Çewlîgo ke pê daran û çeman girewte yo, tim raştê qirkerdişanê xoza yeno. Çewlîg de bi bahaneya 'asayîşî' hêzê dewlete daran vêşnenê, pê projeyanê madenî binê erdê Çewlîgî yeno texrîbkerdene û şaristan de rijîyayo ekolojîk xo mojneno ra.

Deweka Kavakanî ya dewa Lîçikî ya qezaya Kanîreşî ya Çewlîgî de 38 rojî yo darî 18ê temmuze ra nata 38 rojî yo birîyenê.   

Dewijanê Lîçikî ra Sadik Gorgenî (41) îfade kerd ke o debara xo pê hingdarîye keno û vat: ''Wa destê xo nêdê xoza û madenanê ma. Xozaya ma pêşkêşê rantî yena kerdene. Derheqê birnayîşê daran de agahîyêke nêdîyaye ma. Ma îmzayî arê dayî, berdî qeymeqamîye. Eke nê projeyê madenî dewam bikerê çimeyê ma yê awe do çin bibê. Tîya de kolonyalîzm est o. Ganî şar bi hawayêkê rêxistinbîyayeyî û têkoşînî têbigêro. Birnayîşê nê daran ra dima dore do bêra madenan. Eke wina dewam bikero mîyanê 5 serran de tîya bibo wareyê xizanîye, bêçaretîye û ziwatîye.'' 

Serekê Şubeyê Amedî yê Odaya Muhendîsanê Dormeyî (ÇMO) Canfîdal Boldaşî zî derheqê babete de qisey kerd û da zanayene ke Lîçik de darî cara birîyayêne têna 2 menganê peyênan zî bi lezî no birnayîş yeno kerdene.  

Boldaşî vat: ''Birnayîşê daran sey her wextî pê koalîsyonê 'mixtar-gruba sermaye-îdareyî' dest pêkerdo. Xozaya ma reyna qurbanê sermaye yena kerdene. Ekosîstemê ma ho yeno çinkerdene.  Nê projeyê madenî û birnayîşê daran sermaye kenê zengîn, şar keno xizan. Şar nê kerdişan ra semed dima do warê xo biterikno û gandarî zî do şêrê. Yanî nê kerdişî çarçewa polîtîkaya 'bêmerdimanverdayîşî' de yenê kerdene. Ganî nê projeyî sere de şarê herême rê pêro rayaumûmîye rê bêrê qalkerdene. Seba ke na babete ser o yew hesasîye bêra awankerdene ganî rêxistinê komelê sivîlî, dormeyî û dezgehî erkî bigêrê xo milî. No erk erkê pawitişê waranê ma yo.''