Mudirîya Karanê Awe (DSÎ) 2014 de bire girewte ke dewa Usaxî ya qezaya Çemişgezekî ya Dêrsimî de  'projeyê awedayîş û golekî' bikera. La eke proje bêro caaerdene se ra 80ê erdê dewijan do binê awe de bimano.

Dewijan seba betalkerdişê projeyî muracatê DSÎ kerd la DSÎ waştişê dewijan red kerd. Dewijan zî muracatê Mehkemeya Herêmî ya Erziromî kerd. Avûkatanê dewa ra Bariş Yildirim derheqê babete de Ajansê Mezopotamya rê qisey kerd.

Yildirimî da zanayene ke proje Meletî, Xarpêt, Çewlîg û Dêrsimî zî muhtewa keno la warê projeyî warê zîretî yê şarî yo.  Yildirimî îfade kerd ke eke proje bêro caardene erdê şarî binê awe de maneno û tehlukeyê 'hezazî' qewimîyeno.  

Yildirimî vat: ''Warê projeyî de zîyaretgehê elewîyan û erdê zîretî est ê. Şar bi xo no proje nêwazeno. Cara Çemişgezek Awbendê Kebanî ra dima binê awe de mendbi. Eke no proje bêro caardene erazîyê tewr bereketînî do binê awe de bimanê û şar neçare bimano ke koç bikero. No proje huqûqî nîyo.''

Dewijan ra Yusuf Topçuyî vat: ''Xora DSÎ seba ke şar koç bikero, qestî ra nê projeyî de israr keno. Tîya de vîrardişê ma est ê, cuya ma tîya de ya. Ma do tîya war meverdê.''

Dewije Kamîye Şaki (85) vat: ''Tay dewijî pê pereyî xapîyayî. Ma pere nêwazenê, wa dewa ma destî ra nêşora. Ê wazenê ma tîya ra surgun bikerê.'' 

Serhat Yazarî vat: ''Eke bax baxçe, erazîyê ma binê awe de bimanê, çi gureyê ma tîya de est o?Ma na gola viraşte nêwazenê.'' 

Zeynepe Karaca vat: ''Bax û baxçeyê ma cayê projeyî de yê. Wa destê xo medê erdê ma.Wa leyî bi azadî biherikîyê.'' 

Muslum Bîçîcîyî vat: ''Dewa ma seba ke elewî û çepgîr a hetê AKPyî ra ameya hedefkerdene. Şaredarê Çemişgezekî yê AKPyî û wekîlo çemişgezekijî yê AKPyî Mustafa Ataşî mîmarê nê projeyî yê.''