Platformê Demokrasî û Kede yê Dêrsimî vera talanê xoza Meydanê Seyîd Rizayî de bi şîarê 'Ma do ser bikewê, ma waranê cuye pawenê' mîtîng kerd.  Wekîlê HDPyî yê Dêrsimî Alîcan Onlu, Hemvervatoxê Komîsyonê Ekolojî yê HDPyî Menekşe Kizildere, Naci Nonmez, akîtîvîste TJA, îdarekarê DAD, ESP, rêxistina HDPyî ya Çewlgî, aktîvîstê ekoloji yê herême û xeylêk kesî tewrê mîtîngî bîyî.

Bi hezaran kesî verê mîtîngî Meydanê Seyîd Rizayî de pê sloganan, pankart, tîlîlîyan dest pê rayraşîyayîşî kerd. Mîtîng de hêver Platformê Kede û Demokrasîyî ra Kena Çetînî qisey kerd. Çetînî vat: ‘’Ewro çime xeylêk şîrketan Dêrsimî ser o, pawenê ke senî nêrazîbîyayîş yeno mojnayene. Welatê me de warê xoza şîrketan rê yenê peşkeşkerdene. Ma pêro xoverdayîşanê semedê pawitişê xoza yê her hetê walatî selam kenê.  Pulur û Xozat de darî yenê birnayene. Hukmat destûrê qirkerdişê daristanan dano. Dêrsim sey vizêrî ewro zî mile xo çewt nêkeno, sereberz wayîrê ercanê xo vejîyeno. Ewro ma semedê wayîrvejîyayîşê xoza tîya ameyî têhet û ma do tewirê xo yê vera qirkerdişî girdêr bikerê.’’

Hemvervatoxê Komîsyonê Ekolojî yê HDPyî Nacî Sonmezî vat: ‘’Tarîxê ma tarîxê têkoşînê vera kapîtalîzm û faşîzmî yo. Tarîxê têkoşînê feqîran û bindestan ê vera dişmenîya vera cinîyan o. Kapîtalîzm keno ke pê sîyasetê talan û rantî yê vera ekoloji xo her cade ca bikero. Kurdîstan de zî pê texrîbatê şerî ekoloji yeno talankerdene.  Na mesele têna meseleya pawitişê zergûnîye nîya. Hêrişê vera xoza polîtîk o, ganî ma zî cewabê polîtîkî bidê. Ma do têkoşînî xurtêr bikerê.’’

Yewîya Ekolojî ra Hatûne Esen zî vat:  ‘’Serranê peyênan de 81 bajaran de qirkerdişê xoza zêdîyayî.  Ma zanî senî coğrafya ser o kayî yenê kaykerdene. Gama ke yew dare yena birnayene bajarê bînî zî nê dejî ancanê. Ganî ma ekolojîstî bibê yew, pîya têkoşîn bikerê. Her herre bimbarek a. Ez bitaybetî veng dana înanê ke pîya şîrketanê madenî gêrenê, o pere do şima rê bibo axu. Semedê pawitişî xoza ganî têkoşîn bêro xurtkerdene. Krîzê îklîmî berteng de yo, awe bena kêm. Ma Munzur, Dîcle û Zîlane pîya bipawê. Ma do ser bikewê.’’

Çalakîye de seba ke bale biancîyo serê talanê vera ekolojî ser skeç ame kaykerdene û dima ra mîtîng pê goveng û tîlîlîyan qedîya.