Tirkîya û Vakurê Kurdîstanî de bi mîlyonana domanê kurdî nêeşkenê bi kurdkî perwerde bivînê. Domanê kurdî coka mîyanê cuya komelkîye de zaf zorî û zehmetî vînenê.

Pisporê Averberdişê Domanan û Akademîsyen Furkan Aydemîrî îfade kerd ke seba ke domanî bieşkê ziwanê xo yê dayîke bimusê di serrê verênî zaf krîtîk ê. Aydemîrî dîyar krd ke eke domanî mîyanê di serran de ziwanê xo yê dayîke nêmusê, pey ra zehmetî ancenê. Aydemîrî vat: ''Domanî serra yewine de vateyanê verênan, serra diyîne de zî cumleyanê verênan şuxilnenê. Musayîşê ziwanê dayîke seba averşîyayîşê hîsgerî û komelkî babetêka merkezî ya. Mabênê serranê 0-6an de kokê ziwanî erzîyenê. Merdimê ke ziwanê xo yê dayîke hol qisey kenê eşkenê xo bi holêrî îfade bikerê. Ziwan eşkeno zaf çîyan ser bivisno. Coka ziwanê dayîke zaf girîng o.''

Aydemîrî pare kerd ke domanî keyeyê xo de kurdkî musenê la wexto ke dest pê dibistane kenê hînî nêeşkenê kokanê ziwanê dayîke aver berê. Aydemîrî vat: ''Ziwanê fekkî de binge xurt bîyo, coka ganî merdim bi nuştekî ziwanê xo xurt bikero. Domanî dima tirkî zî musenê la wird ziwanan zî hol nêmusenê. Yanî rewşêka nêmcetmende vejîyena werte.

Eke domanî bi ziwanê xo yê dayîke perwerde nêvînê no do bi hawayêkê xirabî tesîrê înan bikero. Dibistane de domanan rê vajîyeno ke kurdkî qisey mekerê tirkî qisey bikerê. Domanî bi nê hawayî hînî nêeşkenê xo îfade bikerê. Seba ke nêeşkenê xo hol îfade bikerê zî xo rê bawer nêkenê û xo rê hûrmet nêkenê. Coka domanî xo kêm vînenê. Merdimê ke wird ziwanan zanenê, wird ziwanan de zî qels manenê.''