Deweka Xarsakî ya dewa Conagî ya qezaya Xorxolî ya Çewlîgî de 29ê tebaxe de şewat dest pêkerdbi. Şewat vizêr gêrîyabi binê kontrolî la semedo ke nêame serdinkerdene şewe reyna dest pêkerd. Şewat pê tesîrê vayî derbazê cayan ê bînan beno û ci rê mudaxele nêno kerdene.

Dewijê Conagî Cengîz Goksalî pare kerd ke rixmo ke înan xebata serdinkerdişî waşte xebate nêameye kerdene. Goksalî vat: ''Coka şewe reyna şewat dest pêkerd. Nika xeylêk cayî vêşenê. Şewat ver bi dewa Deşte û Kêrî şina. Şewat xo resna wareyanê Arê Qêwexî zî. Eke wina şêro şewat reseno zereyê dewan.''