2ê temmuza 1993î hunermend û roşnvîrî seba ke tewrê Şayîya Pîr Sultan Abdalî binê şîbî Sêwas. Înan ra tay kesî sey Azîz Nesîn, Metîn Altiok, Hasret Gultekîn, Nesîmî Çîmen, Asim Bezîrcî û Ugur Kaynar nuştox û hunermendê namdarî bî.

Qirkerdişê ra di rojî verê cû pê vilawekî qala maqaleyêka Azîz Nesînî ameyêne kerdene ke Nesînî kitabê Salman Ruşdîyî yê bi nameyê ''Ayetê Şeytanî'' ra açarnaybî. Bi nê hawayî Azîz Nesîn amebi hedefkerdene.

2ê temmuze nimajê îneyî ra dima girseyêk pê sloganan ver bi merkezê kulturî yê aktîvîteyan şi. Beşêkê girseyî peykerê ''Ozanê şarî'' rijnayêne û erdî ra kaş kerdêne. Saete 18:00 de verê Otêla Madimakî de hema hema 15 hezar kesî ameyî pêser.

Verê otêle de peyker û wesayîtî ameybî vêşnayene û pancerayê otêle şikîyaybî. 2 saetan ra dima otêle ameye vêşnayene. Hêzê xelisnayîşî zî wextê xo de nêameyî û êyê ke ameyî zî tay bîyî. 35 tenan otêle de dinyaya xo bedilnaye. Înan ra 33 tenî beşdarê şayî bîyî, 2 kesî zî xebatkarê otêle bîyî.

Serekwezîra ê çaxî Tansu Çîller derheqê şewatê Madimak Otêle de nê çîyî vatbi: ''Homayî ra şikir bo ke zerarêk nêresa şarê ma yo ke teberê otêle de bi.''

Serekkomarê ê çaxî Suleyman Demîrelî zî serebût sey ''rijîyayîşê otêlêke'' ercna. Reyna Wezîrê Karanê Zereyî yê ê çaxî zî Azîz Nesîn pê îdîaya tahrîkkerdişî sûcdar kerdêne.

Avûkatanê versûcan ra Wezîrê Edaletî yê Îqîtdarî Refahyolî Şefket Kazanî wextê wezîrîye xo de ê zîndan de zîyaret kerdî. Reyna nê avûkatî tewrê AKP û Partîya Saadetî bîyî wezîfeyanê berzan de ca girewt. Nika nê avûkatan ra yewê ci wezîr çar hebî parlamenterê AKPyî yê.

Îdîanameyê dewaya serebûtî de sey sûcdarî beşdarê şayîye û estbîyayîşê Azîz Nesînî ameyî mojnayene. Dewa de ame îfadekerdene ke 'çalakîye' vera Azîz Nesînî bîye.

Derheqê 22 versûcan de 15 serran, derheqê 2 versûcan de 10 serran, derheqê 54 versûcan de 3 serran û derheqê 6 versûcan de 2 serran cezaya zîndanî ameye dayene. Derheqê 37 versûcan de zî bira veradayîşî ameye dayene. La na bire temyîz bîye. Hukmkerdişê dergî ra dima versûcan ra 33 tenî cezaya muebedî girewte, 4 versûcan rê cezaya zîndanî ya 20 serran û versûcêkî rê zî cezaya zîndanî ya 15 serran ameye dayene.

Dewa, temyîz û waştişanê avûkatan bi serran dewam kerd. Dewaya Qirkedişê Sêwasî 20 serran ra dima pê bahaneya ''wextê ci vîyarto'' ameye qefilenayene. Merdim, avûkat, partî û rêxistinanê komelê sivîlî waşt ke dewa dewam bikera la waştişê înan nêame caardene.

Recep Tayyîp Erdogano ke o çax serekwezîr bi, derheqê qefilîyayîşê dewa de wina vat: ''Şar û welatê ma rê fîraz bo.''

Avûkatanê dewaya Qirkerdişê Sêwasî  bira qefilîyayîşê dewa temyîz kerde la sûcdarê qirkerdişî hema zî nêameyî hukmkerdene. Xeylêk sûcdarî remayî teberê welatî. Tewr peynî de emser aşma çele de sûcdaranê qirkerdişî ra Ahmet Turan Kiliç zî pê efûya taybete ya Serekkomarîye ame veradayene.