Dima ke hezîrana 2014î de Musul bêşer kewt cerganê DAÎŞî xîlafet îlan kerd û DAÎŞ pê barbarîye warêko hîra girewt binê kontrolê xo. DAÎŞî bi hezaran merdimî qetil kerdî û cinî û domanê kênayî kerdî kole.

Musulî ra çend aşman ra dima DAÎŞ dekewt Reqa û uca paytextê xo yo diyîn îlan kerd.

3ê tebaxa 2014î de hêrişê vera Şingalî ra dima kurdî bîyî hedefê DAÎŞî. Verî ke DAÎŞ hêrişê Kobanê bikero hêzanê kurdan vera El Nusra şer kerd. Dewleta tirke paştî daye El Nusra.

15ê êlula 2014î de cerganê DAÎŞî pê tank û tifingan hêrişê Kobanê kerd û dewleta tirke zî narey paştî daye DAÎŞî. Dewleta tirke nêverda ke merdimê ke wazenê Kobanê bipawê şorê uca û nê merdimî asteng kerdî.

Kurdan 21 rojan pê çekanê şenikan vera DAÎŞî şer kerd. Teşrîna verêne ya 2014î ra dima tay taxê merkezê Kobanê û 300 dewî ameyî îşxalkerdene. 300 hezar sivîlî neçare mendî ke keyeyê xo biteriknê.

5ê teşrîna verêne de şerwana YPJyî Arîne Mîrxan (Dîlare Gencxemîs) Miştenûr de çalakîya fedayî kerde. Arîne kewte mîyanê cerganê DAÎŞî û xo ser de bomba teqnaye. Na çalakîye tesîrê pêro dinya kerd.

Dinya bala xo daye Kobanê ser. Rejîmê Erdoganî hesabê binkewtişê Kobanê kerdêne. Erdoganî 7ê teşrîna verêne de vat: ''Kobanê ha bin kewena.''

Dişmenîya Erdoganî ya vera kurdan tehamulê kurdan qedna. Mîyanê 3 rojan de bi desan şaristanan de serewedaritişê pîlî qewimîyayî. Dest nîya qereqolan ser.

Kobanê gandar bîye. Xoverdayîş û serewedaritişê kurdan hêzê mîyanneteweyî zî vistî têgêrayîşan ver. Kurdan pare kerd ke keyeyêk zî bimano ê do xo ver bidê.

Teyarayanê şerî yê koalîsyonê mîyanneteweyî da bendanê DAÎŞî ro û çekî dayî şerwananê kurdan.

Xoverdayîşê 2 taxan ê peyênan ra xoverdayîşêko pîlêr geş bi. 1ê Teşrîna Peyêne sey Roja Kobanê ya Dinya ame îlankerdene û na roje her kes seba Kobanê vejîyeno meydanan.

Kobanê rê vajîyeno 'şaristanê şehîdan' û xoverdayîşê ci mendêne xoverdayîşê Stalingradî. Şer û xoverdayîşê 134 rojan ra dima şerwananê kurdan 26ê çeleyê 2015 de Kobanê kerd azad û serkewtiş îlan kerd.

No serkewtiş bi destpêkê çinbîyayîşê DAÎŞî.