Wextê peyênî de Dêrsim de xoza û warê fîrazî yenê hedefkerdene. HES û awbendî, ocaxê mermeran raştê nêrazîbîyayîşê şarî yenê. Şarê Dêrsimî vera nê kerdişanê serê cayanê fîrazan têkoşîn keno. Nê têkoşînî tay projeyî vindarnayî la tay projeyan ra tayî hema zî dewam kenê. Tewr peyên zî ame waştene ke Çimeyanê Munzurî de xebata peyzajî bêra kerdene ke çimeyî seba şarî fîraz ê.

Wekîlê HDPyî yê Antalya Kemal Bulbulî derheqê mesele de ANFyî rê qisey kerd.

Bulbulî da zanayene ke Dêrsim de semedo ke waranê fîrazan de xebate bêra kerdene yew lazimîye çin a û vat: ''Mekan û warê ma mutewazî yê û fîraz ê. Erdoganî verî cemxaneyan rê xatbi 'ucube.' No sûcê nefretî yo.

Xozayîtîya Duzgun Baba û Munzur Babayî nêna a mana ke nê cayî nênê pawitene. Şar wazeno nê cayî xozayî bê. Eke xozayîya bê cayan bêra pawitene wa proje bêro kerdene la wina nêbeno. Dewlete pê projeyê peyzajî wazena hîşmendîya xo nê cayan de ca bikera. Merdimî semedo ke şorê Duzgun Babayî bi saetan rayîr şonê. Xora na babete de mesaj zî no yo. Ganî çîle bêra antene. Eke uca de teleferîk bêro kerdene cewherê bawerîye xeripîyeno. Ganî şarê ma, pîrê ma vera nê kerdişan tewirê xo bimojnê û meverdê ke nê projeyî bêrê kerdene.''