewherî yê komelî 'Îdareyê demokratîkî' pênase kerd. Nê esasî ser o sey îdareyê bêdewlete 'Konfederalîzmê demokratîkî' û modelê çareserîya meseleyan 'Xoserîya demokratîke' pênase kerd. Sosyalîzmo ke esasê cîyayîyanê krîteranê têdûştîye de ronîyayo, krîterê azadîye esas gêno, nêeşkeno bi hacetê teda û kedwerdişî, yanî bi dewlete û îqtîdarî nê krîteran bîyaro ca. Coka Rayber Apoyî 'sosyalîzmo demokratîk' pênase kerd û bi nê hawayî têkoşînê azadîye û têdûştîye de nakokîya armanc-hacet çareser kerd, ahengê armanc-hacetî vet werte. Nê esasî ser de nê pêroyîyan vera 'Modernîteya kapîtalîste' 'Modernîteya Demokratîke' pênase kerde, PKK xeta îqtîdare û dewlete ra vet, azadîya cinîyan û ekolojîke reyde komel vurna partîyêka komelpereste ya demokratîke.

Şertanê Îmraliyî de cipersayîş û xorinbîyayîşê rexnedayîşî, bi sebeb ke PKK sîstemê îqtîdar û dewlete derbaz bikero. Bi nê hawayî vera komployî xeta serkewtişî de têkoşîn aver bero, seba pêro meseleyanê komelkîyan ê sîstemê îqtîdar û dewlete teorî, program û stratejîya çareserîya demokratîke biaferno. Bi nê hawayî hem PKK vurîya, vurna û hem zî Rayber Apo bi mojnayîşê rayîrê felatî bi global. Verî Rayberîye Bîyayîşê Hîrêyînî reyde bîyo rayberê pêro bindestan. Seba kurdan Bîyayîşê Rayberîye bi averşîyayêko tarîxî, seba pêro bindestan bi destkewte. Tesîrê averşîyayîşê Rayberîye her serre asta xorine de yeno hîskerdene û seserra 21. de do bibo seserra Rayber Apoyî. Xora nê prosesî dest pêkerd zî.

Bêşik Bîyayîşê Rayberîye reyde û averşîyayîşê Şorişê Raştîye reyde destkewteyanê tewr pîlan ê nê 49 serran ra yew zî serkêşîya partî û gerîlayan a. Eşkera yo ke PKK û PAJK aktîfbîyayîş û rêxistinbîyayîşê xeta Apogîre yê. Gerîlayî zî benê metod û xeta fedakarî-milîtanîye, serkêş û pawitoxê bingeyî yê cinîyan û şarê kurdî yê. Pawitişê cewherî yê şar û cinîyan gerîlayan reyde xo resna serkêşîya partîye.

Hol biewnê krîterê şorişgêrî yê PKK û PAJKî zaf berz ê, xeta milîtanîya fedayîye de yê. Her çiqas nameyê înan partîye biba zî, çepî ra bigêrê heta raştî dinyaya ewroyîne de partîya ma bena serkêşîya partîyêka newîye. Reyna raştîya gerîlayan a ke HPG û YJA-Star de geş bîya, xeta azadî-fedayîtîye de ya û seranserê tarîxî de raştîya gerîlayêko winasên nêbîyo. Ganî na rewşe hol bêra famkerdene û dîyene. Kurdîstan de raştîya partî û gerîlayan bin nêkewena û tim aver şina. Vera na raştîye zere û teber de hêrişî ameyî kerdene zî qet yew hêz nêeşkeno raştîya partî, gerîlayan û cewherê xeta milîtanî-fedayîtîye çin bkero.

Ma ard ziwan ke Ganîbîyayîşo Neteweyî yê 1990î hetê netewebîyayîşê demokratîkî î komelê kurdan ra çend girîng o. Ney zî tim tesîrê destkewte û averşîyayîşan kerd. Reyna ma eşkera kerd ke nê prosesî de Şorişê Azadîya Cinîyan dest pêkerdo. Nê wird şorişî benê pratîkê Şoreşê Raştîya Apogîre û roja ewroyîne de Şorişê Azadîya Rojawanî de geş beno. Bi taybetî Şorişê Azadîya Cinîyan sey azadîya tewr xorin û tesîrîne ya tarîxî, sey raştîyêka şorişgêre do tim biciwîyo.

Sîyaset û hişmendîya serdestîya camêrdan sey metodê tewr kedwerdeyî û tersnayîşê tewr barbarî vejîya werte. No kaos û krîz her ke şino benê xorinêr. Coka sere de cinîyî vera nê sîstemî têkoşînê azadî û têdûştîue aver şinê. Sey kurdan, cinîyî zî sîstemê kapîtalîzmî de dişmenîyêka xorine vînenê. No zî çar hetanê dinya de çalakî, rêxistinbîyayîş û zanayîşê cinîyan aver beno. Ewro qebul beno ke seserra 21. seserra cinîyan a û na raştîye do roje bi roje aver şora. Bêguman têkoşînê winsênî de zî cinîyê kurdî û Têgêrayîşê Cinîyanê Azadan asta serkêşîye de cayê xo gênê. Ewro Têgêrayîşê Azadîya Cinîyan ê Kurdîstanî û Şorişê Azadîya Kurdîstanî pêro dinya rê benê çimeyê îlham û moralî, têkoşînê Kurdîstanî coş, kelecan û hêvî dano her kesî.

Bêşik seba ke Têgêrayîşê Azadîya Cinîyan ê Kurdîstanî sîstemê serdestîya camêrdan ra cîya bîyo, dormeyê cinîya azade de, hedefê cuyêka azade de, verê rayîrêkê akerdeyî de şino. Rayber Apoyî hem xorinîya sîstemê koletîye yê cinîyan vete werte, hem zî metod, stratejî, bername, teorî û hişmendîya azadîya cinîyan aver berdî. Coka Kurdîstan de Şorişê Azadîya Cinîyan wayîrê bingeyanê teorîkan ê xurtan, bernameyêkê aktîfî û stratejîyêka îsbatkerde yo. Sey PAJK, KJK û YJA-STARî wayîrê serkêşîye û rêxistinêka aktîf o, bi hezaran şehîdê ci est ê û wayîrê tecrubeyanê pîlan o. No Têgêrayîşê Azadîya Cinîyan destkewteyanê tewr girîngan ra yew o.

Bêşik xoverdayîşo 49 serre zî beno dewtkewteyo tewr pîl. Teslîmîyet, reformîzm, gefwerdiş ameyê şiknayene, xeta çêrîye de tewir, fedakarî, xoverdayîş û kulturêkê xoverdayîşî ameyê afernayene. Kurdê ke Rayber Apoyî rexne kerdî, bi des hezaran milîtanan xeta fedayîtîye de şer kenê. Bingeyê xeta fadîtîye de Kurdîstan de krîterê şorişgêrî û welatperwerîye ameyî berzkerdene. Raştîya merdiman ameye averberdene.

Zaf eşkera yo ke PKK xeta azadîye de çend têgêrayîşê çêrîye bibo hende xeta neteweyîye de zî têgêrayîşê çêrîye yo. Panc hezarî ra zêdêr şehîdê PKKyî est ê. PKKyî vera Darbeya 12ê êlule, Xoverdayîşo Pîl ê Zîndanan ard ca, Hemleya 15ê Tebaxe daye destpêkerdene, vera Komployê Mîyannetweyî zî 24 serrî yo xo ver dano. Bi kilmî nê serebûtan xoverdayîş vet werte. Hînî qet yew hêz nêeşkeno verê nê ruhî bigêro û xoverdayîşî çin bikero.

Reyna têkoşînê 49 serrî yê PKKyî Kurdîstan, Tirkîya û dinya de rayîrê averşîyayîaşnê sîyasîyan ê mendeyan û girîngan akerdî. Statuyê Başûrê Kurdîstanî de zî rolê têkoşînê PKKyî est o. Hetê bînî ra Şorişê Azadîya Rojawanî raşta raşte netîceya têkoşînê PKKyî de qewimîya û xo resna nê rojan. No şoriş xêrê keda vîst serran a Rayber Apoyî ra payan ser de vindeno.PKKyî Şingal de pê astengkerdişê hêrişanê DAÎŞî, êzidîyî aver berdî, Mexmûr de bi vindrnayîşê DAÎŞî, Başûr pawit. Reyna têkoşînê PKKyî Vakur de komelê neteweya demokratîke û sîyaseto demokratîk aver berd.

Tirkîya û dinya de tesîrê Rayber Apo û PKKyî sey teorîk û pratîk di het ê. Xeta sosyalîzmê demokratîkî û Teorîya Modernîteya Demokratîke ya Rayber Apoyî nê waran de roje bi roje zêdîyenê. Paradîgmaya Rayber Apoyî her ke şino eleqeyêkê pîlî vinena. Xeta Apogîre, pêro dinya de roşnîbîyayîşêkê neweyî pêşkêş kena. Bi taybetî na paradîgma seba merdimîye sentezêko newe aferna. No zî beno sebeb ke her kes xo tede bivîno û naye qebul bikero.

Zaf eşkera yo ke Şorişê Azadîya Kurdîstanî parçeyêko aktîf ê Şorişê Tirkîyaya Demokratîke yo. Têkoşînê azadîya Kurdîstanî têkoşînê demokrasî yê Tirkîya xo zereyî de muhtewa keno. Yanî azadîya kurdan û demokratîkbîyayîşê Tirkîya pabesteyê yewbînan ê. Coka azadîya Kurdîstanî do biba sebebê demokratîkbîyayîşê Tirkîya. Heman rewşe seba dinya û Rojhelatê Mîyanênî derbazdar a. Bê azadîya kurdan Rojhelatê Mîyanênî de dinyayêka demokratîke nêqewimîyena.

Bêşik asta qerardarî hetê pozîtîfî ra rayîrê rewşêka winasêne akena. La Kurdîstan de qelsbîyayîşê hakîmîya kolonyalîzmî ya netewe-dewlete raşta raşte statukoyê sîyasî yê Rojhelatê Mîyanênî û sîstemê modernîteya kapîtalîsete rê tesîr keno. PKKyî nê 49 serran de derbî dayî ajanîye û serdestîya faşîste. Na rewşe Tirkîya de dîktatorîya faşîst-olîgarşîke bi hawayêkê cidîyî qels kerda û faşîzmê AKP-MHPyî ard verê rijîyayîşî, Rojhelatê Mîyanênî de derbe daye netewe-dewlete.

Merdim eşkeno na rewşe bi zelalî Şerê Dinya yê Hîrêyînî de bivîno ke Rojhelatê Mîyanênî de yeno kerdene. Bi nê armancî ame waştene ke destpêkê serranê 90an de bi 'Operasyonê Çekiç-Guç'î Başûr de verê PKKyî bêro girewtene û Vakur de PKK bigêrîyo binê ablûka. Xora seke zanîyeno Komployo Mîyannetweyî zî bi heman armancî ame kerdene û dewleta tirke bi şertê teslîmkerdişê Rayber Apoyî destek da Amerîka ke mudaxeleyê Bexdadî bikero. Ê hêzê Rayber Apoyî ra tersayî. Wextoo ke Rayber Apo îdare de bi Amerîka nêeşkaye mudaxeleyê Bexxdadî bikera. Rewşêka winasêne de Başûr û Iraq de bihêzbîyayîşê PKKyî ra ê tersayî, hêrişê xo taloq kerdî verî Komployo Mîyanneteweyî kerd.

Heta nika PKKyî bi têkoşînê xo serdestî û statukoyê Rojhelatê Mîyanênî teşhîr kerd, mudaxeleyê vera Rojhelatê Mîyanênî qels kerdî. La heta nika PKK nêeşka bi temamî verê nê mudaxeleyan bigêro. No zî seba ke bi hawayêkê serkewteyî pratîzenêkerdişê xeta Apogîre ra bi. Famkerdişê nê raştîyan kerd ke PKK qelsîyanê xo derbaz bikerê û bi têkoşînê xo yê bitesîrî Têkoşînê Rojhelatê Mîyanênî aver bero. Têkoşînê serra 50. do averşîyayîşanê winasênan hîna zaf vejo werte.

4-Erkê serra 50.

Sey têgêrayîş, şar û dostanê ma Hemleya Wext Wextê Azadîye reyde ma kewenê serra pancasine. ya Rayberîye û Partîye. Ma wazenê bi hemleyêka winasêne şerê şarî yê şorişgêrî biresnê serfîrazîye, faşîzmê AKP-MHPyî birijnê, sîstemê tecrîd û îşkenceyî yê Îmraliyî parçe bikerê, azadîya Rayber Apoyî, Kurdîstanê azadî, Tirkîyaya demokratîke û Rojhelatê Mîyanênî yê demokratîkî bîyarê ca. Eke ma bieşkê nînan bikerê û metodanê afernayoxan de têkoşîn bikerê bawer bikê ke ser bikewê.

A raşte netîceya têkoşînê 23 serran de Komployo Mîyanneteweyî astêka berze de ame teşhîrkerdene û derbe dîyaye piro, tedaya sîyaset û hişmendîya qirkere ameyî teşhîrkerdene, ame mojnayene ke sîstemê tecrîdî senî zerar dano her kesî, Îdareyê Erdoganî yê 20 serran ame bêhêzkerdene. Rixmo ke paştîya xo daya MHPyî sîstemo kolonyalîst-qirker ê Eroganî bi hawayêkê zelalî vejîya werte. Amerîkaya ke erkê servistişê komployî girewtbi xo ser, îdareyê ci de bin kewte, nê têkilîyanê xo ra bi qismî xirab bîya. Bi nê hawayî sîstemo komploger mîyanê xo de parçe bi, qels bi.

Mîyanê nê têkoşînê çetinî de tay zehmetîyê ma qewimîyayî zî û bedelê giranî dîyayî zî ma zî xo resna destkewteyanê girînga. Her çî ra verî ma tecrubeyêko hol vist dest, goreyê hewcedarîyan stratejî û taktîkî newe kerdî. Têkoşînê ma yê vera DAÎŞî têgêrayîşê ma pêro dinya ra da şinasnayene. Bi destekê Amerîka û PDKyî planê îmha û tasfîyeya faşîzmê AKP-MHPyî ameyî pûçkerdene. Tewr peyên 2021 de xoverdayîşê pîlî yê Garê, Metîna, Zap û Avaşînî serkêşîya cinî û ciwanan de çalakîyê şar û dostanê ma ardî astêka bihêzêre. Netîce de ma bi serkewtişî kombîyayîşê serraneyî kerdî, nînan ra dersê zengînî vetî, ma bihêzêr û amadekarêr kewtî serra pancasine. Coka ma eşkenê têkoşîn bikerê, îmkanê ma yê ney est ê.

Nê esasan ser de ganî ma verî serra pancasine. de raştîya Rayberîye û PKKyî hol fam bikerê, tesîr û serkewtişanê ci bivînê. Ma do her çar parçeyanê Kurdîstanî de hem zî çar hetanê dinya de ney bikerê. Ma do xeta Apogîre de mîyanê dinya de na raştîye vila bikerê, biresnê rêxistin û çalakîye. Çunke têkoşîno serkewte û destvistişê serfîrazîye pabesteyê ney ê. Hem girewtişê biranê raştan û hem zî caardişêko afernayox do nê esasî ser de bêro ca.

Nê esasî ser o ganî tay heta ra nêzdîbîyayîşê bi Rayberîye rexne û sereraşt bibê. Raşt o, ma pabesteyê raştîya Rayberîye yê, bi çêrî û fedakarîya pîle têkoşîn zî kenê. Na babete de kêmasîyêke çin a. La na rewşe qîm nêkena. Tewrbîyayîşo raştikên, raştfamkerdiş û serkewtiş bi famkerdişê raştîya Rayberîye mumkîn ê. A raşte asta cigêrayîşanê ma yê serê Rayberîye qîm nêkena. Halbukî ganî ma zêdêr raştîya Rayberîye ser o vinderê, cibigêrê, pratîkan bikerê, meseleyan biingeyê xeta Rayberîye de çareser bikerê.

La ma zafêr wina nêkenê û fikranê xo yê şexsîyan vejenê vernî, nê fikran de israr kenê û ferz kenê. Yanî ma caardişê xebata kolektîfe û vurnatîşê embazanê xo de qels ê. Ma nêeşkenê têkoşînê xo rê dewam bikerê. Ma têkoşînî bi helnayîşî têmîyan kenê. No zî keno ke ma bikewê peyê çareserîyanê lezabezan. Halbukî çareserîya demokratîke, ma rê afernayîşê sîstemêkê alternatîfî wazeno. Ganî ma nê rayîr û metodan zêde bikerê. Nê esasan reyde şorê sereraştkerdişî, xo bikerê kadro û welatperweranê pisporan ê Şorişê Raştîya Apogîre ser bivisnê.

Eşkera yo ke nê bingeyê stratejîya şerê şorişgêrî de Hemleya Wextê Azadîye ma bîyarê ca. Na çarçewe de hedefê ma zelal ê. Ma do faşîzmê AKP-MHPyî birijnê, Kurdîstanê azadî, Tirkîyaya demokratîke û Rojhelatê Mîyanênî yê demokratîkî awan bikerê, sîstemê Îmraliyî parçe bikerê, azadîya Rayber Apoyî bîyarê ca. Coka ganî ma seba caardişê nê armancan xo serkewtişî rê kilît bikerê. Ganî ma pêro xebatanê xo û erkanê xo serkewtişî rê kilît bikerê. Ganî ma plananê xo nê armancan ser o bikerê û erkanê cîyayan bikerê rojdemê xo.

Hetê bînî ra nê erkî ancax pê şerê şarî yê şorişgêrî ser kewenê, eşkera yo le bi metodanê cîyayan têkoşînê serkewtişî nêbeno. Armancê ma yê nikayênî ancax bi şerê şarî yê şorişgêrî yenê ca. Ganî her ca de xebat û têkoşînê ma goreyê ney bibê û şerê şarî yo şorişgêr aver şêro. Ma nêeşkenê ge bi metodê şerê şarî têkoşîn bikerê ge zî pê metodanê bînan têkoşîn bikerê.Coka ganî ma stratejî-metodê xo zelal bikerê.

Ganî ma hem armancanê hemle, hem zî metodê şerê şarî yê şorişgêrî yew bikerê. Ganî ma têkoşîn û nînan pêro waran de goreyê hewcedarîyanê şerê şarî aver brê, ser bivisnê, bîyarê ca û destek bidê. Ma nêeşkenê vajê ke 'Na stratejî de şer est o, halbukî ez propaganda yan zî xebata girseyîye kena.' Pêro têkoşîn û xebata xo ya sîyasî, leşkerî, qerardarî ganî ma goreyê hewcedarîyanê stratejîya nikayêne rêxistin bikerê, bîyarê ca ke xizmetê serkewtişî bikerê.

Nê esasan ser o sere de hêzê gerîlayan ê çêrî pêro hêzê gerîlatîye fedayîye bişuxilnê, pêro metodanê şerî bimojnê û bi her hawayî Hemleya Serra 50. rê serkeşîye bikerê, koyan, desştan, şaristanan û her ca de AKP-MHPyî hedef bikerê. Pawitişo cewherî yê şarî, xebatanê keşf û îstîxbaratî bihêzêr bikero, dişmenê faşîstî zî bipelxîno. Ciwanî wa verê xo hîna zaf bidê waranê gerîlayan û pawitişê cewherî, şerê şorişgêrî vila û pîl bikerê.

Şarê ma yo welatperwer wa serkêşîya têgêrayîşê cinîyan û ciwanan de, parçeyanê Kurdîstanî û teberê welatî de perwerde û rêxistinbîyayîşê xo aver bero û nê esasî ser de tim aktîf bibo, bi çalakîyanê afernayoxan şerê şorişgêrî, rêxistinîya xo bitesîr bikero. Şarê ma wa pêro xebatanê awankerdişê komelî de esasê perwerde û rêxistinbîyayîşî de goreyê hewcedarîyanê şerê şorişgêrî û bingeyê pawitişê cewherî de aver bero, esasê xoverdayîşê şorişgêrî yê topyekunî de bihêzêr bikero. Wa têgêrayîşê ma yê cinî û ciwanan têgêrayîşê komelkî reyde serkêşîya serfîrazîye bikerê, bi tewrbîyayîşê gerîlayan û pîlkerdişê xoverdayîşî rolê xo bi serkewtişî bîyarê ca.

Pêro xebatê ma yê propaganda û ajîtasyonî do bingeyê Hemleya Serra pancsine. de bêrê kerdene, hetêkî ra do xeta Rayberîye de perwedeyê şarî û dostan bêrê averberdene û têkoşînêko qerardar bêro kerdene. Hetê bînî ra êyê ke xo biresnê a aste do bieşkê şerê psîkolojîkî yê taybetî çin bikerê û propagandaya raştikêne ya şerê şarî bikerê.

Xebatê ma yê huner û edebîyatî do serra pancasine de pratîkê hemle de vejîyê werte, hetêkî ra vera hêrişan têkoşîn bikerê, bizanê înan pûç bikerê, hetêkê bînî ra zî şorişê kulturelî bîyarê ca ke seba şorişê azadîye hewcedarîyêka girîng a.

Xebatê ma yê teorîk û perwerdeyî asta têgêrayîşê ma de, asta serra 50. de do bimojnê ke seba vilakerdiş û vervistişê şoreşê entelektuelî yê Rayber Apoyî, seba amadekerdişê kadroyanê heewcedaran ê têkoşînî biresê asta qîme.

Bêşik xebatanê ma yê tewr girîngan ê serra pancasine ra yew zî xebatê ma yê têkilîyê teberî û îtîfaqî yê. Komîte û temsîlkarê ma yê dîplomasî her ca de xebatanê dîplomatîkan do bikerê, şaranê Tirkîya, Suriye, Iraq û Îran û dinya reyde têkilîyan-îtîfaqan aver berê, girîngîye bidê têkoşînê hemparî, mîyanê îtîfaqanê stratejîkan de zî xîret bikerê ke jer hawayî yewîye û îtîfaqî vejîyê werte. Sere de şarê tirk, ereb, fars, armenî û sûryanî û şaranê pêro herême reyde xebata Yewîya Rojhelatê Mîyanênî bikerê, têgêrayîşanê cinî, ciwan û karkeran reyde, têgêrayîşanê ekolojîstan-antîkapîtalîstan-antîfaşîstan reyde xebatanê ma yê têkilî û îtîfaqî bihêz bikerê. Ê do her kesî rê seba têkilîye ber abikerê, nakokîyanê mîyanê sîstemê dewletperestî ra îstîfade bikerê û nê esasî ser o faşîzmê AKP-MHPyî tecrîd û teşhîr bikerê.

Pêro partî, komîte û rêxistinê ma seba serfîrazîya serra panasine waran de erkê xo bîyarê ca, planan bikerê û averberdişê pratîkê şorişgêrî de înîsîyatîf bigêrê.

Nê esasî ser o ma venga pêro partî, komîte û rêxistinanê ma, pêro embazanê partîye, gerîlayanê çêran, têgêrayîşanê cinî û ciwanan, şarê ma yê welatperwerî danê ke raştîya Rayberîue û partîye serra 50. de fam bikerê, erkanê na serre hol bizanê, wayîrê ci vejîyê û serra pancasine. de Hemleya Wextê Azadîye biresnê serfîrazîye ke armancê ci azadkerdişê Rayber Apoyî yo!

Ma venga dostanê ma yê ercîyayeyan, pêro hêzanê şorişgêr û demokratîkan ê Tirkîya, têgêrayîşanê cinî û ciwanan, rêxistinanê karker û kedkaran, pêro hêzanê bindestan danê ke vera sîstemê dewleta tirke û faşîzmê AKP-MHPyî bingeyê azadîya kurdan de Tirkîyaya demokratîk biafernê!

Ma venga pêro şarê erebî, hêzanê demokratîk-şorişgêran û şaranê bindestan, rêxistinanê cinîyan û ciwanan, dormeyê antîkapîtalîst û antîemperyalîstî yê Rojhelatê Mîyanênî danê ke vera dîktatorîyanê netew-dewlete yê ajan û serdestîya xerîbe ya herême pîya têkoşînê demokrasî û azadîye bikerê, Konfederalîzmê Rojhelatê Mîyanênî biafernê ke şarê ma tede azad biciwîyê!

Ma venga hêzanê sosyalîst, şorişgêr û demokratîkan, rêxistinanê cinî û ciwanan, têgêrayîşanê ekolojîstan, dormeyanê karker û kedkaran, pêro rêxistin û partîyanê antîkapîtalîstan û antîemperyalîstan, dormeyanê demokratîkan ê dinya danê ke vera sîstemê îqtîdar û dewlete û nîzamê modernîteya kapîtalîste têkoşînê azadî, demokrasî, wayûbiratîye pîya bikerê, Konfederalîzmê Demokratîkî yê Dinya biafernê ke tede her kes bi azadî û demokratîkî biciwîyo!

Wa her ca de û bi her hawayî kanwazî bitersa, bizana ke şorişgêrê seserre; Apogîrî yenê! Şorişê Raştîya Apogîre her war de game bi game vila beno!

49 serranê verênan de çîyê ke ma kerdê, do serra pancasine ya Rayberîye û PKKyî de bibê nengûyê ê çîyan ke ma do bikerê!

Nê esasan ser o ma sere de yê Rayber Apoyî, Roşanê Newroza Azadîye yê pêro embazanê partîye, şarê ma yê welatperwerî û dostanê ma yê şorişgêran-demokratan reyna fîraz kenê. Serra pancasine. ya Rayberîye û partîye bikerê serra serfîrazîye û têkoşînê tewr pîlî yê tarîxî!