Tirkîya û Vakurê Kurdîstanî de polîtîkayanê AKP-MHPyî ra her ke şino krîzo ekonomîk beno giranêr û şar mîyanê xizanîyêka xidare de maneno.

Dêrsim de zî şar şino koyan, sey kilawek, gulik, sîr, kîraz, tûyan ûsn. meywe û vaşan arê dano û roşeno. Şar keno ke bi nê hawayî tesîrê krîzê ekonomîkî kêm bikero.

Huseyîn Ercan (58) 10 serrî yo koyan û baxçeyan ra vaş û meyweyan arê dano, Kuçeyê Darî de roşeno û keno ke bi nê hawayî debara xo bikero. Ercanî derheqê babete de PÎRHA rê qisey kerd û da zanayene ke ê pê krîzê ekonomîkî nêeşkenê.

Ercanî dîyar kerd ke nika ê kîrazan arê danê û vat: ''Dima ma do vîşne û xiyaran arê bidê, biroşê. Hetê ekonomî ra halê ma xirab o. Seba ke gureyêk çin o ke ma bikerê neçarîye ra ma nê karî kenê. Ma kîrazan arê danê, benê Dêrsimî û roşenê. Seba ke nika Dêrsim qerebalix o ma eşkenê berhemanê xo biroşê. Zafêr kesê ke teberê welatî ra ameyê tehtîl berhemanê ma hêrînenê.''