Binê çimdarîya leşkeran de 2 serrî yo herêmanê Koyê Cûdîyî û Besta de darî birîyenê. Darê ke herêmanê Keniyamîr, Birateto, Birapeşo, Deyndarok, Cinîwer, Belûzer, Rîsor, Serêrû, Tîkera, Qûrteka Pêşya, Girêdeyincê, Şerevan, Xirtikbestê û Navyanî yê Besta de birîyenê, bi TIR û kamyonan yenê barkerdene û erşawîyenê şaristananê cîya-cîyayan.

Komîsyonê Xoza û Şaristanî yê Baroyê Şirnexî dîmenê TIR û kamyonan girewtî. Rixmê nê dîmenan zî hema zî rêxistinanê xoza qet yew tewir nêmojna. Balkêş o ke derheqê babete de Baroyê Şirnexî Greenpeace ra waştbi ke têbigêro la Greenpeace seba nê waştişî vat 'Herême nêkewena binê pisporîya ma.'

Serekê Baroyê Şirnexî Rojhat Dîlsîzî derheqê babete de vat ke ê texrîbkerdişê xoza teqîb kenê. Dîlsîzî da zaneyene ke vera qirkerdişê xoza 300 avûkatî do têbigêrê.