Wekîlê HDPyî yê Îzmîrî Murat Çepnîyî ANFyî reyde qisey kerd û hetê ekolojî ra serra 2020î ercnaye.

Çepnîyî pare kerd ke netîceya polîtîkaya asayîş û şerî ya îqtîdarî de rijîyayîşo ekolojîk û talan vejîyayî werte.

Çepnîyî vat: ''Kurdîstan bi bahaneya şer û asayîşî daristanî ameyî vêşnayene û Tirkîya de zî seba rantî daristanî ameyî çinkerdene. Serra 2004î ra nata Kurdîstan vurîya warê madenan. Bi taybetê Dêrsim de Gelîya Munzurî bi temamî vurîya warê ocaxanê madenî. Bi qanûnan verê nê madenan ame akerdene. Seba sermaye û karî nê qanûnî virazîyenê. ''

Çepnîyî bale ante projeyanê HES, JES û RESan ser û vat: ''HESî Heskîf binê awe de verda. Nê HESî benê sebebê felaketan. Ma sey HDPyî wazenê wa enerjîya ke eşkîyena vurîya wa bêra xebitnayene. Serra 2020î Tirkîya û Vakurê Kurdîstanî de serra rijîyayîşê ekolojîkî bîye la hetê bînî ra serra xoverdayîşî zî bîye. Dêrsim û tay cayanê bînan ê Kurdîstanî de vera talanê xoza xoverdayîş ame kerdene. Nê xoverdayîşan de polîsan hêrişê hemwelatîyan kerd. La narey Îzmîr, Bursa û Trabzon de zî polî û cendirmeyan hêrişê xoverdayoxan kerd. Ma nika mîyanê rijîyayîşê ekolojîkî de yê la hîşmendîya ekolojîke aver şina û xebatê cidîyî zî yenê kerdene. Seba ke paradîgmaya partîya ma paradîgmayêka ekolojîk a na ma rê avantajêko pîl o.''