Serekê verênî yê Dayîreyê Kontraterorî yê MÎTî Mehmet Eymurî îtîraf kerdbi ke 1996 de înan xîret kerd ke Şam de vera Rayberê Şarê Kurdî Abdullah Ocalanî suîkast bikerê.

Eymurî derheqê operasyonê suîkastî yê vera Rayberê Şarê Kurdî Abdullah Ocalanî de kanalê televîzyonî de wina vatbi:

''Ma her cayî ra ameyî astengkerdene. Çevîk Bîr o çax serê îstîxbaratî de bi. MA tonêk teqaber girewt. Roja bîne rojnemeyê Cumhurîyetî de nuşteyêkî wina vatêne 'MÎT do nê tebaweran se bikero?' Ma serekkomarî ra, sîyasetmedaran ra destûr girewt. Xora bêdestûr nêbeno. Serekê Pawitişî û serekkomarî destûr dabi ci. Ma nînan rê agahîyê destê xo pare kerdî, qala xebatanê xo kerde. Înan vat he ma zî dewam kerd. Ekîpêke hol bîye. Tede Yeşîl, leşkerî, wezîfedarê fermî yê nimiteyî estbîyî. A raşte operasyon xirab nêbi. Ma nêeşkayî Apo bikişê la ma teqayîşêko winasên kerd ke pêro Sûrîye tersaye.''

No suîkast destpêkê Komployê 9ê Teşrîna Verêne ya 1998î bi. Rayberê Şarê Kurdî raywanîya Şorişê Kurdîstanî de xeylêk reyî bi hedefê suîkastan.

Reya verêne ronayîşê PKKyî ra verî 18ê gulana 1978î de vera Ocalanî suîkast ame kerdene. Rayberê Şarê Kurdî wexto ke şîyêne Hîlwan rayîr de raştê hêrişî ame. Ocalan nê hêrişî ra weş û war xelisîya.

1995 de selahîyetdaranê tirkan pê rayîrê mabênçîyan Ocalanî ra adirbirnayîş waşt. Rayberê Şarê Kurdî 15ê kanûna 1995î de MED TVyî ra adirbirnayîş îlan kerd. La 16ê çeleyê 1996î de qezaya Basanî ya Şirnexî de 11 kurdî mînîbuse de ameyî qetilkerdene. Serfermandarê artêşa tirke îdîa kerd ke PKKyî no qirkerdiş kerdo la eşkera bi ke qirkerdiş hetê JÎTEMî ra ameyo kerdene. PKKyî reyna zî adirbirnayîş ard ca.

Wisarê 1996î de semedê suîkastê Rayberê Şarê Kurdî Eymurî rê 'ferman' dîya. Plan hetê MÎTî ra ame amadekerdene û nameyê ci zî 'Operasyonê Mercedesî' bi. Çunke goreyê planî wesayîtê bi markaya mercedesî verê bînaya Rayberê Şarê Kurdî de do biteqayêne. Eymurî semedê planî JÎTEMî ra Mahmut Yildirim (Yeşîl) wezîfedar kerd.

Ê rojan de Serekkomarê Tirkîya Demîrelî 27ê gulana 1996î de Amerîka reyde PKKyî ser o pêvînayîşî kerdêne. Tirkîya semedo ke 'Krîzê Kardakî' de Yunanîstan de pê bikera Amerîka ra waşt ke têkoşînê vera PKKyî de paştî bida ci.

Rayberê Şarê Kurdî pawitişanê xo yê Îmraliyî de qala ci kerde ke 9ê nîsana 1996î de Serekwezîrê Yunanîstanî Kostas Simitisî û Serekê Amerîka Bill Clintonî pêvînayîşêk kerd û semedê tasfîyeya ey pêkerd.

Reyna Tirkîya ê rojan de rixmê nêrazîbîyayîşê Misirî zî Îsraîlî reyde 'peymana perwerde û hemkarîya leşkerîye' îmza kerde. 2ê gulana 1996î de Wezîrê Karanê Teberî yê Misirî Amîr Musayî Anqara de bale ante krîzê Sûrîye-Tirkîya ser û waşt wird welatî pêbikerê. Ney zî a raşte xebera suîkastê Şamî nîşan kerdêne.

Tîma suîkastî ya tirkan 6ê gulana 1996î de serê sibayî roja îdamanê Denîz Gezmîş, Yusuf Aslan û Huseyîn Înanî de têgêraye. Wesayîto bombabarkerde nêzdîyê Dibistana Merkeze ya Partîye de amebi parkkerdene. Semedê Konferansê Neteweyî yê 4. hema hema pêro kadroyê lîderî yê PKKyî akademî de bîyî. Wexto ke wesayîto bombabarkerde teqa vengê ci pêro Şamî ra ame eşnawitene. Rayberê Şarê Kurdî û milîtanê PKKyî weş û war suîkastî ra bi şansî xelisîyayî.

Fermandaranê HPGyî ra Serhat Erzurum zî o çax akademî de bi. Erzurumî 2013 de ANFyî rê wina qaka suîkastî kerdbî: ''Rayberîye a roje do akademî de perwerde bidayêne. Xebatan ra semed o bineyk erey kewtbi coka xelisîya. Teqayîşêko pîl bi. Tesîrê ci ra darî kokê xo ra vejîyayî û qasê 50 metre firîyabî. Keyeyan de zî xesar amebi meydan. Kerdoxanê ê serebûtî ra  8 kesî tepişîyayî û dima vera dîyayî.''

Şanê ê suîkastî Rayberê Şarê Kurdî MED TVyî de vat: ''Ma vanê haştîye, way û biratîye, wa no şer biqedo. La ma herinda ci de bomba gênê.''

Semedo ke prosesê adirbirnayîş û suîkastî serkewte nêbîyî hemkarê hukmatî ANAP-DYP kewtî pê. 3 mengan ra dima no hukmat bin kewt.

Abdullah Ocalanî menga hezîrane de MED TVyî rê suîkastê 6ê gulane ser o wina qisey kerd: ''No komplo komployêko pîl bi. Semedê ney înan Misir de kombîyayîş ame kerdene, Îsraîl û Tirkîya pêkerd. Nê komployî de menfaatê Amerîka estbîy. Clintonî rojêke ver vat 'PKK Başûrê Kurdîstanî de beno bitesîr.' Reyna rojnameyanê Îsraîlî zî vat 'Hedef ganî warê Rayberîya PKKyî bibê.' Înan pê nê komployî armanc kerd ke xebatanê şorişgêran ê Başûrî vindarnê, Vakur de gerîlayan tasfîye bikerê û verê averşîyayîşê ma yê dîplomatîkî bigêrê. Yanî no komplo zaf girîng bi.''

Rayberê Şarê Kurdî kitabê xo 'Manîfestoyê Medenîyetê Demokratîkî' de îfade kerd ke suîkastê 6ê gulane destpêkê Komployê 15ê Sibata 1999î bi.

Rayberê Şarê Kurdî wina qala ekîpa suîkastî û awanîya xorine ya dewlete kerde: ''Şer hetê Gladio-JÎTEM-Hîzbullahî ra ameyêne kerdene. Înan waştêne ma qetî tasfîye bikerê coka zaf komployê taybetî kerdî. Suîkastê 6ê gulane (Abdullah Çatli, Sedat Bucak û Şaredarê Wêranşerî Keleşabdîogluyî pîya tede rol kerd) nîşaneyê ê prosesan bi. Her çiqas suîkast ser nêkewto zî embaze Zîlane (Zeynepe Kinaci) tehluke dî û 30ê hezîrane de Dêrsim de çalakîya fedayîye kerde. Na çalakîye serra 1996î kerde a serre ke serkewtişê ma zêdêr bi qetî.''