Qezaya Kanîreşî ya Çewlîgî de daristananê Karacehenemî de bi rojan o bi bahaneya 'asayîşî' darî birîyenê. Daristanê Karacehenemî sey 'depoyê oksîjenî yê şaristanî' zanîyeno û tede darê seserrî estê. Çewlîgijan vera talanê daristanan nêrazîbîyayîşê xo mojna.

Hemwelatîyê bi nameyê Mahmut Kulluyî pare kerd ke eleqeyê birnayîşê daran pê asayîşî çin o, darî semedê rantî birîyenê. Kulluyî vat: ''Eke ma rê nêbo ê do nê daristanan rojêke de bibirnê. Ma hê înan pawenê. Dewijî xo vêşnenê la daristanan nêvêşnenê. Daristanî pêro serwetê ma yê, wa selahîyetdarî ma rê eşkerayîyêke bidê.''

Hemwelatîyêka bîne vat: ''Bi rojan o daran birnenê, xebera ma pê çinbîye. Ma ney nêwazenê. Madem şima daristanî birnayî çira vêşnenê? Hem daristanan birnenê vêşnenê hem zî sûcî erzenê milê dewijan. Ma tîya de mîyanê daristanan de ciwîyenê, daristanî namusê ma yê.''

Celal Erbîlî da zanayene ke bê rizaya înan darî birîyenê û vat: ''Gereka verî xebera ma pê biba. Ma nê daristanî kerdî pîl, kede daye ci. Eke Dengizê Reşî de daristanêk bivêşo ê vanê 'canê ma vêşeno.' La nê zî daristanî nîyê?''

Abdulsamet Bîlgîlîyî venga pêro selahîyetdaran da ke wa birnayîşê daran cade vindarnê û vat: ''Hetêkî ra daristananê ma birnenê hetêkê bînî ra zî vêşnenê. Bêxebera mi daristanê ma vêşnenê, ma vera ney ê. Gereka selahîyetdarî eşkerayîye bidê ma. Ma wazenê na xebata birnayîşî cade biqeda.''