Galûrê ke kurdkî de yenê manaya “gula ke ci ra gonî yena” nebatê endemîkî yê koyanê Şirnex, Colemêrg, Wan û Dêrsimî de wisar de abenê. Galûrê ke neslê înan binê tehlukeyê vînbîyayîşî de yê yenê pawitene. Goreyê qanûnê Xoza qerifnayîşê galûran, cayê ci ra kerdiş û rotişê bezreyanê ci sûc ê.

Kampusê Zanîngehê Çewlîgî de xeylêk galûrî abîyî. Nêno zanayene ke galûrî ça ra ameyî. Balkêş o ke totografê galûran keyepelê hesabê twitterî yê zanîngehî de ameyî parekerdene.

Derheqê babete de Ajansê Mezopotamya (MA) Sekreterîya Pêroyî ya Zanîngehê Çewlîgî de qisey kerd. Sekreterîye ard ziwan ke derheqê babete de zanayîşê înan çin o û Yewina Têkilîyanê Şar û Çapemenîye babete reyde eleqedar bena. Yewine reyde zî rixmê xîretan têkilîye nêameye ronayene.