Kampanyaya dewijanê dewa Mulu ya Dêrsimî ya vera ocaxê kerra vila bena. Dewijê Mulu vanê: ''Bi talankerdişî herre, dare, domanîye, vîrardiş, kultur û hîşê ma yo komelkî yeno çînkerdene. Eke xozaya merdimî ra hîşê ci bêro girewtene destê ci de çi maneno!
Dewa Mulu ya Dêrsimî de 15 serrî yo ke ocaxê kerra xoza talan keno. Dewijanê Mulu semedê pawitişê xozaya xo kampanyaya îmzayan daye destpêkerdene. Kampanyaya ke dêrsimîjî û cugehpawitoxî paştî danê ci çend şino vila bena û vengê dewijan dîyeno eşnawitene.
Kampanyaya îmzayan a ke hetê rojnamegere û nuştoxe Denîze Bîlgîn ra ameye destpêkerdene de yeno waştene ke wa ocaxê kerra yo ke hetê Mutehîd Erdal Guntaşî ra yeno rayraberdene wa bêro qefilnayene.
