Serekê Komeleya Cigêrayîş, Averberdiş û Pawitişê Berhemanê Tarîxîyan (ÇEVDER) a Wanî Alî Kalçikî derheqê talanê xozaya Colemêrg û Wanî de ANFyî rê qisey kerd.

Alî Kalçikî bale ante ser ke Amerîka, Kanada, Îngilistan, Fransa û Almanya zî tede  şîrketê mîyanneteweyî Colemêrg de madenî vejenê. Kalçikî ard ziwan ke pê rayîrê nê şîrketan erd yeno xespkerdene û vat: ''Destûr nêdîyeno dewijan ke şorê herêmanê xo û cayanê madenî. Nê madenî xoza talan kenê, wêran kenê. Hetê bînî ra eşteyê nê madenan verdîyenê Çemê Zê û awe bena jehrîn. Her serre seba madenêkê neweyî îhaleyêke yena akerdene. Nika koyanê Cîlo, Sumbul û Meskan de barbarîyêk est a. Nê koyî ameyê qulkerdene û tunel û labîrentê ke TIR zî eşkenê tira derbaz bibê ameyê viraştene. Gelîya Zap û Awa Zê hetê nê madenan ra yenê lêşinkerdene. Ma do vera ney dewa abikerê. Ma venga komeleyanê xoza yê Tirkîya û herême zî danê ke wa vera na barbarîye wirzê payan ser.''

Kalçikî da zanayene ke Gelîya Zîlan de xeylêk HES, ocaxê mermeran zî yenê akerdene û vat: ''Ma Gelîya Zîlane de cigêrayîşan kenê, HESan teqîb kenê. Ma cigêrayîşan de vînenê ke ocaxê mermeran xoza qir kenê, Çemê Zîlane lêşin kenê. Gelîya Zîlane de nabetê endemîkî est ê û ocaxê mermeran înan rê gefan wanenê. Seba ke herême de cuye dewam bikera, her çî ra ver ganî nê ocaxî bêrê padayene.''