Colemêrg de merdimî seba ke bieşkê debara xo bikerê neçare manenê ke bi mengan keyeyê xo ra dûrî de şiwanetîye bikerê. Cografyaya şaristanî seba heywankarîye zaf munasîb a la qedexeyê wareyan karê şiwaneyan kenê zehmet. 

Şaristan de şiwanetîye menganê nîsane û gulane de dest pêkena û heta teşrîna peyêne dewam kena.

Mehmet Erîko ke 20 serrî yo Colemêrg de şiwanetîye keno, ard ziwan ke karê înan de hetê weşî û hetê zehmetî est ê. 

Erîkî da zanayene ke hînî debarkerdiş zehmet bîyo û vat: ''Ez pê şiwanetîye debara xo kena. Ma 6 mengan wareyan de manenê. Serê sibayî ez wirzena we, heywanan çêrnena û nêmroje zî înan ana. Dima reyna heywanan bena çêrnayîşî, ez dima heywanan bena verê awe. Rojê ma wina derbaz benê.''

Erîkî pare kerd ke hînî zaf merdimî nê karî nêkenê û vat: ''Ciwanî hînî nê karî nêkenê. Coka şiwanetîye hînî nêmanena. Hetê ci yê weşî est bibê zî zaf hetê nê karî yê zehmetî zî est ê. Seba çêrnayîşê heywanan ge ge ez şewan ranêkewena. No kar pê wijdane yeno kerdene. Ganî ti miqatê heywananê emanetan bibê.''