Keyeyê êzidîyanê ke 20 serran ra dima agêrayî  Êlihî de û erdê xo pêser waşt, raştê hêrişî ameyî.

Keyeyanê êzidîyan ê  dewa Kelhoka Bişêrîya Êlihî de serra 1990î de rîyê teda û şerî ra erdê xo dabi rîsipîyanê keyeyanê Karabulutî û Bîterî. Êzidîyan noter de erdê xo emanetê înan kerdibi û neçare mendbî ke koçê Ewropa bikê. Keyeyê êzidîyan 20 serran ra dima agêrayî û dî ke erdê înan ameyo destsernayene.

Keyeyan seba ke erdê xo apey bigêrê dewa akerdbî. Têkoşînê huqûqî yê 8 serran ra dima keyeyan erdê xo apey girewt. La keyeyanê Bîterî û Karabulutî zaf reyan hêrişê keyeyanê êzidîyan kerd. Ewro wexto ke keyeyê êzidîyan otêle ra vejîyayêne 6 kesan hêrişê înan kerd. Goreyê xeberan komêke bi daran hêrişê keyeyan kerd. Nê hêrişî de Nedîm Erkîşo ke Kelhok de erdê ci esto û Cevdet Tukuyo ke seba şîne amebi şaristan birîndar bîyî. Hêriş ra dima 5 hêrişkerî ameyî destbendkerdene. Ame zanayene ke rewşa weşîye ya Erkîşî û Tukuyî baş a.