Amed de karanê westeyanê armenîyan ra mendê ra yew zî viraştişê solan o. Kasim Oguço ke eslê xo de qezaya Xîzanî ya Bedlîsî ra yo û 50 serrî yo Amed de maneno, nê karî kekê xo ra musayo. Kekê ey zî apê xo ra, apê ey zî westayêkê armenî ra nê karî musayo.

Oguço ke 45 serrî yo dikana xo akerda ard ziwan ke o qezaya Sûrî ya Amedî de bîyo pîl, dikana xo ya verêne tîya de akerda la dima dikana xo bar kerda berda Yenîşehîrî.

Oguçî îfade kerd ke hînî çew nê karî nêkeno û vat: ''Têna kesêk Îstanbul de nê karî keno. Domanê mi zî xo nêzdîyê nê karî nêkenê. A raşte viraştişê solan zehmet o, sebrî wazeno. Ge ge merdimî tira aciz benê. Gereka bala merdimî tim nê karî ser de biba. Wexto ke mi dest pê nêkarî kerd ez nêeşkaya çakûç bigêra xo destî, ge ge mi çakûç daengiştanê xo ro. Hêdî hêdî merdim beno westayê nê karî.''

Oguçî da zanayene ke krîzo ekonomîk zaf tesîrê ci keno û vat: ''Wexto ke ma solan tamîr kenê 15 lîra wazenê. No pere merdiman rê zaf yeno la ma hînî vayan ra nêeşkenê malzemeyanê xo bigêrê. Muşterîyî heta ke pê çimê xo nêvînê bawer nêkenê ke karê ma zehmet o.

Krîzo ekonomîk tesîrê keyeyî zî keno. Yew domanê mi şino zanîngeh, yew şino lîse. Domanê min ê bînî zî amadekarîya zanîngehî kenê, msrafê înan zî zaf o. Seba ameyoxê domananê xo ma neçare yê ke bixebitê. Ez rixmo ke teqawut bîya neçare ya ke bixebita.''